मुंबई : मध्यरात्री फेसबुकवर एका पेजवरून शितल म्हात्रे आणि आमदार प्रकाश सुर्वे यांचा एक व्हिडिओ पोस्ट करण्यात आला. या व्हिडिओमध्ये शितल म्हात्रे आणि आमदार प्रकाश सुर्वे व मुख्यमंत्री एकनाथ शिंदे हे एका ओपन जीपमध्ये एका रॅलीच्या कार्यक्रमात दिसत आहेत. ही रॅली म्हणजे सध्या भाजप आणि शिवसेनेची सुरू असलेली आशीर्वाद यात्रा असल्याचा दावा व्हिडिओ पोस्ट करणाऱ्या फेसबुक हँडलवरून करण्यात आला आहे. या व्हिडिओमध्ये 'पप्पी दे पप्पी दे पारुला' हे गाणं देखील वाजत असल्याचे पाहायला मिळते. ज्या पेजवरून हा व्हिडिओ पोस्ट करण्यात आला होता, त्यामध्ये शिवसेना शिंदे गटावर अश्लील टीका करण्यात आल्याचा आरोप शितल म्हात्रे यांनी केला आहे.
कार्यकर्त्यांचा पोलीस ठाण्यात ठिय्या : हा व्हिडिओ मध्यरात्री मोठ्या प्रमाणात वायरल होताच शिवसेनेच्या कार्यकर्त्यांनी दहिसर पोलीस ठाणे गाठले. त्यांनी पोलीस ठाण्यातच ठिय्या दिला. यावेळी शिवसैनिकांनी हा व्हिडिओ व्हायरल करणाऱ्यांवर विनयभंगाचा गुन्हा दाखल करण्यात यावा, अशी मागणी पोलिसांकडे केली. मुख्यमंत्री एकनाथ शिंदे यांच्या उपस्थितीत दहिसर येथे एका रॅलीचे आयोजन करण्यात आले होते. या रॅलीमधला हा व्हिडिओ असल्याचा दावा सध्या समाज माध्यमांवर करण्यात येत आहे.
शीतल म्हात्रे यांची प्रतिक्रिया : या सर्व प्रकरणावर शिवसेनेच्या प्रवक्त्या शितल म्हात्रे यांनी देखील एक व्हिडिओ माध्यमांसाठी प्रसारित करत आपली प्रतिक्रिया दिली आहे. या व्हिडिओमध्ये शितल म्हात्रे यांनी म्हटले आहे की, राजकारणामधील महिलेसंदर्भात बोलण्यासारखे काही नसले, तर तिचे चारित्र्यहनन करणे हेच उद्ध्वस्त गटाचे संस्कार आहेत? मातोश्री नावाच्या फेसबुक पेजवरुन एका स्त्री संदर्भात असा मॉर्फ व्हिडीओ अपलोड करताना बाळासाहेबांचे संस्कार नाही का आठवले? अतिशय विकृत पध्दतीने माझी बदनामी करण्याकरिता समाजमाध्यमांवर प्रसारित केलेल्या व्हिडीओ बनवणाऱ्या आणि प्रसारित करणाऱ्या व्यक्तींविरोधात तसेच मातोश्री या फेसबुक पेज विरोधात दहिसर पोलिस ठाण्यात रितसर गुन्हा दाखल करण्यात आला आहे.
