ವಿಜಯನಗರ: ಕಳೆದ 15 ದಿನಗಳಲ್ಲಿ 4 ಲಕ್ಷ ಲೀಟರ್ ಹಾಲು ಹೆಚ್ಚಳವಾಗಿದೆ ಎಂದು ಕೆಎಂಎಫ್ ರಾಜ್ಯಾಧ್ಯಕ್ಷ ಭೀಮಾ ನಾಯ್ಕ ಹೇಳಿದರು. ಜಿಲ್ಲೆಯ ಹಗರಿಬೊಮ್ಮನಹಳ್ಳಿಯಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಹಾಲಿನ ದರ 3 ರೂ. ಏರಿಕೆ ಮಾಡಿದ ಬಳಿಕ ಹಾಲಿನ ಸಂಗ್ರಹ ಹೆಚ್ಚಾಗಿದೆ. 83 ಲಕ್ಷ ಲೀಟರ್ ಇದ್ದಿದ್ದು, ಈಗ 87 ಲಕ್ಷ ಲೀಟರ್ಗೆ ಏರಿಕೆಯಾಗಿದೆ ಎಂದು ತಿಳಿಸಿದರು.
ಒಂದು ಕೋಟಿ ಗುರಿ: ಕೇಂದ್ರ ಸರ್ಕಾರ ಅಕ್ಕಿ ಕೋಡೋದ್ರಲ್ಲೂ ರಾಜಕೀಯ ಮಾಡುತ್ತಿದೆ. ಅಕ್ಕಿ ಹಣವನ್ನು ನೇರವಾಗಿ ಫಲಾನುಭವಿ ಅಕೌಂಟ್ಗೆ ಜಮೆ ಮಾಡುತ್ತಿದೆ. ಕಾಂಗ್ರೆಸ್ ಐದು ಗ್ಯಾರಂಟಿಯಲ್ಲಿ ನಾಲ್ಕು ಗ್ಯಾರಂಟಿ ಈಡೇರಿಸಿದೆ. ಹಾಲಿನ ದರ ಏರಿಕೆ ಮೂಲಕ ನೇರವಾಗಿ ಹಣ ರೈತರಿಗೆ ಕೊಡುತ್ತೇವೆ. ಬಿಜೆಪಿ ರೈತರ ವಿಚಾರದಲ್ಲಿ ವಿರೋಧ ಮಾಡಬಾರದು. ಬಿಜೆಪಿ ತಮ್ಮ ಬೇಳೆಯನ್ನು ಬೇಯಿಸಿಕೊಳ್ಳಲಿಕ್ಕೆ ಕೆಲವು ಸ್ಟೇಟ್ಮೆಂಟ್ ಕೊಡುತ್ತಾರೆ. ನಾನು ಅಧ್ಯಕ್ಷ ಆದಮೇಲೆ ಪ್ರಾಮಾಣಿಕವಾಗಿ ಕೆಲಸ ಮಾಡುತ್ತಿದ್ದೇನೆ. ನಂದಿನಿ ಬ್ರ್ಯಾಂಡ್ ಬಹಳ ವೇಗವಾಗಿ ಬೆಳೆಯುತ್ತಿದೆ. ನಮ್ಮ ದೇಶದಲ್ಲಿ ಮಾತ್ರವನ್ನು ಹೊರ ದೇಶದಲ್ಲಿಯೂ ನಂದಿನಿ ಬ್ರ್ಯಾಂಡ್ಗೆ ಬೇಡಿಕೆ ಇದೆ ಎಂದರು.
