ಹೈದರಾಬಾದ್: ’’ಯಶಸ್ವಿ ಜೈಸ್ವಾಲ್ 'ಡಬಲ್' ಸೆಂಚುರಿ , ಸರ್ಫರಾಜ್ ಖಾನ್ ಡಬಲ್ ಫಿಫ್ಟಿ, ಧ್ರುವ ಜುರೆಲ್ ಬ್ಯಾಟಿಂಗ್, ಕೀಪಿಂಗ್ನಲ್ಲಿ ಮಿಂಚು.. ಇವರು ಇಂಗ್ಲೆಂಡ್ ವಿರುದ್ಧದ ಮೂರನೇ ಟೆಸ್ಟ್ ಪಂದ್ಯದ ಗೆಲುವಿನ ರೂವಾರಿಗಳು. ಟೀಂ ಇಂಡಿಯಾದ ಇಂದಿನ ಪ್ರತಿಭೆಗಳು‘‘.
ಹೀಗೆಂದು ಭಾರತ ಕ್ರಿಕೆಟ್ ತಂಡದ ನಾಯಕ ರೋಹಿತ್ ಶರ್ಮಾ ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಸ್ಟೋರಿ ಹಂಚಿಕೊಂಡಿದ್ದಾರೆ. ಜೊತೆಗೆ ತಾವು, ರವೀಂದ್ರ ಜಡೇಜಾ ಶತಕ ಮತ್ತು ಶುಭ್ಮನ್ ಗಿಲ್ ಅರ್ಧಶತಕದ ಹೊರತಾಗಿಯೂ ಗೆಲುವಿನ ಕ್ರೆಡಿಟ್ ಅನ್ನು ಈ ಮೂವರು ಯುವ ಆಟಗಾರರಿಗೆ ನೀಡಿದ್ದಾರೆ. ರಾಜ್‌ಕೋಟ್‌ನ ನಿರಂಜನ್ ಶಾ ಸ್ಟೇಡಿಯಂನಲ್ಲಿ ನಡೆದ ಟೆಸ್ಟ್ ಪಂದ್ಯದಲ್ಲಿ ಪ್ರವಾಸಿ ಇಂಗ್ಲೆಂಡ್ ವಿರುದ್ಧ ಬಹುದೊಡ್ಡ ವಿಜಯ ಸಾಧಿಸಲು ಕಾರಣೀಭೂತರಾದ ಮೂವರು ಯುವ ಕ್ರಿಕೆಟಿಗರನ್ನು ರೋಹಿತ್ ಶರ್ಮಾ ಹಾಡಿ ಹೊಗಳಿದ್ದಾರೆ.
ತಮ್ಮ ಇನ್ಸ್ಟಾಗ್ರಾಮ್ ಖಾತೆಯ ಸ್ಟೋರಿಯಲ್ಲಿ ಎರಡು ಫೋಟೋಗಳ ಕೊಲಾಜ್ ಅನ್ನು ಹಂಚಿಕೊಂಡು ಅದಕ್ಕೆ 'ಯೇ ಆಜ್ಕಲ್ ಕೆ ಬಚ್ಚೆ'(ಈ ದಿನದ ಹುಡುಗರು) ಎಂದು ಒಕ್ಕಣೆ ನೀಡಿದ್ದಾರೆ. ಜೈಸ್ವಾಲ್ ದ್ವಿಶತಕ ಸಂಭ್ರಮದಲ್ಲಿ ಸರ್ಫರಾಜ್ ಭಾಗಿಯಾಗಿರುವುದು, ಬೆನ್ ಡಕೆಟ್ರನ್ನು ಮಿಂಚಿನ ವೇಗದಲ್ಲಿ ರನೌಟ್ ಮಾಡಿದ ಜುರೆಲ್ರ ಚಿತ್ರವುಳ್ಳ ಸ್ಟೋರಿ ಇದಾಗಿದೆ. ಇದಕ್ಕೆ ಅಭಿಮಾನಿಗಳು ಕೂಡ ಮೆಚ್ಚುಗೆ ಸೂಚಿಸಿದ್ದಾರೆ.
