પાટણ: ગુજરાતના પશુપાલકોને તેમની પશુપાલનની પ્રવૃત્તિમાં ફાયદો થાય તે હેતુથી પાટણ ખાતે ભારત સરકારના રાષ્ટ્રીય ગોકુલ મિશન પ્રોજેકટ હેઠળ સીમેન સેક્સીંગ ફેસીલીટી સેન્ટર બનાવવાની મંજૂરી મળી છે. જેમાં કેન્દ્ર સરકાર અને રાજય સરકારના સહયોગથી આ પ્રોજેકટનું અમલીકરણ કરવામાં આવશે. જે અંતર્ગત કુલ રૂપિયા 47.50 કરોડની ગ્રાન્ટ મંજૂર કરવામાં આવી છે. આ પ્રોજેકટની શરૂઆત થતા ગુજરાતના લાખો પશુપાલકોને ઉચ્ચ ગુણવત્તાયુક્ત પશુઓની ઓલાદો મળતી થશે.
ભવનના ખાતમૂહુર્તમાં આવેલા કેબિનેટ પ્રધાન કુંવરજી બાવળીયા અને રાજય કક્ષાના પશુપાલન પ્રધાન બચુ ખાબડે સ્ટેટ ફ્રોઝન સીમેન પ્રોડકશન એન્ડ ટ્રેનિંગ ઇન્સ્ટિટયુટ, પાટણ ખાતે થઇ રહેલા વિવિધ પ્રવૃતિ અને નવીન પ્રોજેકટ અંગેનું પ્રેઝન્ટેશન નિહાળ્યું હતું. ત્યારબાદ વૃક્ષારોપણ કરી નવીન ભવનનું ખાતમૂહુર્ત વિધિ પૂર્ણ કરીને સંકુલમાં આવેલા લેબોરેટરીની પ્રત્યક્ષ કામગીરી સમિક્ષા કરી હતી.