আমগুৰি, ২৯ জুলাই : আমগুৰি দিখৌমুখত এচ বি আই গ্ৰাহকৰ এটি এম হেক কৰি দুষ্টচক্ৰই লুটিলে প্ৰায় ২.৫০ লাখ টকা ৷ দিখৌমুখ উজনি ভৰলুৱা গাঁৱৰ অৱসৰপ্ৰাপ্ত শিক্ষয়িত্ৰী লাৱণ্য শইকীয়াৰ একাউন্ট দুষ্টচক্ৰই হেক কৰি চাৰি দিনত লুটিলে প্ৰায় ২.৫০ লাখ টকা ৷ বিগত ১৭ জুলাইত লাৱণ্য শইকীয়াৰ স্বামী পূৰ্ণ শইকীয়াই ৰংঘৰ চাৰিআলিৰ সমীপৰ এচ বি আই এটি এমৰ পৰা ২০ হাজাৰ টকা উলিওৱাৰ পাচতে ১৮ তাৰিখৰ পৰা ২১ তাৰিখলৈ দুষ্টচক্ৰই লুটিলে প্ৰায় ২.৫০ লাখ টকা । ইতিমধ্যে ভুক্তভোগী পৰিয়ালটোৱে গৌৰীসাগৰস্থিত এচ বি আই শাখাত তদন্তৰ বাবে অৱগত কৰা লগতে গৌৰীসাগৰ আৰক্ষী থানাত এজাহাৰ দাখিল কৰিছে ।
পৰিয়ালটোৱে জানিবলৈ দিয়া মতে,১৮ জুলাইত নাগালেণ্ডৰ মন জিলাৰ মিছ কবিতা সোনাৰৰ নামত ৪০ হাজাৰ, পামগুণ্ড শিউপ্ৰসাদ পেট্ৰ'ল পাম্পৰ নামত দুবাৰত ২০ হাজাৰকৈ মুঠ ৪০ হাজাৰ এটিএমৰ যোগেদি ট্ৰান্সফাৰ কৰা হৈছে । লগতে ১৯ জুলাইত বৰপেটাৰ নকুল চন্দ্ৰ ডেকাৰ নামত ৪০ হাজাৰ, গুৱাহাটীৰ আনন্দ নগৰ এফ এছ ৰ'ডৰ এ টি এমৰ পৰা দুবাৰত ২০ হাজাৰকৈ মুঠ ৪০ হাজাৰ টকা ট্ৰান্সফাৰ কৰিছে দুষ্টচক্ৰই । এনেদৰে মানসিকভাৱে দীৰ্ঘদিন ধৰি অসুস্থ হৈ থকা অৱসৰপ্ৰাপ্ত শিক্ষয়িত্ৰী লাৱণ্য শইকীয়াৰ শাৰীৰিক চিকিৎসাৰ বাবে ৰখা ধনখিনি দুষ্টচক্ৰই লুটি নিয়াত পৰিয়ালটোত সৃষ্টি হৈছে এক অবৰ্ণনীয় পৰিস্থিতিৰ । সেয়েহে পৰিয়ালটোৱে প্ৰশাসনক দুষ্টচক্ৰটোক কৰায়ত্ত্বৰ দাবী জনোৱাৰ লগতে এচ বি আইক তদন্তত সহযোগ কৰিবলৈ দাবী জনাইছে ।
