നാരായൺഖേഡ് (തെലങ്കാന): വഴിയില്‍ കളഞ്ഞുകിട്ടിയ പേഴ്‌സ് രണ്ട് രീതിയില്‍ ഉപയോഗിക്കുന്നവരുണ്ട്. ഒന്ന് ആരുടെയും കണ്ണില്‍പ്പെടാതെ പേഴ്‌സിലെ പണം സ്വന്തം ആവശ്യത്തിന് ഉപയോഗിക്കുന്നവരും, മറ്റൊന്ന്, ഉടമസ്ഥന്‍റെ കയ്യില്‍ തിരിച്ചേല്‍പ്പിച്ച് മാതൃകയാകുന്നവരും. എന്നാല്‍, കളഞ്ഞുകിട്ടിയ പേഴ്‌സിലൂടെ ജീവന്‍ രക്ഷിച്ച് ഏവരുടെയും പ്രശംസയ്‌ക്ക് അര്‍ഹനായിരിക്കുകയാണ് രവീന്ദര്‍ എന്ന ആര്‍ടിസി ബസ് കണ്ടക്‌ടര്‍.
ഇന്നലെ ഉച്ചയ്‌ക്ക് ശേഷം സങ്കരറെഡി ജില്ലയില്‍ നിന്നും പുറപ്പെട്ട ആര്‍ടിസി ബസ് സെക്കന്തരാബാദ് ജെബിഎസ് സ്‌റ്റോപ്പിലെത്തിയപ്പോള്‍ യാത്രക്കാര്‍ പുറത്തിറങ്ങുന്ന നേരം ബസിനുള്ളില്‍ നിന്നും കണ്ടക്‌ടര്‍ക്ക് ഒരു പേഴ്‌സ് കളഞ്ഞുകിട്ടി. പേഴ്‌സിന്‍റെ ഉടമസ്ഥന്‍ ആരെന്നറിയാനായി കണ്ടക്‌ടര്‍ രവീന്ദ്രന്‍ പേഴ്‌സ് തുറന്നപ്പോള്‍ അതിനുള്ളില്‍ നിന്ന് 403 രൂപയും ഒരു കത്തും കണ്ടു. ഞെട്ടലോടെയായിരുന്നു രവീന്ദ്രന്‍ കത്ത് വായിച്ചത്.
വിവാഹം കഴിക്കാന്‍ താത്‌പര്യമില്ലാത്തതിനാല്‍ മരിക്കാന്‍ പോകുന്നു എന്നായിരുന്നു കത്തില്‍ എഴുതിയിരുന്നത്. പേഴ്‌സില്‍ ഉടമയുടെ ആധാര്‍ കാര്‍ഡും കണ്ടെത്തി. ഉടന്‍ തന്നെ ഇയാള്‍ വിഷയം ആര്‍ടിസി എംഡി സഞ്ജനാരുടെ ശ്രദ്ധയില്‍പെടുത്തി.
ഉടന്‍ തന്നെ ആത്മഹത്യക്കുറിപ്പിന്‍റെ ചിത്രവും ആധാര്‍ കാര്‍ഡും ട്വിറ്റര്‍ വഴി പങ്കുവച്ചു. സംഭവം ശ്രദ്ധയില്‍പ്പെട്ട എംഡി ഉടന്‍ തന്നെ പ്രതികരിക്കുകയും പേഴ്‌സിന്‍റെ ഉടമയായ യുവതിയെ കണ്ടെത്തുവാന്‍ ആവശ്യപ്പെടുകയും ചെയ്‌തു. ആര്‍ടിസി എസ്‌ഐ ദയാനന്തിന്‍റെയും മരേട്‌പള്ളി പൊലീസിന്‍റെയും സഹായത്താല്‍ യുവതിയെ കണ്ടെത്തി കുടുംബാംഗങ്ങളെ ഏല്‍പ്പിച്ചു.
ആര്‍ടിസി ചെയര്‍മാന്‍ ഗേവിന്ദന്‍, എംഡി സഞ്ജനാര്‍ തുടങ്ങിയവര്‍ കണ്ടക്‌ടര്‍ രവീന്ദ്രന്‍റെ സമയോചിതമായ ഇടപെടലിന് നന്ദിയറിക്കുകയും അഭിനന്ദനമറിയിക്കുകയും ചെയ്‌തു.
