ಹಾವೇರಿಯ ಸರ್ಕಾರಿ ಆಸ್ಪತ್ರೆಯಲ್ಲಿ ಕೈಕೊಟ್ಟ ವಿದ್ಯುತ್​: ಮೊಬೈಲ್​ ಟಾರ್ಚ್​ನಲ್ಲೇ ರಾತ್ರಿ ಕಳೆದ ರೋಗಿಗಳು - ವಿಡಿಯೋ

ಹಾವೇರಿ: ವಿದ್ಯುತ್ ಇಲ್ಲದೇ ರೋಗಿಗಳು‌ ಪರದಾಡಿದ ಘಟನೆ ಜಿಲ್ಲೆಯ ರಾಣೆಬೆನ್ನೂರು ತಾಲೂಕು ಸರ್ಕಾರಿ ಆಸ್ಪತ್ರೆಯಲ್ಲಿ ಗುರುವಾರ ರಾತ್ರಿ ನಡೆದಿದೆ. ಈ ಆಸ್ಪತ್ರೆಯಲ್ಲಿ ಕನಿಷ್ಠ ಒಂದು ಯುಪಿಎಸ್ ಕೂಡ ಇಲ್ಲದಿರುವುದರಿಂದ  ರೋಗಿಗಳ ಸಂಬಂಧಿಕರು ಆಸ್ಪತ್ರೆ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು. ಆಸ್ಪತ್ರೆಯ ಹೆರಿಗೆ ವಾರ್ಡ್​ನಲ್ಲಂತೂ ಬೆಳಕಿಲ್ಲದೇ ಬಾಣಂತಿಯರು ನವಜಾತ ಶಿಶುಗಳೊಂದಿಗೆ ಕೆಲಗಂಟೆಗಳ ಕಾಲ ಆತಂಕದಲ್ಲಿ ಕಳೆದಿದ್ದಾರೆ. ಚಿಕಿತ್ಸೆಗಾಗಿ ಬಂದವರು ಕತ್ತಲಲ್ಲೇ ಸಮಯ ಕಳೆದರು. ಕರೆಂಟ್​ ಹೋದಾಗಿನಿಂದ ಆಸ್ಪತ್ರೆ ಒಳಗೆ ಭಯದ ವಾತಾವರಣ ಉಂಟಾಗಿದ್ದು, ಒಮ್ಮೆಲೆ ಎಲ್ಲರೂ ಪರದಾಡಿದರು. ರೋಗಿಗಳ ಸಂಬಂಧಿಕರು ಮೊಬೈಲ್​ ಟಾರ್ಚ್​ ಹಚ್ಚಿ ರಾತ್ರಿ ತಮ್ಮವರೊಂದಿಗೆ ಸಮಯ ಕಳೆದಿದ್ದು, ಆದಷ್ಟು ಬೇಗ ಸರಿಯಾದ ವಿದ್ಯುತ್​ ವ್ಯವಸ್ಥೆ ಮಾಡುವಂತೆ ಆಗ್ರಹಿಸಿದ್ದಾರೆ. ತಾಲೂಕು ಆಸ್ಪತ್ರೆಯಲ್ಲಿ ಈ ರೀತಿಯಾಗುವುದು ಅಲ್ಲಿನ ಆಡಳಿತ ವ್ಯವಸ್ಥೆಯ ಬೇಜವಾಬ್ದಾರಿಯನ್ನು ಎತ್ತಿ ತೋರಿಸುತ್ತಿದೆ. ವಿದ್ಯುತ್​ ಹೋದ ತಕ್ಷಣ ಅದಕ್ಕೆ ಪರ್ಯಾಯ ವ್ಯವಸ್ಥೆ ಇಲ್ಲದೇ ಇರುವುದು ಆಸ್ಫತ್ರೆಯ ನಿರ್ಲಕ್ಷವೋ, ತಾಲೂಕು ಆಸ್ಪತ್ರೆಯಲ್ಲಿನ ಕುಂದು ಕೊರತೆಯೋ ತಿಳಿದಿಲ್ಲ. ಆದರೆ, ಇನ್ನು ಮುಂದಾದರು ಆಸ್ಪತ್ರೆ ಸಿಬ್ಬಂದಿ ಆದಷ್ಟು ಬೇಗ ಎಚ್ಚೆತ್ತುಕೊಂಡರೆ ಒಳಿತು. ಇಲ್ಲವಾದರೆ ರೋಗಿಗಳ ಕೆಂಗಣ್ಣಿಗೆ ಗುರಿಯಾಗಬೇಕಾದೀತು.

ಇದನ್ನೂ ಓದಿ: ಡ್ರೈವರ್​ ಅಜಾಗರೂಕತೆಯ ಚಾಲನೆಗೆ ಡಿವೈಡರ್​ ದಾಟಿ ಬಂದ ಟ್ರಕ್​ : ವಿಡಿಯೋ