ಸ್ಯಾನ್ ಫ್ರಾನ್ಸಿಸ್ಕೋ: ಯುಎಸ್ ಸೆಕ್ಯುರಿಟೀಸ್ ಆ್ಯಂಡ್ ಎಕ್ಸ್ಚೇಂಜ್ ಕಮಿಷನ್ (ಎಸ್ಇಸಿ) ಕೊನೆಗೂ ಹಲವಾರು ಸ್ಪಾಟ್ ಬಿಟ್ಕಾಯಿನ್ ಎಕ್ಸ್ಚೇಂಜ್-ಟ್ರೇಡೆಡ್ ಪ್ರಾಡಕ್ಟ್ (ಇಟಿಪಿ) ಷೇರುಗಳ ವಹಿವಾಟಿಗೆ ಅನುಮತಿ ನೀಡಿದೆ. ಇದರೊಂದಿಗೆ ವಿಶ್ವದ ಅತಿದೊಡ್ಡ ಕ್ರಿಪ್ಟೋಕರೆನ್ಸಿಯಾಗಿರುವ ಬಿಟ್ ಕಾಯಿನ್ ಜಾಗತಿಕ ಹಣಕಾಸು ವ್ಯವಸ್ಥೆಯೊಳಗೆ ಸೇರಿಕೊಂಡಿದೆ.
ಎಸ್ಇಸಿ ತೆಗೆದುಕೊಂಡಿರುವ ಈ ನಿರ್ಧಾರದಿಂದ ಗ್ರೇ ಸ್ಕೇಲ್, ಫಿಡೆಲಿಟಿ ಮತ್ತು ಬ್ಲ್ಯಾಕ್ ರಾಕ್ನಂಥ ಸುಮಾರು ಒಂದು ಡಜನ್ ಸ್ಪಾಟ್ ಬಿಟ್ ಕಾಯಿನ್ ಇಟಿಎಫ್ಗಳ ಮೇಲೆ ಗ್ರಾಹಕರಿಗೆ ಹೂಡಿಕೆ ಮಾಡಲು ಸಾಧ್ಯವಾಗಲಿದೆ.
"ನಾವು ಕೆಲ ಸ್ಪಾಟ್ ಬಿಟ್ಕಾಯಿನ್ ಇಟಿಪಿ ಷೇರುಗಳ ಲಿಸ್ಟಿಂಗ್ ಮತ್ತು ವ್ಯಾಪಾರವನ್ನು ಅನುಮೋದಿಸಿದರೂ, ನಾವು ಬಿಟ್ಕಾಯಿನ್ ಅನ್ನು ಅನುಮೋದಿಸುತ್ತಿಲ್ಲ. ಹೂಡಿಕೆದಾರರು ತಾವಾಗಿಯೇ ಬಿಟ್ ಕಾಯಿನ್ ಮತ್ತು ಅದಕ್ಕೆ ಸಂಬಂಧಿಸಿದ ಉತ್ಪನ್ನಗಳ ಕ್ರಿಪ್ಟೋ ಆಧರಿತ ಮೌಲ್ಯದ ಏರಿಳಿತಗಳ ಬಗ್ಗೆ ಜಾಗರೂಕರಾಗಿರಬೇಕು" ಎಂದು ಎಸ್ಇಸಿ ಅಧ್ಯಕ್ಷ ಗ್ಯಾರಿ ಜೆನ್ಸ್ಲರ್ ಬುಧವಾರ ತಡರಾತ್ರಿ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಎಸ್ಇಸಿಯ ಈ ನಿರ್ಧಾರವು ಕ್ರಿಪ್ಟೋ ಆಸ್ತಿ ಸೆಕ್ಯೂರಿಟೀಸ್ಗಳ ಲಿಸ್ಟಿಂಗ್ ಮಾನದಂಡಗಳನ್ನು ಅನುಮೋದಿಸುವುದಿಲ್ಲ ಜೆನ್ಸ್ಲರ್ ಹೇಳಿದರು. ಬಿಟ್ ಕಾಯಿನ್ ಇಟಿಎಫ್ ಆರಂಭಿಸುವ ಎಲ್ಲಾ ಪ್ರಯತ್ನಗಳನ್ನು ಕಳೆದ 10 ವರ್ಷಗಳಿಂದ ಎಸ್ಇಸಿ ವಿಫಲಗೊಳಿಸಿತ್ತು.
