ബെംഗളൂരു: ഓടുന്ന ട്രെയിനിൽ നിന്ന് വീണ് മരിച്ച യാത്രക്കാരിയുടെ കുടുംബത്തിന് റെയിൽവേ നഷ്‌ടപരിഹാരം നൽകണമെന്ന് കര്‍ണാടക ഹൈക്കോടതി. ഓടിക്കൊണ്ടിരിക്കുന്ന ട്രെയിനിൽ നിന്നും ഇറങ്ങാൻ ശ്രമിക്കവേ വീണു മരിച്ച സ്ത്രീയുടെ കുടുംബത്തിന് നഷ്‌ടപരിഹാരം നല്‌കാൻ വിസമ്മതിച്ച റെയിൽവേ നഷ്‌ടപരിഹാര ട്രൈബ്യൂണലിന്‍റെ നടപടിയ്‌ക്കെതിരെ സമർപ്പിച്ച ഹർജിയിലാണ് ഉത്തരവ്. ചന്നപട്ടണ സ്വദേശിയായ റോജാമണിയും കുടുംബവുമാണ് ഹൈക്കോടതിയിൽ ഹർജി നൽകിയത്.
2014 ലാണ് കേസിനാസ്‌പദമായ സംഭവമുണ്ടായത്. റോജാമണിയുടെ ബന്ധു ജയമ്മയാണ് ഓടുന്ന ട്രെയിനിൽ നിന്നും ഇറങ്ങാൻ ശ്രമിക്കവേ വീണ് മരിച്ചത്. ജയമ്മയുടെ കുടുംബത്തിന് റെയിൽവേ നഷ്‌ടപരിഹാരം നിഷേധിച്ചിരുന്നു.
നഷ്‌ടപരിഹാരം നിഷേധിച്ചതിനെതിരെ നല്‍കിയ ഹർജി പരിഗണിച്ച ജസ്‌റ്റിസ് എച്ച് പി സന്ദേശ് അധ്യക്ഷനായ ഹൈക്കോടതി സിംഗിൾ ബെഞ്ച് ജയമ്മയുടെ കുടുംബത്തിന് 7 ശതമാനം വാർഷിക പലിശ സഹിതം 4 ലക്ഷം രൂപ നഷ്‌ടപരിഹാരം നൽകാൻ റെയിൽവേ വകുപ്പിനോട് നിർദ്ദേശിക്കുകയായിരുന്നു. ഇതിനു പുറമെ ഓടുന്ന ട്രെയിനിൽ നിന്ന് ഇറങ്ങുന്നതിനിടെ യാത്രക്കാരൻ മരിച്ചാൽ നഷ്‌ടപരിഹാരം നൽകേണ്ടത് റെയിൽവേയുടെ ഉത്തരവാദിത്തമാണെന്നും കോടതി പറഞ്ഞു.
മരിച്ച ജയമ്മ സഹോദരിയോടൊപ്പം തെറ്റായ ട്രെയിനിൽ കയറുകയായിരുന്നു. അബദ്ധം സംഭവിച്ചെന്ന് മനസിലാക്കിയപ്പോഴേക്കും ട്രെയിൻ നീങ്ങി തുടങ്ങിയിരുന്നു. തുടർന്ന് പെട്ടന്ന് സ്‌റ്റേഷനിൽ ഇറങ്ങാൻ ശ്രമിക്കുന്നതിനിടെയാണ് അപകടത്തിൽ പെട്ടത്. ഗുരുതരമായി പരുക്കേറ്റ ജയമ്മ സംഭവ സ്ഥലത്തുവച്ചു തന്നെ മരിക്കുകയായിരുന്നെന്ന് ഹർജിക്കാരന്‍റെ അഭിഭാഷകൻ കോടതിയെ അറിയിച്ചു. സംഭവത്തിൽ ജയമ്മയുടെ കുടുംബത്തിന് ഉചിതമായ നഷ്‌ടപരിഹാരം നൽകാൻ ഉത്തരവിടണമെന്നും അഭിഭാഷകന്‍ കോടതിയിൽ പറഞ്ഞു.
അതേസമയം സംഭവം ബോധപൂർവം നടന്നതാണെന്നായിരുന്നു റെയിൽവേയുടെ വാദം. എന്നാൽ ഇതിന് തെളിവുകൾ നല്‌കാൻ റെയിൽവേയ്ക്ക് സാധിച്ചില്ലെന്ന് ചൂണ്ടിക്കാട്ടി റെയിൽവേ റൈറ്റ്‌സ് ട്രൈബ്യൂണലിന്‍റെ ഉത്തരവ് റദ്ദാക്കണമെന്ന് ഹർജിക്കാരൻ ആവശ്യപ്പെട്ടു.
തെറ്റായ ട്രെയിനിൽ കയറിയ ജയമ്മയ്ക്ക് ട്രെയിൻ നീങ്ങാൻ തുടങ്ങിയപ്പോൾ അടുത്ത സ്‌റ്റേഷനിൽ ഇറങ്ങാമായിരുന്നു. അല്ലെങ്കിൽ അലാറം ചെയിൻ വലിക്കണമായിരുന്നു. ഇത് രണ്ടും ചെയ്യാതെ ട്രെയിനിൽ നിന്നും ഇറങ്ങാൻ ശ്രമിക്കുകയായിരുന്നു അവർ. അതിനാൽ സംഭവം അബദ്ധത്തിൽ സംഭവിച്ചതാണെന്ന് പറയാൻ സാധിക്കില്ലെന്നും റെയിൽവേ നിയമത്തിലെ സെക്ഷൻ 123 (ഇ) പ്രകാരം നഷ്‌ടപരിഹാരം നൽകാൻ കഴിയില്ലെന്നും റെയിൽവേയുടെ അഭിഭാഷകൻ കോടതിയെ അറിയിച്ചു.
എന്നാൽ ഓടുന്ന ട്രെയിനിൽ നിന്ന് ഇറങ്ങുന്നതിനിടെ യാത്രക്കാരൻ മരിച്ചാൽ, കുടുംബാംഗങ്ങൾക്ക് നഷ്‌ടപരിഹാരം നൽകേണ്ടത് റെയിൽവേയുടെ കടമയാണെന്ന് ബെഞ്ച് വ്യക്തമാക്കി. തുടര്‍ന്ന് നഷ്‌ടപരിഹാരം നല്‌കാൻ വിധിക്കുകയായിരുന്നു.
