ನವದೆಹಲಿ: ದೆಹಲಿ ಸಿಎಂ ಅರವಿಂದ್ ಕೇಜ್ರಿವಾಲ್, ಸಚಿವೆ ಅತಿಶಿ ಅವರಿಗೆ ನೋಟಿಸ್ ನೀಡಿದ ಪೊಲೀಸ್ ಅಧಿಕಾರಿಗಳನ್ನು ಕೇಂದ್ರ ಸರ್ಕಾರ ಡೆಲಿವರಿ ಬಾಯ್, ಪೋಸ್ಟ್ಮನ್ಗಳ ರೀತಿ ಬಳಸಿಕೊಳ್ಳುತ್ತಿದೆ ಎಂದು ಆಮ್ ಆದ್ಮಿ ಪಕ್ಷ ಆರೋಪಿಸಿದೆ.
ಆಪರೇಷನ್ ಕಮಲ 2.0 ಆರೋಪ ಮಾಡಿದ ಸಿಎಂ ಅರವಿಂದ್ ಕೇಜ್ರಿವಾಲ್ ಮತ್ತು ಹಣಕಾಸು ಸಚಿವೆ ಅತಿಶಿ ಅವರಿಗೆ ದೆಹಲಿ ಪೊಲೀಸರು ಮಾಹಿತಿ ನೀಡುವಂತೆ ನೋಟಿಸ್ ಕೊಟ್ಟಿದ್ದಾರೆ. ಇದನ್ನು ಟೀಕಿಸಿರುವ ಆಪ್, ದೆಹಲಿ ಪೊಲೀಸರ ಬಗ್ಗೆ ಅನುಕಂಪವಿದೆ. ಭದ್ರತೆಯ ಕೆಲಸ ಮಾಡಬೇಕಿದ್ದ ಪೊಲೀಸರು, ಡೆಲಿವರಿ ಬಾಯ್ಗಳಂತೆ ಮನೆಗೆ ಬಂದು ನೋಟಿಸ್ ನೀಡುತ್ತಿದ್ದಾರೆ. ಕೇಂದ್ರ ಸರ್ಕಾರ ಅವರನ್ನು ಕೆಟ್ಟದಾಗಿ ನಡೆಸಿಕೊಳ್ಳುತ್ತಿದೆ ಎಂದು ವ್ಯಂಗ್ಯವಾಡಿದೆ.
ಪೊಲೀಸರಿಂದ ಪೋಸ್ಟ್ಮನ್ ಕೆಲಸ: ದೆಹಲಿ ಪೊಲೀಸ್ ಅಧಿಕಾರಿಗಳ ಬಗ್ಗೆ ಸಹಾನುಭೂತಿ ವ್ಯಕ್ತಪಡಿಸಿದ ಎಎಪಿ ನಾಯಕ ಜಾಸ್ಮಿನ್ ಶಾ, ದೆಹಲಿ ಪೊಲೀಸ್ ಅಪರಾಧ ವಿಭಾಗದ ತಂಡವು ಶನಿವಾರ ಸಿಎಂ ಅರವಿಂದ್ ಕೇಜ್ರಿವಾಲ್ ಅವರ ನಿವಾಸಕ್ಕೆ ಬಂದಿತ್ತು. ಅವರು ತಂದಿದ್ದ ನೋಟಿಸ್ನಲ್ಲಿ ಎಫ್ಐಆರ್ ಬಗ್ಗೆ ಮಾಹಿತಿ ಇರಲಿಲ್ಲ. ಇದು ಸಮನ್ಸೇ ಅಥವಾ ಪ್ರಾಥಮಿಕ ವಿಚಾರಣೆಗೆ ನೀಡಿದ ಎಚ್ಚರಿಕೆ ಪತ್ರವೇ? ಎಂಬುದನ್ನು ತಿಳಿಸಿಲ್ಲ. ಐಪಿಸಿಯ ಯಾವುದೇ ಸೆಕ್ಷನ್ ಅದನ್ನು ಅದರಲ್ಲಿ ಉಲ್ಲೇಖಿಸಿಲ್ಲ. ಯಾವುದೇ ಕಾನೂನು ಆಧಾರವಿಲ್ಲದೆ ಕ್ರೈಂ ಬ್ರಾಂಚ್ ಅಧಿಕಾರಿಗಳು ಸಿಎಂಗೆ ನೋಟಿಸ್ ನೀಡಿದ್ದಾರೆ. 5 ಗಂಟೆ ಕಾಲ ಸಿಎಂ ನಿವಾಸದ ಮುಂದೆ ಕಾದಿದ್ದಾರೆ. ಇದು ಒಂದು ರೀತಿ ಡೆಲಿವರಿ ಬಾಯ್‌ಗಳು, ಪೋಸ್ಟ್ಮನ್ಗಳ ಕೆಲಸದಂತಿದೆ ಎಂದು ಛೇಡಿಸಿದೆ.
