ನೈನಿತಾಲ್ (ಉತ್ತರಾಖಂಡ): ಮೂವರು ಮಹಿಳೆಯರು ಹಾಗೂ ಅನೇಕ ಜಾನುವಾರುಗಳನ್ನು ಬಲಿ ಪಡೆದಿದ್ದ ಹುಲಿಯನ್ನು ಅರಣ್ಯ ಇಲಾಖೆ ಅಧಿಕಾರಿಗಳು ಶೋಧ ಕಾರ್ಯಾಚರಣೆ ನಡೆಸಿ ಸೆರೆ ಹಿಡಿದಿದ್ದಾರೆ. ಭಿಮ್ತಾಲ್ ನೌಕುಚಿಯಾತಲ್ ಕಾಡು ಪ್ರದೇಶದಲ್ಲಿ ನಡೆಸಿದ ಶೋಧ ಕಾರ್ಯಾಚರಣೆಯಲ್ಲಿ ಸಿಬ್ಬಂದಿ ಬೀಸಿದ ಬಲೆಗೆ ಹುಲಿ ಬಿದ್ದಿದೆ. ಹುಲಿಯನ್ನು ರಕ್ಷಿಸಿ ರಾಣಿಭಾಗ್ ಕೇಂದ್ರಕ್ಕೆ ಕರೆದೊಯ್ಯಲಾಗಿದೆ.
ಡಿ. 7 ರಿಂದ ಗ್ರಾಮಸ್ಥರ ನಿದ್ದೆ ಕೆಡಿಸಿದ್ದ ಹುಲಿ, ನೈನಿತಾಲ್ನ ಭಿಮತಾಲ್ ಪ್ರದೇಶದಲ್ಲಿ ಮೂವರು ಮಹಿಳೆಯರನ್ನು ಹಾಗೂ ಅನೇಕ ಜಾನುವಾರುಗಳನ್ನು ಬಲಿ ಪಡೆದಿತ್ತು. ಜನರು ಊರಲ್ಲಿ ಭಯದಲ್ಲೇ ಓಡಾಡುವಂತಾಗಿತ್ತು. ನಿನ್ನೆ ಕೂಡ ಒಂದು ಹಸುವನ್ನು ಬೇಟೆಯಾಡಿದೆ. ನಂತರ ತಪ್ಪಿಸಿಕೊಂಡು ಜಂಗಾಲಿಯಾ ಗ್ರಾಮದಲ್ಲಿ ನೌಕಚಿಯಾತಲ್ನ ಪ್ರದೇಶದಲ್ಲಿ ಕಾಣಿಸಿಕೊಂಡಿದೆ. ಜಂಗಾಲಿಯಾ ಗ್ರಾಮದಲ್ಲಿ ಕಾಣಿಸಿಕೊಂಡಿರುವ ವಿಷಯ ತಿಳಿದ ಅರಣ್ಯ ಇಲಾಖೆಯ ಪಾರುಗಾಣಿಕಾ ತಂಡವು ಸೋಮವಾರ ರಾತ್ರಿ ಶೋಧಾ ಕಾರ್ಯಾಚರಣೆ ನಡೆಸಿದೆ.
ಹುಲಿ ಬೇಟೆಯಾಡಿದ್ದ ಹಸುವನ್ನೇ ದಾಳವಾಗಿ ಬಳಸಿದ ತಂಡ ಹಸುವನ್ನು, ಹುಲಿಗೆ ಅರಿವಳಿಕೆ ಮದ್ದು ನೀಡಲು ನಿಗದಿಪಡಿಸಿದ್ದ ಸ್ಥಳದಲ್ಲಿ ಇರಿಸಿದ್ದಾರೆ. ತನ್ನ ಬೇಟೆಗಾಗಿ ಹುಲಿ ಮತ್ತೆ ಬರಬಹುದು ಎಂದು ಕಾದು ಕುಳಿತಿದ್ದಾರೆ. ಹಲವಾರು ಗಂಟೆಗಳ ಕಾಲ ತಂಡದ ತಾಳ್ಮೆ ಪರೀಕ್ಷೆ ಮಾಡಿದ್ದ ಹುಲಿ ರಾತ್ರಿ 12 ಗಂಟೆ ವೇಳೆಗೆ ಹಸುವಿನ ಬಳಿ ಬಂದಿದೆ. ಅದೇ ವೇಳೆ ಸಿಬ್ಬಂದಿ ಹುಲಿಗೆ ಅರಿವಳಿಕೆ ಮದ್ದು ಶೂಟ್ ಮಾಡಿದ್ದಾರೆ. ಡಾರ್ಟ್ ಮಾಡಿದ ನಂತರವೂ ಹುಲಿ ಕಾಡಿನಲ್ಲಿ ಓಡಿದೆ. ನಂತರ ಪಾರುಗಾಣಿಕಾ ತಂಡ ನಿಧಾನವಾಗಿ ಕಾಡಿನೊಳಗಡೆ ಹುಡುಕಾಡಿದ್ದಾರೆ. ಅಂತಿಮವಾಗಿ ಮುಖ್ಯರಸ್ತೆಯಿಂದ 3 ಕಿಲೋಮೀಟರ್ ಕೆಳಗೆ ಪ್ರಜ್ಞೆ ಕಳೆದುಕೊಂಡ ಸ್ಥಿತಿಯಲ್ಲಿ ದೊರಕಿದೆ.
