હરિયાણા : પ્રિયંકા ગાંધીએ આજે ગુરૂવારે સિરસામાં રોડ શો કર્યો હતો. આ દરમિયાન તેમણે લોકોને સિરસા લોકસભા બેઠક પરથી કોંગ્રેસના ઉમેદવાર કુમારી સૈલજાના સમર્થનમાં વોટ કરવાની અપીલ કરી હતી. તેમની સાથે કુમારી સૈલજા અને કિરણ ચૌધરી ઉપસ્થિત રહ્યા હતા.
પ્રિયંકા ગાંધીનો રોડ શો : સિરસામાં પ્રિયંકા ગાંધીના રોડ શોમાં ભારે ભીડ જોવા મળી હતી. આ દરમિયાન કોંગ્રેસના ઉમેદવાર કુમારી સૈલજા અને કોંગ્રેસના વરિષ્ઠ નેતા કિરણ ચૌધરીએ પણ લોકોને સંબોધિત કર્યા હતા. આ દરમિયાન ભાજપ પર નિશાન સાધતા પ્રિયંકા ગાંધીએ કહ્યું કે, હરિયાણામાં ભાજપ વિરુદ્ધ લહેર છે. લોકો તેમની રાજનીતિથી કંટાળી ગયા છે. બેરોજગારી ઘણી છે, મોંઘવારી તેની ટોચ પર છે. ચોક્કસ પરિવર્તન આવશે.
ભાજપ પર નિશાન સાધ્યું : પ્રિયંકા ગાંધીએ કહ્યું કે, હરિયાણામાં કોંગ્રેસની જબરદસ્ત લહેર છે. આખા દેશમાં સૌથી વધુ બેરોજગારી હરિયાણામાં છે, તેની કિંમત અહીંના યુવાનો ચૂકવી રહ્યા છે. લોકો ભારે મોંઘવારી, ભ્રષ્ટાચાર અને ભાજપની અસ્થિરતાથી કંટાળી ગયા છે અને એક મોટું પરિવર્તન લાવવા જઈ રહ્યા છે.
ખેડૂતોના મુદ્દે ભાજપને ઘેર્યું : પ્રિયંકા ગાંધીએ કહ્યું કે, આઝાદીની લડાઈ અને તે પહેલાથી જ આ દેશના ખેડૂતોએ આ દેશની આઝાદી માટે લડત આપી છે. ખેડૂતોએ પોતાનું લોહી આપ્યું, પોતાનો પરસેવો આપ્યો છે. કોઈ દેશને સમજવા માંગે છે તો ખેડૂતોને સમજો. જો તમે ખેતી કરો છો, પાક ઉગાડો છો તો ફક્ત પોતાના બાળકોનું જ પેટ નથી ભરતા, પરંતુ દેશનું પેટ ભરો છો. તમે દેશની કરોડરજ્જુ છો. આજે જે આપણા પીએમ છે તેઓ આ સાધારણ વાત સમજી શક્યા નથી.
પાનીપતમાં આગામી રોડ શો : કોંગ્રેસ નેતા પ્રિયંકા ગાંધી હવે સિરસા બાદ પાનીપતમાં પણ રોડ શો કરશે. પાનીપતમાં એક જાહેર સભાને સંબોધતા પ્રિયંકા ગાંધી કરનાલ લોકસભા સીટ પરથી કોંગ્રેસના ઉમેદવાર દિવ્યાંશુ બુધિરાજા માટે પ્રચાર કરશે. આ સીટ પર ભાજપ તરફથી પૂર્વ સીએમ મનોહરલાલ ચૂંટણી લડી રહ્યા છે.
