वर्ध्यात विचित्र अपघातात एका चिमुकलीचा मृत्यू; २४ जण जखमी

वर्धा - जिल्ह्यातील अवैध उत्खनन नऊ वर्षांच्या चिमुकलीच्या जीवावर बेतले आहे. वाळूने भरलेल्या ट्रकचा विचित्र अपघात घडला. वाळूने भरलेला ट्रक आणि टिप्परचा अपघात होत असताना मागून येणारा टिप्पर ट्रॅव्हलरवर जाऊन आदळला. या अपघातामध्ये धडक लागल्यानंतर वाळूचा ट्रक ट्रॅव्हलर्सचा पत्रा फाडत खाली कोसळला. यात चिमुकलीच्या मृत्यू झाला असून 24 जण जखमी झाले आहेत. टिप्परमधील पसरलेली वाळू अवैध उत्खनचा पुरावा देत आहे. अनुश्री काले (वय 9) असे मृत चिमुरडीचे नाव आहे.

अमरावती जिल्ह्याच्या धोतरखेडा येथील 25 जण ट्रॅव्हलरने ताडोबा येथे जंगल सफारीला जात होते. वेळा-इंजापूर शिवारातून जाताना हा अपघात झाला आहे. टिप्पर ट्रॅव्हलरवर आदळल्याने ट्रॅव्हलरच्या चालकाच्या बाजूचा पत्रा चिरत गेला. पत्रा फाटल्याने या बाजूला बसलेले प्रवाशी गंभीर जखमी झाले. अपघातानंतर नागरिक मदतीला धावले. जखमींना बाहेर काढत सेवाग्राम रुग्णालयाला पाठवले. यात उपचारा दरम्यान चिमुकलीच्या मृत्यू झाला.

अपघातास कारणीभूत भरधाव जाणारा वाळूचा ट्रक?

या अपघाताला वाळू वाहतूक करणारा ट्रक कारणीभूत ठरला आहे. जिल्ह्यातील वाळू घाटांवर उच्च न्यायालयाच्या आदेशाने उत्खनन थांबले असताना अवैध वाळू वाहतुकीने रस्त्यावरील लोकांचे जीव घेतला आहे. अवैधरित्या होत असलेली वाहतूक पोलिसांसह महसूल विभागाच्या वरदहस्ताने चालत आहे, असे म्हटले तर वावगे ठरणार नाही.

वाळू भरलेल्या ट्रकचा दुसरा बळी

वर्ध्यातील हिंगणघाट तालुक्यात महिन्याभरापूर्वी अशाच प्रकारे भरधाव वेगाने जाणाऱ्या ट्रकने आजीसोबत जात असलेल्या सहावीच्या वर्गातील विद्यार्थ्याला धडक दिली होती. या अपघातात त्याचा नाहक बळी गेला होता.