ಲೂದಿಯಾನ: 21 ವರ್ಷದ ಯುವ ಬ್ಯಾಟರ್ ನೇಹಲ್ ವಡೇರಾ ಪಂಜಾಬ್ ಅಂಡರ್ -23 ಅಂತರ್ ಜಿಲ್ಲಾ ಕ್ರಿಕೆಟ್ ಚಾಂಪಿಯನ್ಶಿಪ್ನಲ್ಲಿ 578 ರನ್ಗಳ ಬೃಹತ್ ಮೊತ್ತ ಸಿಡಿಸುವ ಮೂಲಕ ಕ್ರಿಕೆಟ್ ಅಭಿಮಾನಿಗಳ ಗಮನ ಸೆಳೆದಿದ್ದಾರೆ. ಭಾರತ ಅಂಡರ್ 19 ತಂಡದ ಮಾಜಿ ಬ್ಯಾಟರ್ ಆಗಿರುವ ಎಡಗೈ ಸ್ಟೈಲಿಷ್ ಬ್ಯಾಟರ್ ನೇಹಲ್ ಲೂದಿಯಾನ ತಂಡವನ್ನು ಪ್ರತಿನಿಧಿಸುತ್ತಿದ್ದು, ಸೆಮಿಫೈನಲ್ನ 2ನೇ ದಿನ ಔಟಾಗುವ ಮುನ್ನ 414 ಎಸೆತಗಳಲ್ಲಿ 578 ರನ್ಗಳಿಸಿದರು.
ಬತಿಂಡಾ ತಂಡದ ವಿರುದ್ಧ ನಡೆಯುತ್ತಿರುವ ಈ ಪಂದ್ಯದಲ್ಲಿ 21 ವರ್ಷದ ನೇಹಲ್ 42 ಬೌಂಡರಿ ಮತ್ತು 37 ಸಿಕ್ಸರ್ ಸಿಡಿಸಿದ್ದಾರೆ. ಅವರು ಬೌಂಡರಿ ಮತ್ತು ಸಿಕ್ಸರ್ಗಳ ಮೂಲಕವೇ 390 ರನ್ ದಾಖಲಿಸಿದರು. ಇವರ ಅಬ್ಬರದ ಇನ್ನಿಂಗ್ಸ್ನಿಂದ ಲೂದಿಯಾನ 6 ವಿಕೆಟ್ ಕಳೆದುಕೊಂಡು 888 ರನ್ಗಳಿಸಿ ಡಿಕ್ಲೇರ್ ಘೋಷಿಸಿದೆ.
ಇದು ಪ್ರಥಮ ದರ್ಜೆ ಕ್ರಿಕೆಟ್ಗೆ ಸೇರುವುದಿಲ್ಲವಾದ್ದರಿಂದ ನೇಹಲ್ ಅದ್ಭುತ ಪ್ರದರ್ಶನ ವಿಶ್ವದಾಖಲೆಗೆ ಅರ್ಹವಾಗಿಲ್ಲ. ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ ವೆಸ್ಟ್ ಇಂಡೀಸ್ನ ಬ್ರಿಯಾನ್ ಲಾರಾ ಅಜೇಯ 501 ರನ್ಗಳಿಸಿರುವುದು ವಿಶ್ವದಾಖಲೆಯಾಗಿದೆ. ಅವರು ಕೌಂಟಿ ಚಾಂಪಿಯನ್ಶಿಪ್ನಲ್ಲಿ ವಾರ್ವಿಕ್ಶೈರ್ ತಂಡದ ಪರ 1994ರಲ್ಲಿ ಈ ದಾಖಲೆ ಬರೆದಿದ್ದರು. ಲಾರ ಒಟ್ಟು 62 ಫೋರ್ಸ್ ಮತ್ತು 10 ಸಿಕ್ಸರ್ಗಳನ್ನು ಸಿಡಿಸಿದ್ದರು.
ಅಲ್ಲದೆ, ನೇಹಲ್ ಕ್ರಿಕೆಟ್ ಇತಿಹಾಸದ 4 ದಿನಗಳ ಪಂದ್ಯದಲ್ಲಿ 37 ಸಿಕ್ಸರ್ ಸಿಡಿಸಿದ ಮೊದಲ ಬ್ಯಾಟರ್ ಎಂಬ ಶ್ರೇಯಕ್ಕೆ ಪಾತ್ರರಾದರು. 2018 ಪೃಥ್ವಿ ಶಾ ಬ್ಯಾಚ್ನಲ್ಲಿ ಅಂಡರ್ 19 ಕ್ರಿಕೆಟ್ ಆಡಿರುವ ನೇಹಲ್ ಶ್ರೀಲಂಕಾ ಪ್ರವಾಸ ಕೈಗೊಂಡಿದ್ದ ಭಾರತ ತಂಡದ ಪರ 2 ಅರ್ಧಶತಕ ಸಿಡಿಸಿದ್ದರು. ಇದಲ್ಲದೆ 2017-18ರ ಕೋಚ್ ಬಿಹಾರ್ ಟ್ರೋಫಿಯಲ್ಲಿ 540 ರನ್ಗಳನ್ನು ಸಿಡಿಸಿದ್ದರು.
ಯುವರಾಜ್ ಸಿಂಗ್ರನ್ನು ಸ್ಪೂರ್ತಿಯಾಗಿ ತೆಗೆದುಕೊಂಡಿರುವ ಯುವ ಆಟಗಾರ ಭವಿಷ್ಯದಲ್ಲಿ ಪಂಜಾಬ್ ತಂಡ ಮತ್ತು ಐಪಿಎಲ್ನಲ್ಲಿ ಆಡುವ ಆಸೆಯನ್ನಿಟ್ಟುಕೊಂಡಿದ್ದಾರೆ. ರಾಜಸ್ಥಾನ್ ರಾಯಲ್ಸ್ ಫ್ರಾಂಚೈಸಿ 2022ರ ಐಪಿಎಲ್ ಟ್ರಯಲ್ಸ್ಗೆ ಕರೆದಿತ್ತಾದರೂ ಹರಾಜಿನಲ್ಲಿ ಖರೀದಿಸಿರಲಿಲ್ಲ.
ಇದನ್ನೂ ಓದಿ:ಆಲ್ರೌಂಡರ್ ಬೆನ್ ಸ್ಟೋಕ್ಸ್ಗೆ ಇಂಗ್ಲೆಂಡ್ ಟೆಸ್ಟ್ ತಂಡದ ನಾಯಕತ್ವ
