ಅಮೃತಸರ್: ಪಂಜಾಬ್ನಲ್ಲಿ ಆಮ್ ಆದ್ಮಿ ಪಕ್ಷ ಅಧಿಕಾರಕ್ಕೆ ಬಂದ ಮೇಲೆ ಮರಳುಗಣಿಗಾರಿಕೆ ನಿಲ್ಲಿಸಲಾಗಿದೆ. ಹೀಗಾಗಿ ರಾಜ್ಯಾದ್ಯಂತ ಮರಳು ಕೊರತೆ ಉಂಟಾಗಿದೆ. ಈ ಪರಿಣಾಮ ಕಟ್ಟಡ ನಿರ್ಮಾಣ ಕಾಮಗಾರಿಗಳು ಮಂದಗತಿಯಲ್ಲಿ ಸಾಗಿವೆ. ಅಷ್ಟೇ ಅಲ್ಲ ಅನೇಕ ವ್ಯವಹಾರಗಳಿಗೂ ಸರ್ಕಾರದ ಈ ನಿಷೇಧದಿಂದ ತೊಂದರೆಯಾಗಿದೆ.
ಮರಳು ಅಭಾವದಿಂದ ಎಚ್ಚೆತ್ತುಕೊಂಡಿರುವ ಸರ್ಕಾರ ಹೊಸ ಪ್ಲಾನ್ ರೂಪಿಸಲು ಸನ್ನದ್ಧವಾಗಿದೆ. ಅಕ್ರಮ ಮರಳು ಸಾಗಣೆ ತಪ್ಪಿಸಲು ಹೋಮ್ ಡಿಲೇವರಿ ಮಾಡಲು ಅಲ್ಲಿನ ಸರ್ಕಾರ ನಿರ್ಧರಿಸಿದೆ. ಈ ಸಂಬಂಧ ಪಂಜಾಬ್ನ ಸಚಿವ ಹರ್ಜೋತ್ ಸಿಂಗ್ ಬೇನ್ಸ್, ಜನರಿಗೆ ಅಗ್ಗದ ಬೆಲೆಯಲ್ಲಿ ಮರಳು ದೊರೆಯಲಿದೆ ಎಂದು ಭರವಸೆ ನೀಡಿದ್ದಾರೆ. ಈ ಬಗ್ಗೆ ಮಾಧ್ಯಮದವರ ಜತೆ ಮಾತನಾಡಿರುವ ಸಚಿವರು, ಶೀಘ್ರದಲ್ಲೇ ಮರಳು ಮತ್ತು ಜಲ್ಲಿಕಲ್ಲುಗಳನ್ನು ಮನೆ ಮನೆಗೆ ತಲುಪಿಸುವ ಸೌಲಭ್ಯ ಜಾರಿಗೆ ತರುವುದಾಗಿ ಅಭಯ ನೀಡಿದ್ದಾರೆ.
ಆ್ಯಪ್ ಮೂಲಕ ಮನೆ ಮನೆಗೆ ಮರಳು: ಮರಳನ್ನು ಮನೆ ಮನೆಗೆ ತಲುಪಿಸುವ ಸಂಬಂಧ ರಾಜ್ಯದ ಆಡಳಿತ, ಎಂಜಿನಿಯರ್‌ಗಳು ಮತ್ತು ಆಕ್ಸಿಸ್ ಬ್ಯಾಂಕ್‌ನ ಕೆಲವು ಅಧಿಕಾರಿಗಳ ಜತೆಗೂಡಿ ನೂತನ ಆ್ಯಪ್ ಅಭಿವೃದ್ಧಿ ಪಡಿಸುತ್ತಿದ್ದು, ಇದರ ಯಶಸ್ವಿ ಕಾರ್ಯಾಚರಣೆಗೆ ಶ್ರಮಿಸುತ್ತಿದ್ದಾರೆ. ಈ ಅಪ್ಲಿಕೇಶನ್ ಶೀಘ್ರದಲ್ಲೇ ಬಿಡುಗಡೆಯಾಗಲಿದೆ. ಆ್ಯಪ್ ಮೂಲಕ ಮರಳಿನ ಬೆಲೆ ಹಾಗೂ ಸಾಗಣೆ ವೆಚ್ಚವೂ ತಿಳಿಯಲಿದೆ. ಆ್ಯಪ್ ಮೂಲಕ ಆರ್ಡರ್ ಮಾಡಿದ ತಕ್ಷಣ ಮನೆ ಬಾಗಿಲಿಗೆ ಮರಳು ಬರಲಿದೆ ಎಂದು ಸಚಿವರು ವಿವರಣೆ ನೀಡಿದರು.
ಇದೇ ವೇಳೆ, ಕ್ಯಾಬಿನೆಟ್ ಸಚಿವ ಹರ್ಜೋತ್ ಸಿಂಗ್ ಬೇನ್ಸ್, ಅಕ್ರಮ ಮರಳು ಧಂದೆಗೆ ಕಡಿವಾಣ ಹಾಕಲು ಸರ್ಕಾರ ಸೂಕ್ತ ಕ್ರಮ ಕೈಗೊಂಡಿದೆ. ಅದಕ್ಕಾಗಿ ನಾವು ಎಲ್ಲವನ್ನೂ ಮಾಡಿದ್ದೇವೆ ಎಂದು ಹೇಳಿದರು. ಮರಳು ಮತ್ತು ಜಲ್ಲಿಗಾಗಿ ಸರಕಾರಿ ಮಾರಾಟ ಕೇಂದ್ರಗಳನ್ನು ತೆರೆದು ದರ ನಿಗದಿ ಮಾಡಲಾಗಿದೆ. ಇದರಿಂದ ಮರಳಿನ ದರ ನಾಲ್ಕು ಪಟ್ಟು ಇಳಿಕೆಯಾಗಿದ್ದು, ಜನರಿಗೆ ಕೊಂಚ ನೆಮ್ಮದಿ ಸಿಕ್ಕಿದೆ. 2022ರ ನವೆಂಬರ್ 1ರಿಂದ ನವೆಂಬರ್ 10ರವರೆಗೆ ಗಣಿಗಾರಿಕೆಗೆ ಸಮಯಾವಕಾಶವಿದೆ ಎಂದು ಮಾಹಿತಿ ನೀಡಿದರು. ಒಂದು ಟಿಪ್ಪರ್ ದರ 15-16000 ಸಾವಿರ ರೂ. ಇರುವ ಸಾಧ್ಯತೆ ಇದೆ.
ಈ ನಡುವೆ, ಮರಳುಗಾರಿಕೆ ಸಂಬಂಧಿಸಿದಂತೆ ಹೈಕೋರ್ಟ್ನಲ್ಲಿ ಪ್ರಕರಣ ಇದ್ದು, ಮುಂದಿನ ವಿಚಾರಣೆ ಜನವರಿ 4, 2023 ರಂದು ನಡೆಯಲಿದೆ ಎಂದು ಸಚಿವರು ಮಾಹಿತಿ ನೀಡಿದರು.
ಇದನ್ನು ಓದಿ:ಹೆಂಡತಿ ಗಂಡನ ಲೈಂಗಿಕ ಗುಲಾಮಳಲ್ಲ: 2022ರಲ್ಲಿ ಕೌಟುಂಬಿಕ ಕೇಸ್ಗಳ ಕುರಿತು ಹೈಕೋರ್ಟ್ ನೀಡಿದ ಆದೇಶಗಳಿವು!
