અમદાવાદ : રાજ્યના મુખ્પપ્રધાન ભૂપેન્દ્ર પટેલે આજે અમદાવાદની 146મી રથયાત્રાનો પહિંદ વિધિથી પ્રારંભ કરાવ્યો હતો, ત્યારે 146મી રથયાત્રામાં કોઈ અનિચનીય ઘટના ન બને તેને ધ્યાનમાં લઈને સરકાર દ્વારા ખાસ પોલીસ બંદોબસ્ત રાખવામાં આવ્યો છે, સમગ્ર બંદોબસ્તની વાત કરવામાં આવે તો 26,091 પોલીસ જવાનો અધિકારીઓ, બોમ્બ સ્કોવોર્ડ, CCTV સર્વેલન્સ અને ડ્રોન સર્વેલન્સનો ઉપયોગ કરવામાં આવી રહ્યો છે, જ્યારે આ વર્ષની રથયાત્રામાં પ્રથમ વખત 3D મેપિંગ સિસ્ટમનો ઉપયોગ કરવામાં આવી રહ્યો છે. રાજસ્થાનના જયપુરથી સ્પેસિયલ RAF (રેપીડ એક્શન ફોર્સ) બોલાવવામાં આવી છે. સમગ્ર રથયાત્રાને મુખ્યપ્રધાન અને ડીજીપી ગાંધીનગરથી સીધું પ્રસારણ નેત્રમ મારફતે જોઈ શકશે.
સાયબર ક્રાઇમ એક્ટિવ : સોસીયલ મીડિયામાં અનેક વખત અફવાનો દોર એવો જામે છે જે પરિસ્થિતિ કાબુની બહાર પહોંચી જાય છે, ત્યારે આ વર્ષે ગુજરાતમાં રથયાત્રામાં પ્રથમવાર સમગ્ર યાત્રા રૂટ, નિજમંદિર, સ્ટ્રેટેજીક પોઇન્ટ સહિતની બાબતો પર 3 ડી મેપિંગથી નિગરાની રાખવામાં આવશે. ઉપરાંત સોશિયલ મીડિયા કે ફોન-વોટ્સએપ દ્વારા રથયાત્રાને સ્પર્શતી કોઈ ખોટી અફવાઓ ન ફેલાય તે માટે સાયબર ક્રાઈમ ટીમ અને ક્રાઇમ બ્રાન્ચનું સતત મોનીટરીંગ શરૂ કરવામાં આવ્યું છે.
45 સેન્સેટિવ લોકેશન પર 100થી વધુ CCTV : અમદાવાદની રથયાત્રા માટે પેરા મીલીટરી ફોર્સ સહિત કુલ 26,091 પોલીસ અધિકારી - કર્મચારીઓને જવાબદારી સોંપવામાં આવી છે, ત્યારે 45 જેટલા સેન્સિટીવ લોકેશન પરથી 94 CCTV કેમેરા દ્વારા વોચ રાખવામાં આવશે. 2322 બોડી વોર્ન કેમેરા સાથેના જવાનો, યાત્રામાં સાથે રહેનારા 25 વાહનો પર CCTV અને GPS સિસ્ટમ કાર્યરત કરીને યાત્રાની પળેપળની વિગતો કંટ્રોલ રૂમમાં પ્રાપ્ત થશે. આ ઉપરાંત 32 ઉડાન દ્વારા ડ્રોન સર્વેલન્સ કરીને સંવેદનશીલ વિસ્તારો પર નિરીક્ષણ કર્યું છે. 250 ધાબા પોઇન્ટ અને 25 વોચ ટાવર પણ ઉભા કરવામાં આવ્યા છે. આ રથયાત્રા દરમિયાન કોઈ અનઅધિકૃત ડ્રોન ઉપયોગમાં ન લઈ શકાય તે માટે એન્ટી ડ્રોન ટેકનોલોજી નો પણ આ વખતે પ્રથમ વાર ઉપયોગ કરવામાં આવશે.
