ठाणे - बाईक भरधाव वेगाने चालवून टिक-टॉक व्हिडीओ काढण्याच्या नादात एक तरुण गंभीर जखमी झाल्याची घटना समोर आली आहे. कल्याण-बदलापूर मार्गावरील बारवी डॅम परिसरातील रस्त्यावर घडली आहे. तसेच हा व्हिडीओ सोशल मीडियावर व्हायरल देखील होत आहे.
टिक टॉक व्हिडीओ काढण्यासाठी काही तरुण कल्याण-बदलापूर मार्गावरील बारवी धरण परिसरात गेले होते. यामधील एक तरुण भरधाव बाईकवर स्टंटबाजी करतानाचा टिक टॉक व्हिडीओ काढत होता. स्टंटबाजी करताना त्या तरुणाचा तोल गेला आणि बाईक जागेवर उलटली. एवढेच नाहीतर ती बाईक त्याच्या अंगावर पडली. या अपघात तरुण गंभीर जखमी झाला असून त्याला उपचारासाठी मुरबाडच्या शासकीय रुग्णालयात दाखल करण्यात आले आहे.
दरम्यान हा व्हिडीओ दोन दिवसांपूर्वीचा असल्याचे सांगितले जात आहे. सोशल मीडियावर हा व्हिडीओ व्हायरल झाला आहे. त्याआधारे मुरबाड पोलिसांनी जिवावर उदार होऊन स्टंटबाजी करणाऱ्या तरुणावर गुन्हा दाखल करण्याची प्रक्रिया सुरू केल्याचे सांगण्यात येत आहे.