वाशिम - गणपती बाप्पांचे उद्या आगमन होणार आहे. जिल्ह्यातील गणेश भक्तांची लगबग सुरू झाली आहे. गत ४० वर्षांपासून जिल्ह्यातील सावरगाव बरडे या लहानशा गावातील गणेशमूर्तींचे विशेष आकर्षण आहे. येथे तयार होणाऱ्या गणेश मूर्तीच्या कोरीव आणि रेखीव रंगकामांमुळे हे गाव प्रसिध्द झाले आहे. येथील काही गावकऱ्यांचे आणि कलाकारांचे अर्थकारणही यावर अवलंबून असल्याने रोजगाराबाबतीत लोक समाधानी आहेत.
हेही वाचा - क्षणभरात प्रेमात पडणारे सौंदर्यमय कोकण; पाहा नयनरम्य फुलांचा देखावा
गावातील कलावंतांचे अर्थकारण बदलवून टाकणारा हा व्यवसाय उद्योगाच रुप घेऊ शकला नसला तरी सावरगाव बरडे या गावाची ओळख 'देव साकारणारा गाव' अशी निर्माण झाली आहे. मूर्तीची सुबकता, आकर्षक रंगसंगती आणि वाजवी किंमत या बाबीमुळे गणेशमूर्तीसाठी सावरगावचे नाव अग्रक्रमाने घेतले जाते. येथे अकोला, बुलडाणा, हिंगोली आणि यवतमाळ जिल्ह्यातून गणेश मूर्तीची नोंदणी केली जाते. साधारण ग्रामीण भागात शहरातून मूर्ती नेली जात असल्याचे पहावयास मिळते. परंतु, सावरगाव बरडे या लहानशा गावातून लगतच्या चार ते पाच जिल्ह्यात गणेशमूर्ती नेल्या जात असल्यामुळे याठिकाणी गर्दी होते.
हेही वाचा - गणेशमूर्तींवर फिरतोय अखेरचा हात; रेखणीच्या कामांना वेग
गावात गणेश मूर्ती बनविण्याचे काम वर्षभर सुरु असते. सार्वजनिक गणेश मंडळासोबतच घरगुती मूर्तीची मागणी केली जाते. यंदा ६ इंचापासून १० ते १२ फुटापर्यंत उंचीच्या मूर्तींना प्रचंड मागणी असून गणेशोत्सव तोंडावर येऊन ठेपल्यामुळे मूर्तींवर आता शेवटचा हात फिरवण्याची लगबग सुरू आहे. सावरगाव मधील अनेक कुटुंबांचा उदरनिर्वाह गणेशमूर्ती विक्रीवर अवलंबून असून दरवर्षी लाखो रुपयांची उलाढाल या व्यवसायातून होत असते.
हेही वाचा - गेल्या पाच पिढ्यांपासून 'हे' कुटुंब साकारतंय पर्यावरणपूरक देखण्या गणेशमूर्ती
