Sharad Pawar : भाजपाविरोधातील एल्गार बीडमधून; स्वाभिमानी असाल तर फोटो वापरू नका

बीडमध्ये शरद पवार यांच्या सभेपूर्वी बॅनर लावण्यात आले आहेत. त्यामुळे कार्यकर्त्यांमध्ये संभ्रम निर्माण झाला आहे. या बॅनरवरुन शरद पवार गटाचे युवक प्रदेशाध्यक्ष मेहबूब शेख यांनी टीकास्त्र सोडले आहे. तुम्हाला शरद पवारांचे आशीर्वाद हवे असतील तर परत राष्ट्रवादीची वाट धरा, असा हल्लाबोल अजित पवार गटावर मेहबूब शेख यांनी केला आहे.

बीड : राष्ट्रवादी काँग्रेसचे अध्यक्ष शरद पवारांचा महाराष्ट्र दौरा 17 ऑगस्टपासून सुरू होत आहे. राज्याचे कृषीमंत्री धनंजय मुंडे यांच्या बीडमध्ये पवारांची सभा होणार असल्याने बॅनरबाजी पाहायला मिळत आहे. त्यामुळे शहरात लावण्यात आलेल्या बॅनरवरून शरद पवार गटाचे युवक प्रदेशाध्यक्ष मेहबूब शेख यांनी उपमुख्यमंत्री अजित पवार गटावर जोरदार टीका केली आहे. अजित पवार गटाचे कार्यकर्ते स्वाभिमानी असतील तर त्यांनी पवारांचे फोटो वापरु नये, असे शेख यांनी म्हटले आहे. शरद पवार यांना भारतीय जनता पक्षाच्या विरोधात लढाई लढायची आहे, त्यासाठी त्यांनी मराठवाड्याची निवड केली. त्यांतच त्यांनी मराठवाड्यातील बीड जिल्ह्याला प्राधान्य दिल्याने कार्यकर्त्यांमध्ये आनंदाचे वातावरण आहे.

स्वाभिमानी असाल तर फोटो वापरू नका : अजित पवार गटाने बॅनरवर माझे फोटो वापरू नये असे सांगितले होते, तरीदेखील शरद पवारांचे फोटो अजित पवार गटाचे कार्यकर्ते वापरत आहेत. जर अजित पवार गटाचे कार्यकर्ते स्वाभिमानी असतील तर त्यांनी पवारांचे फोटो वापरु नयेत. कृषीमंत्री धनंजय मुंडे एका कार्यक्रमामध्ये म्हणाले की, शरद पवार आमच्यासाठी देव आहेत. जर शरद पवार देव असतील, तर त्यांना सोडून का गेलात, असा सवाल शेख यांनी विचारला आहे. भक्त कधीही देवाला सोडून जात नाहीत. बीड जिल्हा शरद पवारांच्या मागे आहे. आगामी निवडणुकांत राज्यात राष्ट्रवादीची सत्ता येईल, असा दावा देखील शेख यांनी केला आहे.

पवारांचे अशीर्वाद हवे असतील तर घरवापसी : 1999 पासून शरद पवारांनी तुम्हाला आशीर्वाद दिले होते. त्यामुळे अजित पवार गटाने राष्ट्रवादी काँग्रेसमध्ये बंड करण्याची गरज नव्हती. तुम्ही शरद पवारांना सोडून गेले आहात. आता तेथून तुम्ही आशीर्वाद मागत आहात. राष्ट्रवादीत बंड केल्यानंतर शरद पवारांनी त्यांची भूमिका स्पष्ट केली आहे. जर अजित पवार गटाला शरद पवारांचे अशीर्वाद हवे असतील, तर त्यांनी भाजपाला सोडचिठ्ठी देत पुन्हा घरवापसी करावी, असे देखील शेख यांनी म्हटले आहे.

हेही वाचा -