हिंगोली - वलाना येथील एका तरुण शेतकऱ्याने खडकाळ जमिनीत शेवग्याचे आणि टरबूजाचे पीक यशस्वीरीत्या घेतले आहे. सेनगाव तालुक्यातील या शेतकऱ्याच्या मेहनतीमुळे त्याच्या शेतातील शेवग्याला भरघोस शेंगा लगडल्या आहेत. या शेवगा पिकात आंतरपीक म्हणून त्याने टरबूजाचे पीक घेतले आहे. संजय वाकोडे (रा. वलाना जि. हिंगोली) असे या तरुण शेतकऱ्याचे नाव आहे.
शेतामध्ये शेवग्याच्या शेंगा व टरबुजाच्या वेलींना चांगल्या दर्जाचे टरबूज लगडलेली आहेत. त्यामुळे खडकाळ जमिनीमध्ये कष्ट केल्याचे चीज वाटत असल्याचे शेतकरी संजय वाकोडे सांगतात. सध्या कोरोनाची साथ सुरू असल्याने ही फळे व शेंगा विक्री करण्यासाठी बाजारपेठेमध्ये प्रचंड अडचण निर्माण होत आहे. ग्राहकांचाही फारसा प्रतिसाद मिळत नसल्यामुळे याचा फटका चांगलाच सहन करावा लागत असल्याचे वाकोडे यांनी सांगितले.
शेतात शेवगा व टरबूज पीक लहानाचे मोठे करण्यासाठी अहोरात्र केलेल्या कष्टाचे चीज झाल्याचे समाधान वाटत असल्याचे वाकोडे सांगतात. अकोला, वाशिम, कारंजा, मुंबई, परभणी, रिसोड येथेही ह्या शेवग्याच्या शेंगा विक्रीसाठी जातात. मागील वर्षी देखील चांगले उत्पादन झाले होते. मात्र, कोरोनामुळे नुकसान सहन करावे लागले. एवढे झालेले असले तरी दोन ते तीन लाख रुपये या हंगामात मिळाले. यामुळे नफा-तोटा समसमान झाला आहे. यंदा दोन लाखांच्या नफ्याची अपेक्षा असल्याचे शेतकरी वाकोडे यांनी सांगितले.