જામનગરઃ પંથકમાં મોસમનો સૌથી વધુ વરસાદ નોંધાયો છે. અતિવૃષ્ટિના કારણે ખેડૂતોની આખા વર્ષની મહેનત પર પાણી ફરી વળ્યું છે. જામનગરના કાલાવડ તાલુકાના મોટા ભાગના ગામડાઓમાં મોસમનો 200 ટકાથી વધુ વરસાદ નોંધાયો છે. કાલાવડના રામપર રવેશિયા ગામમાં અત્યાર સુધીમાં 80 ઈંચ વરસાદ પડ્યો છે. છેલ્લા બે મહિનાથી ખેડૂતો પોતાની વાડીએ પણ જઈ શકતા નથી. કારણ કે, ખેતરોમાં હજૂ ગોઠણસમા પાણી ભરેલા છે.
કાલાવડ તાલુકાના રામપર રવેશિયા ગામના ખેડૂતો માગ કરી રહ્યા છે કે, તાત્કાલિક ગામમાં સર્વે કરવામાં આવે અને ખેડૂતોને વળતર ચૂકવવામાં આવે. મહત્વનું છે કે, કાલાવડ તાલુકો કૃષિ પ્રધાન આર સી ફળદુનો મત વિસ્તારમાં આવે છે.
મુખ્ય મંત્રી કિસાન સહાય યોજના અંતર્ગત રામપર રવેશિયા ગામના ખેડૂતોને તાત્કાલિક વળતર ચૂકવવામાં આવે તેવી પણ ખેડૂતો માગ કરી રહ્યા છે. જામનગરમાં સીઝનનો સૌથી વધુ વરસાદ નોંધાયો છે અને મોટાભાગના ખેતરોમાં હજૂ પણ પાણી ભરાયેલા છે. જે કારણે મગફળી તેમજ કપાસના ઉભા પાકને વ્યાપક નુકસાન થયું છે.
જામનગર જિલ્લામાં અતિવૃષ્ટિના કારણે જગતના તાત મુશ્કેલીમાં મુકાયા છે. જામનગર જિલ્લાના ખેડૂતોએ મોંઘા બિયારણો ખરીદી અને વાવેતર કર્યું છે. જો કે, વધુ વરસાદને કારણે મોટાભાગની મગફળી પીળી પડી ગઈ છે અને પાક નિષ્ફળ ગયો છે. આવા સમયે ખેડૂતો માગ કરી રહ્યા છે કે, તાત્કાલિક સર્વે કરી વળતર આપવામાં આવે.
