শিৱসাগৰ,19 ছেপ্তেম্বৰ : দেওবাৰে শিৱসাগৰ প্ৰেছ ক্লাৱত ক’ভিড নীতি-নিয়যৰ মাজেৰে অনুষ্ঠিত এক গাম্ভীৰ্যপূৰ্ণ অনুষ্ঠানত জ্যেষ্ঠ সাংবাদিক মনজিৎ বৰাক শ্বহীদ সাংবাদিক কমলা শইকীয়া সোঁৱৰণী বঁটা প্ৰদান কৰা হয় । সদৌ অসম কলিতা জনগোষ্ঠী ছাত্ৰ সন্থাৰ শিৱসাগৰ জিলা সমিতিৰ উদ্যোগত প্ৰদান কৰি অহা এই বঁটা ২০১২১ বৰ্ষৰ বাবে দেওবাৰে জ্যেষ্ঠ সাংবাদিক মনজিৎ বৰাক প্ৰদান কৰা হয় । শিৱসাগৰৰ সমাজকৰ্মী এম.আই.বড়াৰ সভাপতিত্বত অনুষ্ঠিত হয় এই বঁটা প্ৰদান অনুষ্ঠান ৷
গাম্ভীৰ্যপূৰ্ণ এই অনুষ্ঠানটোত শিৱসাগৰৰ জ্যেষ্ঠ সাংবাদিক এনামুদ্দিন আহমেদ, শিৱসাগৰ জিলা সাংবাদিক সংস্থাৰ সভাপতি ভৈৰৱ মুণ্ডা, এনজিঅ’ কৰ্মী ফৰিদ ইছলাম হাজৰিকা আৰু AJYCPৰ উপদেষ্টা জয়সূৰ্য বৰা বিশিষ্ট অতিথিৰূপে উপস্থিত থাকে । ছাত্ৰ সংগঠনটোৰ তৰফৰ পৰা মনজিৎ বৰাক সম্বৰ্ধনা পত্ৰৰ লগতে গামোচা, জাপি, চেলং চাদৰ, সঁফুৰাৰে উৰুলি ধ্বনিৰ মাজৰে বঁটা প্ৰদান কৰা হয় ।
বঁটা গ্ৰহণ কৰি জ্যেষ্ঠ সাংবাদিক গৰাকীয়ে কেতবোৰ তাৎপৰ্যপূৰ্ণ বিষয় উল্লেখ কৰি কয় যে, ‘‘সাংবাদিকতাৰ বাবে বহু অজান শত্ৰু আছে । কিন্তু সমাজক গতি প্ৰদান কৰাৰ স্বাৰ্থত আমি আমাৰ কাম কৰি যাবলৈ বাধ্য । এতিয়া সময় সলনি হৈছে । এক সাম্প্ৰদায়িক পৰিৱেশৰ সৃষ্টি । বিভেদৰ বীজ সিঁচা হৈছে । এই বীজ এচাম স্বাৰ্থলোভীয়ে পেচাগত কাৰণত বিয়পাইছে । এই কথাবোৰ ৰাইজে বুজিব লাগিব আৰু ৰাইজে বুজিছে’’ ।
লগতে পঢ়ক: অভিশপ্ত বাঘজান কাণ্ডৰ পাছতো শিক্ষা নহ'ল নেকি অইল ইণ্ডিয়া লিমিটেডৰ ?
তেওঁ আৰু কয় যে, ‘‘তথাপিও একাংশ এই সোঁতত উঁটি গৈছে । এই বিষয় সমূহক লৈ আমি অধিক সজাগ হ'ব লাগিব আৰু ইয়াতে এজন সাংবাদিকৰ দায়িত্ব বাঢ়ে । শ্বহীদ সাংবাদিক কেৱল এজন সাংবাদিক নাছিল । আধুনিক দিখৌমুখৰ নিৰ্মাতা শইকীয়া এজন শিক্ষা সংস্কাৰক, শিক্ষাবিদ, স্বাধীনতা সংগ্ৰামী আৰু সংস্কাৰক আছিল’’ ।
ইয়াৰ উপৰিও জ্যেষ্ঠ সাংবাদিক মনজিৎ বৰাই উল্লেখ কৰে কৰে যে, ‘‘শ্বহীদ সাংবাদিক কমলা শইকীয়াই কলমৰ মাধ্যমেৰে সমাজৰ অপশক্তি সমূহক চিনাক্ত কৰি এই সমূহৰ বিৰুদ্ধে সৰৱ হৈ পৰিছিল । যাৰ বাবে এচামে নিজ স্বাৰ্থত বাধা পোৱাৰ বাবে তেওঁক হত্যা কৰিছিল । আজি এই কথা স্পষ্ট হৈ পৰিল যে আলফাই তেওঁক হত্যা কৰিল’’ ।
লগতে পঢ়ক: বঢ়মপুৰত দিনজোৰা কাৰ্যসূচীৰে শ্বহীদ দিৱস উদযাপন
লগতে তেওঁ কয় যে, ‘‘কিছুদিন পূৰ্বে পৰেশ বৰুৱাই স্বীকাৰ কৰে যে কমলা শইকীয়াৰ হত্যা কৰাৰ সময়ত অৰবিন্দ ৰাজখোৱা আলফাৰ সেনাধক্ষ্যৰ দায়িত্বত আছিল । এই হত্যাৰ বাবে অৰবিন্দ ৰাজখোৱাক জেৰা কৰিব লাগে যিটো আজিলৈকে কৰা নাই । সেই সময়ত তেওঁৰ হত্যাৰ অনুসন্ধান কৰা আৰক্ষী বিষয়া সকলৰ বিৰুদ্ধে গোচৰ ৰুজু কৰিব লাগে । আজিলৈকে বহু সাংবাদিকক হত্যা কৰা হ'ল । কিন্তু এটা হত্যাকাণ্ডৰো আইনী বিচাৰ নহ’ল’’ ।
ইয়াৰ উপৰিও তেওঁ কয় যে, ‘‘গুৱাহাটী মহানগৰৰ জনবহুল ঠাইত পৰাগ দাসক হত্যা কৰাৰ পাচতো আজিলৈকে সেই হত্যাৰ বিচাৰ নহ’ল । আচলতে চৰকাৰৰ প্ৰতাৰণাৰ বাবে এই সমূহৰ বিচাৰ নহয় । আৰক্ষীৰ বিফলতা আৰু দুৰ্নীতিৰ বাবে এনে সমূহৰ বিচাৰ নহয়’’ । আনহাতে, কলিতা ছাত্ৰ সন্থাই কমলা শইকীয়াৰ হত্যাৰ বিচাৰৰ এক দৃঢ় পদক্ষেপ লৈ তেওঁক ন্যায় প্ৰদানৰ বাবে আহবান জনায় ।
লগতে পঢ়ক: সমস্যাৰে জৰ্জৰিত মহানগৰীৰ হৰিজন সম্প্ৰদায়ৰ লোকসকল...