ಭಾರಿ ಗಾತ್ರದ ಹುಲಿಯನ್ನು ರಸ್ತೆಗೆ ಕರೆತರಲು ಅರಣ್ಯ ಇಲಾಖೆ ತಂಡಕ್ಕೆ ಸುಮಾರು ಎರಡೂವರೆ ಗಂಟೆ ಬೇಕಾಯಿತು. ಈ ನಡುವೆ ಹುಲಿಗೆ ಮತ್ತೊಮ್ಮೆ ಅರಿವಳಿಕೆ ಬೂಸ್ಟರ್ ಡೋಸ್ ನೀಡಲಾಯಿತು. ರಸ್ತೆಗೆ ತಂದು ನಂತರ ಬೋನ್ನಲ್ಲಿರಿಸಿ, ರಾಣಿಭಾಗ್ ಪಾರುಗಾಣಿಕಾ ಕೇಂದ್ರಕ್ಕೆ ಸಾಗಿಸಲಾಯಿತು. ಅರಣ್ಯ ಇಲಾಖೆ ತಂಡ ಹುಲಿಯ ಉಗುರಿನಲ್ಲಿದ್ದ ರಕ್ತ, ಸ್ವಾಬ್ ಹಾಗೂ ಕೂದಲಿನ ಮಾದರಿಗಳನ್ನು ಸಂಗ್ರಹಿಸಿದ್ದಾರೆ. ಕೊಲ್ಲಲ್ಪಟ್ಟ ಮಹಿಳೆಯರ ಮಾದರಿಗಳೊಂದಿಗೆ ಹೊಂದಿಕೆಯಾಗುತ್ತದೆಯಾ ಎನ್ನುವುದನ್ನು ಪರೀಕ್ಷಿಸಿ, ಅವರನ್ನು ಬಲಿ ಪಡೆದಿರುವ ಹುಲಿ ಇದೇನಾ ಅಥವಾ ಬೇರೆಯದಾ ಎನ್ನುವುದನ್ನು ಪತ್ತೆ ಹಚ್ಚಲಿದ್ದಾರೆ.
13 ದಿನಗಳ ಅಂತರದಲ್ಲಿ 3 ಮಹಿಳೆಯರು ಬಲಿ: ನೈನಿತಾಲ್ನಲ್ಲಿ ಡಿಸೆಂಬರ್ 7 ರಿಂದ ಡಿಸೆಂಬರ್ 19 ರನಡುವೆ ವನ್ಯಜೀವಿ ದಾಳಿಯಲ್ಲಿ ಮೂವರು ಮಹಿಳೆಯರು ಸಾವನ್ನಪ್ಪಿರುವುದು ವರದಿಯಾಗಿದೆ. ಡಿಸೆಂಬರ್ 7 ಹಾಗೂ 9 ರಂದು ಸಾವನ್ನಪ್ಪಿದ್ದ ಮಹಿಳೆಯರ ಡಿಎನ್ಎ ವರದಿಯಲ್ಲಿ ಇಬ್ಬರ ಮೇಲೂ ಒಂದೇ ಹುಲಿ ದಾಳಿ ನಡೆಸಿದೆ ಎಂದು ತಿಳಿದು ಬಂದಿದೆ. ಡಿ. 7 ರಂದು 53 ವರ್ಷದ ಇಂದಿರಾ ದೇವಿಯನ್ನು ಭಿಮ್ತಾಲ್ನ ಮಲುವಾತಲ್ನಲ್ಲಿ ಹುಲಿ ಬೇಟೆಯಾಡಿತ್ತು. ಈ ಘಟನೆಯ ಎರಡು ದಿನಗಳ ನಂತರ ಪಿನಾರೊ ಗ್ರಾಮದ ಪುಷ್ಪಾ ದೇವಿ ಎನ್ನುವವರ ಮೇಲೆ ಹುಲಿ ದಾಳಿ ಮಾಡಿ ಬಲಿ ಪಡೆದಿತ್ತು. 10 ದಿನಗಳ ನಂತರ ಡಿ. 19 ರಂದು ಅಲ್ಚುನಾ ಗ್ರಾಮದ ನಿವಾಸಿ ನಿಕಿತಾ ಶರ್ಮಾ ಎನ್ನುವವರು ಹುಲಿ ದಾಳಿಯಿಂದ ಸಾವನ್ನಪ್ಪಿದ್ದರು.
ಇದನ್ನೂ ಓದಿ: ಹಾಸ್ಟೆಲ್ಗೆ ನುಗ್ಗಿದ ಚಿರತೆ ಸೆರೆ: 12 ಗಂಟೆಗಳ ಬಳಿಕ ನಿಟ್ಟುಸಿರುಬಿಟ್ಟ ವಿದ್ಯಾರ್ಥಿನಿಯರು
