नागपूर : मराठी भाषेच्या इतिहास प्रदर्शनात मराठी माणसांना मिळवलेले सर्वश्रेष्ठ पुरस्कार यामध्ये ज्ञानपीठ,भारतरत्न सारखे पुरस्कार प्राप्त महानुभावांचे फोटो लावण्यात आले आहेत. मराठी भाषा आणि महाराष्ट्राची संस्कृती यांचे संरक्षण, संगोपन आणि संवर्धन करण्याच्या हेतूने महाराष्ट्र शासनाने राज्य मराठी विकास संस्थेची स्थापना केली.
राज्य मराठी विकास संस्थेची स्थापना : १ मे, १९९३ पासून संस्थेच्या कामकाजास प्रत्यक्ष सुरुवात झाली. विविध क्षेत्रात मराठीचा होणारा वापर अधिकाधिक गुणवत्तापूर्ण होत जावा. मराठी भाषेच्या अधिवृध्दीची प्रक्रिया नियोजनपूर्वक गतिमान करण्यासाठी भाषा, संस्कृतीच्या क्षेत्रात मराठी भाषेच्या अभिवृध्दीसाठी काम करणाऱ्या विविध शासकीय, अशासकीय संस्थांमध्ये समन्वय राखून त्या संस्थांच्या सहाय्याने काही उपक्रम संस्था पार पाडते. त्याच अनुषंगाने मराठी भाषा विभागाकडून 96वे अखिल भारतीय मराठी साहित्य संमेलन वर्धा येथे प्रदर्शनी दालन सुरू करण्यात आले आहे.
मराठी विभागाची पोस्टकार्ड मोहीम : मराठी भाषेला अभिजात भाषेचा दर्जा मिळावा याकरिता मराठी भाषा विभागच्या राज्य मराठी विकास संस्थेकडून 96 व्या अखिल भारतीय मराठी साहित्य संमेलनात एक विशेष दालन सुरू करण्यात आले आहे. यामध्ये मराठीला अभिजात भाषेचा दर्जा मिळावा याकरिता लाखो पत्र महामहिम राष्ट्रपतींना पाठवले जात आहेत. साहित्य संमेलनात आलेले मराठी भाषा प्रेमी आवर्जून या दलनाला भेट देत आहेत. केंद्र सरकारने आजवर तमिळ, संस्कृत, तेलगु, कन्नड व मल्याळम या पाच भाषांना अभिजात भाषेचा दर्जा दिलेला आहे. या दर्जामुळे त्या भाषेच्या सर्वांगीण विकासासाठी केंद्र सरकारकडून भरीव अनुदान मिळते. भाषेची प्रतिष्ठा वाढते. भाषेच्या श्रेष्ठतेवर राजमान्यतेची मोहोर उमटते. भाषेच्या विकास कार्यास अधिक चालना मिळते. मराठीलाही हा दर्जा मिळावा अशी तमाम मराठी भाषकांची इच्छा आहे.
उपमुख्‍यमंत्र्यांची देवेंद्र फडणवीस उपस्‍थ‍िती : विदर्भ साहित्य संघाच्‍या शताब्‍दी वर्षानिमित्‍त विदर्भ साहित्य संघ आयोजित अखिल भारतीय मराठी साहित्य महामंडळाच्‍या वर्धा येथे सुरू असलेल्‍या 96 व्या अखिल भारतीय मराठी साहित्य संमेलनाला उपमुख्य मंत्री देवेंद्र फडणवीस उपस्थित झाले. आचार्य विनोबा भावे सभामंडपात ‘गांधीजी ते विनोबाजी वर्तमानाच्‍या परिप्रेक्ष्‍यातून’ परिसंवादला त्यांनी हजेरी लावली.
समारोपीय कार्यक्रमला नितीन गडकरी येणार : अखिल भारतीय मराठी साहित्य महामंडळाच्‍या वर्धा येथे सुरू असलेल्‍या 96 व्या अखिल भारतीय मराठी साहित्य संमेलनाचा आज शेवटचा दिवस आहे. साहित्य संमेलनाचा समारोपीय कार्यक्रम व खुले अधिवेशन आचार्य विनोबा भावे सभामंडपात होणार असून कार्यक्रमाला केंद्रीय मंत्री नितीन गडकरी यांची विशेष उपस्‍थ‍िती लाभणार आहे. याशिवाय संमेलनाध्‍यक्ष न्‍यायमूर्ती नरेंद्र चपळगावकर, स्‍वागताध्‍यक्ष दत्‍ता मेघे, सांस्कृतिक कार्य मंत्री सुधीर मुनगंटीवार, अ. भा. मराठी साहित्य महामंडळाच्‍या अध्‍यक्ष उषा तांबे, विदर्भ साहित्य संघाचे कार्याध्‍यक्ष प्रदीप दाते यांच्‍यासह अनेक मान्‍यवर उपस्थित राहणार आहे.
