ರಾಜ್ಕೋಟ್(ಗುಜರಾತ್): ಭಾರತ ತಂಡದ ಸ್ಪಿನ್ ಮಾಂತ್ರಿಕ ರವಿಚಂದ್ರನ್ ಅಶ್ವಿನ್ ಟೆಸ್ಟ್ ಕ್ರಿಕೆಟ್ನಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಿದ್ದಾರೆ. 500 ವಿಕೆಟ್ಗಳನ್ನು ಕಿತ್ತು ವಿಶ್ವದಾಖಲೆ ನಿರ್ಮಿಸಿದ್ದಾರೆ. ಅತೀ ಕಡಿಮೆ ಪಂದ್ಯ ಮತ್ತು ಎಸೆತಗಳಲ್ಲಿ 500 ವಿಕೆಟ್ಗಳ ಶಿಖರವೇರಿದ ವಿಶ್ವದ ಎರಡನೇ ಬೌಲರ್ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದಾರೆ.
ಇಲ್ಲಿನ ಸೌರಾಷ್ಟ್ರ ಕ್ರಿಕೆಟ್ ಮೈದಾನದಲ್ಲಿ ನಡೆಯುತ್ತಿರುವ ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಮೂರನೇ ಪಂದ್ಯದಲ್ಲಿ ಬ್ಯಾಟರ್ ಝಾಕ್ ಕ್ರಾಲಿ ಅವರ ವಿಕೆಟ್ ಪಡೆಯುವ ಮೂಲಕ ಅನುಭವಿ ಸ್ಪಿನ್ನರ್ ಅಶ್ವಿನ್ 500 ವಿಕೆಟ್ಗಳ ಗುರಿ ಮುಟ್ಟಿದರು. ಟೆಸ್ಟ್ ಕ್ರಿಕೆಟ್ನಲ್ಲಿ ಈ ಸಾಧನೆ ಮಾಡಿದ ವಿಶ್ವದ 9ನೇ ಬೌಲರ್ ಆಗಿದ್ದಾರೆ. ಭಾರತದ ಪರ ಅನಿಲ್ ಕುಂಬ್ಳೆ ನಂತರ 500ರ ಗಡಿದಾಟಿದ ಎರಡನೇ 'ಸ್ಪಿನ್' ಜಾದೂಗಾರ ಅಶ್ವಿನ್. ಅದರಲ್ಲೂ, ಅತೀ ಕಡಿಮೆ ಪಂದ್ಯ ಹಾಗೂ ಎಸೆತಗಳಲ್ಲಿ ಈ ಮೈಲಿಗಲ್ಲು ಸ್ಥಾಪಿಸಿದ ಜಗತ್ತಿನ ಎರಡನೇ ಬೌಲರ್ ಎಂಬ ವಿಶೇಷ ಶ್ರೇಯಸ್ಸಿಗೂ ರವಿಚಂದ್ರನ್ ಭಾಜನರಾಗಿದ್ದಾರೆ.
ಆಸ್ಟ್ರೇಲಿಯಾದ ವೇಗಿ ಗ್ರೆನ್ ಮೆಕ್‌ಗ್ರಾತ್ ಟೆಸ್ಟ್ ಕ್ರಿಕೆಟ್ನಲ್ಲಿ 25,528 ಎಸೆತಗಳನ್ನು ಎಸೆದು 500 ವಿಕೆಟ್ಗಳನ್ನು ಪಡೆದು ಅಗ್ರ ಸ್ಥಾನದಲ್ಲಿದ್ಧಾರೆ. ಈಗ ಆರ್.ಅಶ್ವಿನ್ 25,714 ಬಾಲ್ಗಳಲ್ಲಿ 500 ವಿಕೆಟ್ ಕಿತ್ತು ಅತೀ ಕಡಿಮೆ ಎಸೆತಗಳಲ್ಲಿ ಈ ಸಾಧನೆ ತೋರಿದ ಎರಡನೇ ಬೌರಲ್ ಆಗಿ ಹೊರಹೊಮ್ಮಿದ್ದಾರೆ. ನಂತರದಲ್ಲಿ ಇಂಗ್ಲೆಂಡ್ನ ಮಧ್ಯಮ ವೇಗಿಗಳಾದ ಜೇಮ್ಸ್ ಆ್ಯಂಡರ್ಸನ್ (28,150 ಎಸೆತ), ಸ್ಟುವರ್ಟ್ ಬ್ರಾಡ್ (28,430 ಎಸೆತ) ಹಾಗೂ ವೆಸ್ಟ್ ಇಂಡೀಸ್ನ ಕರ್ಟ್ನಿ ವಾಲ್ಶ್ (28,833 ಎಸೆತ) ಸ್ಥಾನ ಹೊಂದಿದ್ದಾರೆ.
