आरोग्य विभागाच्या परीक्षेत गैरप्रकाराचा आरोप, एमपीएससीकडून परीक्षा घेण्याची बुलडाण्यातील विद्यार्थ्यांची मागणी

बुलडाणा : आरोग्य विभागातील पदभरतीसाठी घेण्यात आलेल्या परीक्षेत गैरप्रकार झाल्याच्या आरोप करत ही परीक्षा रद्द करून एमपीएससीमार्फत परीक्षा घेण्याची मागणी बुलडाण्यातील परीक्षार्थ्यांनी मंगळवारी जिल्हाधिकाऱ्यांकडे केली आहे.
54 पदांच्या 8 हजार 500 जागांसाठी आहे भरती
राज्य सरकारच्या आरोग्य विभागातील 54 विविध पदांच्या 8 हजार 500 जागांच्या भरतीसाठी महाआयटीमार्फत नेमण्यात आलेल्या खाजगी कंपनीकडून राज्यभरात 28 फेब्रुवारी रोजी लेखी परीक्षा घेण्यात आली. या परीक्षेत अनेक परिक्षा केंद्रांवर गैरप्रकार झाल्याच्या आरोप विद्यार्थ्यांनी केला आहे. परीक्षेदरम्यान काही ठिकाणी डमी उमेदवारांना पकडण्यात आले. तर काही परीक्षा केंद्रांवर प्रश्नपत्रिका एक ते दिड तास उशिराने मिळाली. नागपूर येथील केंद्रावरील परीक्षा सुरू होण्याच्या आधीच पेपर फुटल्याची तक्रार असल्याचे विद्यार्थ्यांचे म्हणणे आहे.

भरतीत भष्ट्राचार असल्याचा विद्यार्थ्यांचा संशयया भरतीत भष्ट्राचार असल्याचा संशय असून ही परीक्षा रद्द करून तत्काळ एमपीएससीमार्फत परीक्षा घेण्यात यावी. तसेच 28 फेब्रुवारी रोजी झालेल्या गैरप्रकाराची चौकशी करून दोषींवर कारवाई करावी अशी मागणी बुलडाण्यातील विद्यार्थ्यांनी जिल्हाधिकाऱ्यांकडे केली आहे. यावेळी पंकज जाधव, सुमित गायकवाड, आकाश इंगळे, निलेश हिवाळे, अमोल मानवतकर, अनिल एकडे, अक्षय मोरे, अजय गवई, लक्षकराज नाईक, राहुल खरे, अमित गायकवाड, प्रफुल्ल पवार, संदीप जाधव, शेख समोर, ऋषिकेश मानवतवकर, समीप अगमकर उपस्थित होते.