नवी दिल्ली BJP Manifesto : भारतीय जनता पार्टी (भाजपा) नं 2024 च्या लोकसभा निवडणुकीसाठी आपला जाहीरनामा प्रसिद्ध केलाय. केंद्रात सरकार स्थापन केल्यानंतर संपूर्ण देशात समान नागरी संहिता (यूसीसी) लागू करेल, ही मोठी घोषणा भाजपानं केलीय. जाहीरनामा प्रसिद्ध करताना पंतप्रधान नरेंद्र मोदी म्हणाले की, पक्षाचं 'संकल्प पत्र' विकसित भारताच्या चार मजबूत स्तंभांना तरुण, महिला, गरीब आणि शेतकरी सक्षम करेल.
वन नेशन वन इलेक्शनची अंमलबजावणी : भाजपानं आपल्या जाहीरनाम्यात म्हटलंय की, “निवडणुकीशी संबंधित मुद्द्यांची तपासणी करण्यासाठी आम्ही एक उच्चस्तरीय समिती स्थापन केलीय. आता आम्ही त्यांच्या शिफारशींच्या यशस्वी अंमलबजावणीसाठी काम करु.” यासोबतच सर्व स्तरातील निवडणुकांमध्ये सामायिक मतदार यादीची तरतूदही ठेवण्यात येणार आहे.
भाजपाच्या जाहीरनाम्यात आणखी काय? : भाजपानं जाहीरनाम्यात 50 हजार रुपयांची कर्जमर्यादा वाढवून ती देशातील खेड्यापाड्यात आणि शहरांपर्यंत वाढवली जाईल, असं आश्वासन भाजपाच्या ठराव पत्रात देण्यात आलं होतं. तसंच 70 वर्षांवरील वृद्धांना आयुष्मान योजनेच्या कक्षेत आणून मोफत उपचाराची सुविधा मिळणार आहे. आणखी तीन कोटी घरे बांधण्याचा ठराव घेण्याचं आश्वासनही जाहीरनाम्यात देण्यात आलंय. त्याचबरोबर आता स्वस्त स्वयंपाकाचा गॅस प्रत्येक घरात पाईपद्वारे पोहोचवला जाणार आहे.
गरिबांसाठी काय : भाजपाच्या जाहीरनाम्यात म्हटलंय की, “आम्ही 2020 पासून 80 कोटींहून अधिक कुटुंबांना मोफत रेशन देत आहोत. पंतप्रधान गरीब कल्याण अन्न योजनेंतर्गत पुढील पाच वर्षे मोफत रेशन सुरु राहणार आहे. यासोबतच गरिबांचं ताटही सुरक्षित ठेवण्याचे प्रयत्न सुरु राहणार आहेत. गरिबांच्या आरोग्य सुविधा लक्षात घेऊन कुटुंबांना 5 लाख रुपयांपर्यंतचे मोफत उपचार दिलं जात होतं आणि भविष्यातही असेच सुरु राहणार आहेत. पंतप्रधान आवास योजनेचा विस्तार केला जाईल.
वीज बिल शून्यावर आणण्याचं आश्वासन : आता भाजपानंही कोट्यवधी कुटुंबांची वीजबिल शून्यावर आणण्यासाठी काम करण्याचं आश्वासन दिलंय. ज्या अंतर्गत पंतप्रधान सूर्य घर मोफत वीज योजनेवर वेगानं काम केलं जाईल, घरात वीज मोफत असेल आणि अतिरिक्त वीज विकून कमाई देखील केली जाईल. याशिवाय ट्रान्सजेंडर्सनाही आयुष्मान योजनेशी जोडलं जाणार असून आगामी पाच वर्षे महिला शक्तीच्या नव्या सहभागाची असतील.
मध्यमवर्गीय कुटुंबांसाठी काय : भाजपाच्या जाहीरनाम्यानुसार मध्यमवर्गीय कुटुंबांना कमी किमतीची घरं, सुलभ आरोग्य सुविधा, चांगलं शिक्षण आणि रोजगार तसंच स्वयंरोजगाराच्या संधी उपलब्ध करुन दिल्या जातील. तसंच, ज्यांना स्वतःचं घर घेण्याचं स्वप्न आहे, त्यांच्यासाठी नोंदणीची किंमत कमी होईल, बांधकामाचा खर्च कमी होईल आणि नकाशा सहज पास होईल.
महिलांसाठी काय : येत्या 5 वर्षात तीन कोटी ग्रामीण महिलांना लखपती दीदी बनवण्याचं आश्वासन भाजपानं आपल्या जाहीरनाम्यात दिलंय. औद्योगिक आणि व्यावसायिक क्षेत्रातील नोकरदार महिलांसाठी वसतिगृहं बांधली जातील ज्यात मूलभूत सुविधा असतील. लोकसभा आणि राज्यांच्या विधानसभांमध्ये नारी वंदन कायदा लागू करुन महिलांचं प्रतिनिधित्व सुनिश्चित केलं जाईल.
तरुणांना संधी देण्याची हमी : भाजपाच्या जाहीरनाम्यात तरुणांना संधी देण्याचं आश्वासनही दिलंय. जाहीरनाम्यानुसार, पेपरफुटीवर नियंत्रण ठेवण्यासाठी कायदा लागू करण्यात येणार असून, त्यात गुन्हेगारांवर कठोर शिक्षेची तरतूद असेल. तसंच सरकारी परीक्षांमध्ये पारदर्शकता आणली जाईल.
बुलेट ट्रेनची भेट : पंतप्रधान मोदी म्हणाले, "आज अहमदाबाद मुंबई बुलेट ट्रेनचं काम जोरात सुरु आहे आणि ते जवळपास शेवटच्या टप्प्यात आहे. त्याचप्रमाणे एक बुलेट ट्रेन उत्तर भारतात, एक बुलेट ट्रेन दक्षिण भारतात आणि एक बुलेट ट्रेन पूर्व भारतात धावेल. यासाठी सर्वेक्षणाचं कामही लवकरच सुरु करण्यात येणार आहे.
6G च्या माध्यमातून डिजिटल क्रांती आणणार : या जाहीरनाम्यात भाजपानं 5G नेटवर्कचा विस्तार आणि 6G तंत्रज्ञान विकसित करण्यात महत्त्वाची भूमिका बजावण्याचं आश्वासन दिलंय. तसंच, भारत नेटद्वारे 2 लाखांहून अधिक ग्रामपंचायती ब्रॉडबँडशी जोडल्या जातील आणि प्रत्येक ग्रामपंचायतीला हाय-स्पीड इंटरनेट देण्याचं आश्वासन देण्यात आलंय.
हेही वाचा :
