कोल्हापूर Hunger Strike : कोल्हापूर जिल्ह्यातील सुमारे तीन लाख शेतकऱ्यांपैकी अवघ्या एक लाख वीस हजार शेतकऱ्यांना महात्मा फुले शेतकरी कर्जमुक्ती योजनेचा लाभ मिळाला आहे. पात्र असूनही जिल्ह्यातील अनेक शेतकऱ्यांना कागदपत्रांची पूर्तता केली नसल्याच्या अटीवरून अपात्र करण्यात आलंय. या विरोधात आता महाराष्ट्र नवनिर्माण सेनेने आक्रमक भूमिका घेतली आहे. जिल्हा उपनिबंधक कार्यालयासमोर शेतकऱ्यांच्या मागण्यांसाठी बेमुदत उपोषण सुरू आहे. मागण्या मान्य न झाल्यास मनसे स्टाईलने खळखट्याक आंदोलन करण्याचा इशारा, मनसे पदाधिकाऱ्यांनी दिलाय.
मनसे स्टाईलने करणार खळखट्यात आंदोलन : राज्य सरकारने पीक कर्जाची प्रामाणिकपणे परतफेड करणाऱ्या शेतकऱ्यांना जाहीर केल्याप्रमाणे प्रोत्साहनपर अनुदानाची रक्कम देण्याच्या मागणीसाठी महाराष्ट्र नवनिर्माण सेनेच्या वतीनं सहकार विभागाच्या सहनिबंधक कार्यालयासमोर शुक्रवारपासून बेमुदत उपोषणास सुरू केलंय. या आंदोलनाचा आजचा चौथा दिवस असल्याने, अजूनही संबंधित विभागाने महाराष्ट्र नवनिर्माण सेनेच्या आंदोलनाची दखल घेतली नसल्यानं मनसे पदाधिकारी आक्रमक झाले आहेत. शेतकऱ्यांना महात्मा फुले कर्जमुक्ती योजनेपासून वंचित ठेवणाऱ्या अधिकाऱ्यांवर तत्काळ कारवाई करावी, अन्यथा मनसे स्टाईलने खळखट्यात आंदोलन करण्याचा इशारा सहकार सेनेचे महाराष्ट्र प्रदेशाध्यक्ष दिलीप धोत्रे यांनी दिला.
आंदोलनस्थळी लक्षवेधी फलक : पुसलेल्या कपाळाचं कुंकू, तुटलेल्या हातातील बांगड्या, हरपलेले बापाचे छत्र अन् लेकरांच्या विरहाच्या वेदना आता तरी थांबणार का?, 'कोरड्या भूमीच्या भेगांनी माईला गिळलं, अश्रूनी तिच्या भेगांना भिजवून टाकलं, माय बापाविना पोरकं ढोरासारख जगतं, जगण्यासाठीच मायबाप हात अनुदानासाठी पसरत', 'कोरड्या दुष्काळानं शेतकऱ्यांच्या सुखलेल्या घशाची सरसकट प्रोत्साहनपर अनुदान देऊन तहान भागवलीच पाहिजे', असं उपोषणाच्या ठिकाणी लावलेले फलक लक्ष वेधून घेत आहेत.
हेही वाचा -