ಅದೇ ರೀತಿ ಅತೀ ಕಡಿಮೆ ಪಂದ್ಯಗಳಲ್ಲಿ 500 ವಿಕೆಟ್ಗಳನ್ನು ಜಗತ್ತಿನ ಬೌಲರ್ಗಳಲ್ಲಿ ಅಶ್ವಿನ್ ಎರಡನೇ ಸ್ಥಾನಕ್ಕೆ ಏರಿದ್ದಾರೆ. ಶ್ರೀಲಂಕಾದ ಸ್ಪಿನ್ ಮಾಂತ್ರಿಕ ಮುತ್ತಯ್ಯ ಮುರಳೀಧರನ್ 87 ಟೆಸ್ಟ್ ಪಂದ್ಯಗಳಲ್ಲಿ ಐದುನೂರು ವಿಕೆಟ್ ಪಡೆದು ಈ ಪಟ್ಟಿಯಲ್ಲಿ ಅಗ್ರ ಸ್ಥಾನದಲ್ಲಿದ್ಧಾರೆ. ಈಗ ಆರ್.ಅಶ್ವಿನ್ 98 ಪಂದ್ಯದಲ್ಲಿ ಈ ದಾಖಲೆ ಬರೆದಿದ್ದಾರೆ.
ಭಾರತದ ಮತ್ತೊಬ್ಬ ಬೌಲರ್ ಕುಂಬ್ಳೆ 105 ಪಂದ್ಯಗಳಲ್ಲಿ 500 ವಿಕೆಟ್ಗಳ ಸಾಧನೆ ಪೂರೈಸಿದ್ದರು. ಇದರ ನಂತರದ ಸ್ಥಾನಗಳನ್ನು ಕ್ರಮವಾಗಿ ಆಸ್ಟ್ರೇಲಿಯಾದ ದಿಗ್ಗಜ ಬೌಲರ್ಗಳಾದ ಶೇನ್ ವಾರ್ನ್ (108 ಪಂದ್ಯ) ಮತ್ತು ಮೆಕ್‌ಗ್ರಾತ್ (110 ಪಂದ್ಯ) ಹೊಂದಿದ್ದಾರೆ. ಆರ್.ಅಶ್ವಿನ್ ತಮ್ಮ ಮೊದಲ 16 ಟೆಸ್ಟ್ ಪಂದ್ಯಗಳಲ್ಲಿ ಒಂಬತ್ತು ಬಾರಿ ಐದು ವಿಕೆಟ್ಗಳ ಗೊಂಚಲು ಪಡೆದ ಸಾಧನೆ ಹೊಂದಿದ್ಧಾರೆ. ಅಲ್ಲದೇ, ವೇಗವಾಗಿ ಎಂದರೆ 54 ಪಂದ್ಯದಲ್ಲೇ 300 ವಿಕೆಟ್ಗಳ ಕ್ಲಬ್ಗೆ ಸೇರಿದ್ದರು.
ಇದನ್ನೂ ಓದಿ: 3ನೇ ಟೆಸ್ಟ್: ರೋಹಿತ್ ಆಕರ್ಷಕ ಶತಕ, ಸಿಕ್ಸರ್ನಲ್ಲಿ ಧೋನಿ ಹಿಂದಿಕ್ಕಿದ ಹಿಟ್ಮ್ಯಾನ್