ತಮ್ಮ ರಾಜಕೀಯ ಸೇವೆಗೆ ದೆಹಲಿ ಪೊಲೀಸರನ್ನು ಕೇಂದ್ರ ಸರ್ಕಾರ ಬಳಕೆ ಮಾಡಿಕೊಳ್ಳುತ್ತಿದೆ. ರಾಜಧಾನಿಯಲ್ಲಿ ಹೆಚ್ಚಾಗುತ್ತಿರುವ ಅಪರಾಧಗಳನ್ನು ನಿಗ್ರಹಿಸುವ ಬದಲು ರಾಜಕೀಯ ಇಚ್ಛೆಗೆ ಅಧಿಕಾರಿಗಳು ಬಲಿಯಾಗುತ್ತಿದ್ದಾರೆ ಎಂದು ಆಪ್ ಆರೋಪಿಸಿದೆ.
ಏನಿದು ಆರೋಪ, ನೋಟಿಸ್: ಆಪ್ ಶಾಸಕರನ್ನು ಬಿಜೆಪಿ ಖರೀದಿಸಲು ಪ್ರಯತ್ನಿಸುತ್ತಿದೆ. ಆಪರೇಷನ್ ಕಮಲ 2.0 ಆರಂಭಿಸಿದೆ. ಶಾಸಕರಿಗೆ ತಲಾ 25 ಕೋಟಿ ರೂಪಾಯಿ ಆಫರ್ ನೀಡಲಾಗಿದೆ ಎಂದು ದೆಹಲಿ ಸಿಎಂ ಅರವಿಂದ್ ಕೇಜ್ರಿವಾಲ್ ಮತ್ತು ಸಚಿವೆ ಅತಿಶಿ ಆರೋಪಿಸಿದ್ದರು. ಇದನ್ನು ನಿರಾಕರಿಸಿರುವ ಬಿಜೆಪಿ ಈ ಬಗ್ಗೆ ಸಾಕ್ಷ್ಯಾಧಾರಗಳನ್ನು ನೀಡಬೇಕು ಎಂದು ಆಗ್ರಹಿಸಿದೆ.
ಗಂಭೀರ ಆರೋಪ ಮಾಡಿರುವ ಸಿಎಂ ಮತ್ತು ಸಚಿವೆಗೆ ದೆಹಲಿ ಪೊಲೀಸರು ನಿರ್ದಿಷ್ಟ ಅವಧಿಯಲ್ಲಿ ಮಾಹಿತಿ ನೀಡುವಂತೆ ಸೂಚಿಸಿ ನೋಟಿಸ್ ನೀಡಿದ್ದಾರೆ. ಇದಕ್ಕೆ ಎಎಪಿ ಕಿಡಿಕಾರಿದೆ. ನೋಟಿಸ್ ನೀಡಲು ಬಂದ ದೆಹಲಿ ಪೊಲೀಸರನ್ನು ಸಿಎಂ ಅರವಿಂದ್ ಕೇಜ್ರಿವಾಲ್ ತಮ್ಮ ನಿವಾಸದ ಮುಂದೆ 5 ಗಂಟೆ ಕಾಯಿಸಿದ್ದರು.
ಇದನ್ನೂ ಓದಿ: 'ನಾನು ಬಿಜೆಪಿ ಸೇರಬೇಕೆಂದು ಒತ್ತಡ ಹಾಕಲಾಗುತ್ತಿದೆ'- ದೆಹಲಿ ಸಿಎಂ ಕೇಜ್ರಿವಾಲ್; ಸಚಿವೆ ಅತಿಶಿಗೆ ನೋಟಿಸ್
