ന്യൂഡല്‍ഹി: ഇന്ത്യയും അഫ്‌ഗാനിസ്ഥാനും (India vs Afghanistan) ഏകദിന ലോകകപ്പില്‍ (Cricket World Cup 2023) മുഖാമുഖം പോരടിക്കാനെത്തിയപ്പോള്‍ എല്ലാവരുടെയും ശ്രദ്ധ പോയത് വിരാട് കോലി (Virat Kohli) നവീന്‍ ഉള്‍ ഹഖ് (Naveen Ul Haq) എന്നിവരിലേക്കായിരുന്നു. ഐപിഎല്ലില്‍ ഇരുവരും തമ്മിലുണ്ടായ കൊമ്പുകോര്‍ക്കലും പിന്നീട് ആ സംഭവത്തില്‍ ലഖ്‌നൗ സൂപ്പര്‍ ജയന്‍റ്‌സ് ടീം മെന്‍ററായ ഗൗതം ഗംഭീര്‍ ഇടപെട്ടതുമെല്ലാം ആരാധകര്‍ മറന്നിട്ടില്ല. ഇക്കഴിഞ്ഞ ഐപിഎല്ലില്‍ ഏകന സ്റ്റേഡിയത്തില്‍ നടന്ന ലഖ്‌നൗ സൂപ്പര്‍ ജയന്‍റ്‌സ് (Lucknow Super Giants) റോയല്‍ ചലഞ്ചേഴ്‌സ് ബാംഗ്ലൂര്‍ (Royal Challengers Bangalore) മത്സരത്തിന് ശേഷമായിരുന്നു താരങ്ങള്‍ തമ്മിലുടക്കിയത്.
ഈ സംഭവത്തിന് ശേഷം നവീന്‍ ഉള്‍ ഹഖ് കളിക്കാന്‍ ഇറങ്ങിയ ഗ്രൗണ്ടുകളിലെല്ലാം കോലി ചാന്‍റുകള്‍ ഉയരുന്നതും പതിവായി. ഇന്ത്യയുടെ മുന്‍ താരം ഗൗതം ഗംഭീറിനെതിരെയും ആരാധകരുടെ കോലി ആരവങ്ങള്‍ പതിവായി തന്നെ ഉയര്‍ന്നുകേട്ടിരുന്നു. ഇതൊക്കെ കൊണ്ടാണ് വീണ്ടും ഇരു താരങ്ങളും തമ്മില്‍ നേര്‍ക്കുനേര്‍ എത്തുമ്പോള്‍ കളിക്കളത്തില്‍ എന്ത് സംഭവിക്കുമെന്ന് കണ്ടറിയാന്‍ ആരാധകര്‍ കാത്തിരുന്നത്.
ഇന്നലെ വീണ്ടും നേര്‍ക്കുനേര്‍ വന്നപ്പോള്‍ പഴയ കാര്യങ്ങള്‍ മറന്ന് ചേര്‍ന്നുനില്‍ക്കാനാണ് ഇരു താരങ്ങളും ശ്രമിച്ചത്. അഫ്‌ഗാന്‍ ഇന്നിങ്സില്‍ നവീന്‍ ബാറ്റ് ചെയ്യാനെത്തിയപ്പോഴും ഇന്ത്യയ്‌ക്കെതിരെ താരം പന്തെറിയാനെത്തിയപ്പോഴും കോലി ചാന്‍റുകള്‍ ഗാലറിയില്‍ ഉയര്‍ന്നു. എന്നാല്‍, ഗ്രൗണ്ടിലുണ്ടായിരുന്ന വിരാട് കോലി, ആരാധകരോട് ഇത് അവസാനിപ്പിക്കാന്‍ ആവശ്യപ്പെടുകയായിരുന്നു.
ഇതിന് പിന്നാലെ കളിക്കളത്തില്‍ നിന്നും ഇരു താരങ്ങളും കൈ കൊടുത്താണ് പിരിഞ്ഞത്. ഈ സമയം കമന്‍ററി ബോക്‌സിലുണ്ടായിരുന്ന ഗൗതം ഗംഭീര്‍ ഇരു താരങ്ങളുടെയും പെരുമാറ്റത്തില്‍ പ്രതികരണം നടത്തുകയും ചെയ്‌തിരുന്നു. മൈതാനത്തില്‍ പോരടിച്ചോളൂ എന്നാല്‍, മൈതാനത്തിന് പുറത്തേക്ക് അതൊന്നും വേണ്ട എന്നായിരുന്നു ഗൗതം ഗംഭീര്‍ പറഞ്ഞത് (Gautam Gambhir Reacts on Hug Between Virat Kohli and Naveen ul Haq).
'കളിക്കളത്തിന് ഉള്ളിലാണ് അല്ലാതെ പുറത്തല്ല പരസ്‌പരം പോരാടേണ്ടത്. ഓരോ താരത്തിനും തന്‍റെ ടീമിനായി മികച്ച പ്രകടനം നടത്താന്‍ അവകാശമുണ്ട്. ഏത് രാജ്യത്തിനായി കളിക്കുന്ന ആളാണ് എന്നോ അയാള്‍ എത്ര മികച്ചവന്‍ ആണെന്നോ എന്നത് അവിടെ പ്രസക്തമല്ല. ഇന്ത്യ അഫ്‌ഗാനിസ്ഥാന്‍ മത്സരത്തിനിടെ നവീനും വിരാട് കോലിയും തമ്മിലുണ്ടായ പെരുമാറ്റത്തില്‍ നിന്നും അവര്‍ തമ്മിലുള്ള പ്രശ്‌നങ്ങളെല്ലാം അവസാനിച്ചെന്ന് മനസിലാക്കാന്‍ കഴിയും.
കളിക്കളത്തിലെ പെരുമാറ്റത്തിന്‍റെ പേരില്‍ ഏതെങ്കിലും ഒരു താരത്തെ ട്രോളുകയോ പരിഹസിക്കുകയോ ചെയ്യരുതെന്നാണ് ആരാധകരോട് എനിക്ക് പറയാനുള്ളത്. തങ്ങളുടെ രാജ്യത്തിനായി കളിക്കുമ്പോള്‍ അത്രത്തോളം ആവേശത്തോടെയാകും ഓരോരുത്തരും കളിക്കാനിറങ്ങുക. അഫ്‌ഗാനിസ്ഥാന്‍ പോലെ ഒരു രാജ്യത്ത് നിന്നും ഐപിഎല്‍ പോലൊരു വലിയ വേദിയില്‍ കളിക്കാന്‍ അവസരം ലഭിക്കുക എന്നത് നവീനെ പോലൊരു താരത്തിന് വലിയൊരു കാര്യമാണ്' ഗംഭീര്‍ പറഞ്ഞു.