ಬೇರೆ ಪ್ರಾಡಕ್ಟ್ ಮಾರಿದರೆ ಡೀಲರ್ಶಿಪ್ ರದ್ದು: ನಂದಿನಿ ಪಾರ್ಲರ್ ನಲ್ಲಿ ಬೇರೆ ಪ್ರಾಡಕ್ಟ್ ಮಾರಾಟ ವಿಚಾರವಾಗಿ ದೂರುಗಳು ಬಂದಿವೆ. ನಂದಿನಿ ಪಾರ್ಲರ್ ನಲ್ಲಿ ನಮ್ಮ ಪ್ರಾಡಕ್ಟ್ ಬಿಟ್ಟು ಬೇರೆ ವಸ್ತು ಮಾರಾಟ ಮಾಡುವಂತಿಲ್ಲ. ಒಂದು ವೇಳೆ ಮಾರಾಟ ಮಾಡಿದರೆ ಅಂತವರ ಡೀಲರ್ಶಿಪ್ ರದ್ದು ಮಾಡುತ್ತೇವೆ. ಕೆಲವು ಮಾರ್ಕೆಟಿಂಗ್ ವಿಚಾರದಲ್ಲಿ ಬಹಳ ಹಿಂದೆ ಇದ್ದೇವೆ. ಅದನ್ನು ಯಾವ ರೀತಿ ಬಲಪಡಿಸಬೇಕು ಅನ್ನೋದನ್ನು ನಿರ್ಧಾರ ಮಾಡುತ್ತೇವೆ. ಕೆಎಂಎಫ್ ಆಯಾ ಸರ್ಕಾರ ಸಂದರ್ಭದಲ್ಲಿ ಅವರ ಅಣತಿಯಂತೆ ನಡೆಯುತ್ತದೆ ಅನ್ನೋ ವಿಚಾರ ಕೆಎಂಎಫ್ನಲ್ಲಿ ನಡೆಯೋದಿಲ್ಲ. ಸಿದ್ದರಾಮಯ್ಯನವರು ಸಿಎಂ ಆದ ಮೇಲೆ ನಿರ್ಧಾರ ಮಾಡಿದರು. ಮೂರು ರೂಪಾಯಿ ಹೆಚ್ಚಿಸಿ ನೇರವಾಗಿ ರೈತರಿಗೆ ಕೊಡುತ್ತಿದ್ದೇವೆ. ಕೆಎಂಎಫ್ ನೂರು ಕೋಟಿ ಲಾಭದಲ್ಲಿ ಇದೆ ಎಂದು ಮಾಹಿತಿ ನೀಡಿದರು.
ಬ್ರಾಂಡ್ ಫ್ರೀಯಾಗಿ ಪ್ರಚಾರ: ರೈತರ ಪರವಾಗಿ ರಾಜ್ ಕುಟುಂಬ ಕೆಲಸ ಮಾಡುತ್ತಾ ಬಂದಿದೆ. ಅಪ್ಪು ಕೂಡಾ ನಂದಿನಿ ಬ್ರಾಂಡ್ಅನ್ನು ಫ್ರೀಯಾಗಿ ಪ್ರಚಾರ ಮಾಡಿದ್ದಾರೆ. ಈಗ ಬ್ರಾಂಡ್ ಅಂಬಾಸಿಡರ್ ಆಗಿ ಶಿವರಾಜಕುಮಾರ್ ನೇಮಕವಾಗಿದ್ದಾರೆ. ಸಿನಿಮಾಗಳಲ್ಲಿ ಕೆಲವು ವೇಳೆ ನಂದಿನಿ ಬ್ರಾಂಡ್ ಬಳಸಿ ಅಂತ ವಾಯ್ಸ್ ಮೂಲಕ ಹೇಳ್ತಿದ್ರು. ರೈತರ ಪರವಾಗಿ ರಾಜ್ ಕುಟುಂಬ ಅಪಾರ ಅಭಿಮಾನ ಹೊಂದಿದೆ. ಹೀಗಾಗಿ ಶಿವರಾಜಕುಮಾರ್ ಅವರನ್ನೇ ನೇಮಕ ಮಾಡಬೇಕು ಅಂತ ಮಾಡಿದ್ದೇವೆ. ಶಿವರಾಜಕುಮಾರ್ ಒಂದೇ ಒಂದು ರೂಪಾಯಿ ಸಂಭಾವನೆ ಪಡೆದಿಲ್ಲ ಎಂದು ಕೆಎಂಎಫ್ ಅಧ್ಯಕ್ಷ ಭೀಮಾ ನಾಯ್ಕ ಹೇಳಿದರು.
ಇದನ್ನೂ ಓದಿ:ಅಂಜನಾದ್ರಿಯಲ್ಲಿ 350ಕ್ಕೂ ಹೆಚ್ಚು ತಾಳೆ ಮರದ ಬೀಜ ಬಿತ್ತನೆ: ಪರಿಸರ ಸಂರಕ್ಷಣೆಗೆ ಸಂಕಲ್ಪ