ಪಂದ್ಯದಲ್ಲಿ ಎಡಗೈ ದಾಂಡಿಗ ಜೈಸ್ವಾಲ್ ಔಟಾಗದೆ 224 ರನ್ ಸಿಡಿಸಿದರು. ಜೊತೆಗೆ 214 ರನ್ ಗಳಿಸಿದ ವೇಳೆ ಹಲವು ದಾಖಲೆಗಳನ್ನು ಮುರಿದರು. ವಿನೋದ್ ಕಾಂಬ್ಳಿ ಮತ್ತು ವಿರಾಟ್ ಕೊಹ್ಲಿ ನಂತರ ಸತತ ಎರಡು ದ್ವಿಶತಕಗಳನ್ನು ಸಿಡಿಸಿದ ಮೂರನೇ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಭಾರತದ ಮಾಜಿ ನಾಯಕ ಸೌರವ್ ಗಂಗೂಲಿ ಪಾಕಿಸ್ತಾನ ವಿರುದ್ಧದ ಸರಣಿಯಲ್ಲಿ 2007 ರಲ್ಲಿ 534 ರನ್ ಗಳಿಸಿದ್ದು, ಅದನ್ನು ಜೈಸ್ವಾಲ್ ಮುರಿದರು. ಸರಣಿಯೊಂದರಲ್ಲಿ 500 ಕ್ಕೂ ಹೆಚ್ಚು ರನ್ ಗಳಿಸಿದ ಭಾರತದ ಎರಡನೇ ಬ್ಯಾಟರ್ ಎನಿಸಿಕೊಂಡರು. 3 ಪಂದ್ಯಗಳಿಂದ 20 ಸಿಕ್ಸರ್ ಸಿಡಿಸಿ ಸರಣಿಯಲ್ಲಿ ಅತ್ಯಧಿಕ ಸಿಕ್ಸರ್ ಬಾರಿಸಿದ ಭಾರತದ ಮೊದಲ ಬ್ಯಾಟರ್ ಕೂಡ ಆದರು.
ಮತ್ತೊಂದೆಡೆ, ಸೆನ್ಸೇಷನಲ್ ಬ್ಯಾಟರ್ ಸರ್ಫರಾಜ್ ಸಿಕ್ಕ ಅವಕಾಶವನ್ನು ಬಾಚಿ ತಬ್ಬಿಕೊಂಡರು. ಎರಡೂ ಇನಿಂಗ್ಸ್ನಲ್ಲಿ ತಮ್ಮ ತೋಳ್ಬಲವನ್ನು ತೋರಿಸಿ ಎರಡು ಅರ್ಧಶತಕ ಸಿಡಿಸಿದರು. ಚೊಚ್ಚಲ ಪಂದ್ಯದಲ್ಲೇ ಔಟಾಗದೇ 68 ರನ್ ಗಳಿಸಿ ಕ್ರಿಕೆಟ್ ದಂತಕಥೆ ಸುನಿಲ್ ಗವಾಸ್ಕರ್ ದಾಖಲೆಯನ್ನು ಸರಿಗಟ್ಟಿದರು. ಅಲ್ಲದೇ, ಚೊಚ್ಚಲ ಟೆಸ್ಟ್‌ನ ಎರಡೂ ಇನ್ನಿಂಗ್ಸ್‌ನಲ್ಲಿ 50+ ಸ್ಕೋರ್‌ಗಳನ್ನು ದಾಖಲಿಸಿದ ನಾಲ್ಕನೇ ಬ್ಯಾಟರ್ ಎನಿಸಿಕೊಂಡರು.
ಇದನ್ನೂ ಓದಿ: ಐಪಿಎಲ್‌ಗೆ ಆದ್ಯತೆ ನೀಡಿ ದೇಶೀಯ ಕ್ರಿಕೆಟ್ ಕಡೆಗಣಿಸುವುದು ಒಳ್ಳೆಯದಲ್ಲ: ಆಟಗಾರರಿಗೆ ಜಯ್ ಶಾ ಎಚ್ಚರಿಕೆ