ಕ್ರಿಪ್ಟೋ ಸ್ವತ್ತುಗಳ ಬಹುಪಾಲು ಹೂಡಿಕೆಗಳು ಇನ್ವೆಸ್ಟ್ಮೆಂಟ್ ಕಾಂಟ್ರ್ಯಾಕ್ಟ್ ಆಗಿರುವುದರಿಂದ ಇವು ಫೆಡರಲ್ ಸೆಕ್ಯುರಿಟೀಸ್ ಕಾನೂನುಗಳಿಗೆ ಒಳಪಟ್ಟಿರುತ್ತವೆ. ಬಿಟ್ ಕಾಯಿನ್ ಇಟಿಪಿಗಳ ಪ್ರಾಯೋಜಕರು ಉತ್ಪನ್ನಗಳ ಬಗ್ಗೆ ಪೂರ್ಣ, ನ್ಯಾಯಯುತ ಮತ್ತು ಸತ್ಯವಾದ ಮಾಹಿತಿಗಳನ್ನು ಬಹಿರಂಗಪಡಿಸಬೇಕಾಗುತ್ತದೆ.
ಈ ಉತ್ಪನ್ನಗಳನ್ನು ನೋಂದಾಯಿತ ರಾಷ್ಟ್ರೀಯ ಸೆಕ್ಯುರಿಟೀಸ್ ಎಕ್ಸ್ಚೇಂಜ್ಗಳಲ್ಲಿ ಲಿಸ್ಟಿಂಗ್ ಮಾಡಲಾಗುತ್ತದೆ ಮತ್ತು ಟ್ರೇಡ್ ಮಾಡಲಾಗುತ್ತದೆ. ಅನುಮೋದಿತ ಇಟಿಪಿಗಳ ಖರೀದಿ ಮತ್ತು ಮಾರಾಟಕ್ಕೆ ಅಸ್ತಿತ್ವದಲ್ಲಿರುವ ನಿಯಮಗಳು ಮತ್ತು ನಡವಳಿಕೆಯ ಮಾನದಂಡಗಳು ಅನ್ವಯವಾಗುತ್ತವೆ.
ಈ ವಾರದ ಆರಂಭದಲ್ಲಿ ಯುಎಸ್ ಸೆಕ್ಯುರಿಟೀಸ್ ಅಂಡ್ ಎಕ್ಸ್ಚೇಂಜ್ ಕಮಿಷನ್‌ನ ಎಕ್ಸ್ ಖಾತೆಯನ್ನು ಕೆಲ ಹೊತ್ತು ಹ್ಯಾಕ್ ಮಾಡಲಾಗಿತ್ತು. ಎಸ್ಇಸಿಯು ಬಿಟ್ ಕಾಯಿನ್ ಎಕ್ಸ್ಚೇಂಜ್- ಟ್ರೇಡೆಡ್ ಫಂಡ್ಗಳ (ಇಟಿಎಫ್) ಲಿಸ್ಟಿಂಗ್ ಅನುಮೋದಿಸಿದೆ ಎಂದು ಈ ಸಮಯದಲ್ಲಿ ಎಕ್ಸ್ನಲ್ಲಿ ಪೋಸ್ಟ್ ಮಾಡಲಾಗಿತ್ತು. ಈ ಬಗ್ಗೆ ನಂತರ ಸ್ಪಷ್ಟನೆ ನೀಡಿದ್ದ ಜೆನ್ಸ್ಲರ್, ಏಜೆನ್ಸಿಯ ಖಾತೆಯನ್ನು ಹ್ಯಾಕ್ ಮಾಡಲಾಗಿದೆ ಮತ್ತು ಸುಳ್ಳು ಪೋಸ್ಟ್ ಮಾಡಲಾಗಿದೆ ಎಂದು ತಮ್ಮ ಎಕ್ಸ್ ಖಾತೆಯಲ್ಲಿ ಹೇಳಿದ್ದರು.
ಇದನ್ನೂ ಓದಿ: 2023ರಲ್ಲಿ ಮೊಬೈಲ್ ಆ್ಯಪ್ಗಳಲ್ಲಿ ಜನ ಖರ್ಚು ಮಾಡಿದ್ದು 171 ಬಿಲಿಯನ್ ಡಾಲರ್!
