শিৱসাগৰ, 28 জানুৱাৰী: শিৱসাগৰৰ ঐতিহাসিক তলাতল ঘৰৰ বাকৰিত সদৌ অসম গাওঁৰক্ষী সংগঠনৰ 72 সংখ্যক প্ৰতিষ্ঠা দিৱস অনুষ্ঠিত হৈছে ৷ অসমৰ বিভিন্ন জিলাৰ পৰা অহা হাজাৰৰো অধিক প্ৰতিনিধিয়ে অংশগ্ৰহণ কৰিবলগীয়া এই প্ৰতিষ্ঠা দিৱসত শুকুৰবাৰে মুখ্যমন্ত্ৰী সৰ্বানন্দ সোণোৱাল উপস্থিত থাকিব বুলি জানিব পৰা গৈছে ৷
জানিব পৰা মতে বৃহস্পতিবাৰৰ পৰা অসমৰ বিভিন্ন প্ৰান্তৰ পৰা অহা প্ৰতিনিধি সকলে এক প্ৰতিনিধি সভাত অংশ লোৱাৰ লগতে শুকুৰবাৰে প্ৰতিষ্ঠা দিৱস উপলক্ষে এক সাংস্কৃতিক শোভাযাত্ৰা বাহিৰ কৰা হ'ব । শোভাযাত্ৰাৰ অন্তত অনুষ্ঠিত হবলগীয়া মুকলি সভাত মুখ্যমন্ত্ৰী সৈতে বহুকেইগৰাকী বিশিষ্ট লোক সকলে অংশ লব বুলি জানিব পৰা গৈছে ৷
উল্লেখ্য যে প্ৰতিষ্ঠা দিৱসৰ প্ৰতি লক্ষ্য ৰাখি শিৱসাগৰৰ ঐতিহাসিক কীৰ্তিচিহ্ন ৰংঘৰ আৰু তলাতল ঘৰক আৰক্ষী প্ৰশাসনে আলোকসজ্জাৰে সজাই তুলিছে ৷ শিৱসাগৰৰ কীৰ্তিচিহ্ন সমূহৰ প্ৰতি ৰাইজৰ দৃষ্টি আকৰ্ষণৰ কৰাৰ উদ্দেশ্যে এনে আলোকসজ্জাৰ ব্যৱস্থা কৰা হৈছে বুলি আৰক্ষী প্ৰশাসনে জানিবলৈ দিছে ৷
ৰাইজ আৰু গাওঁৰক্ষী বাহিনীৰ মাজত সম্পৰ্ক শক্তিশালী কৰাৰ উদ্দেশ্যে গাওঁৰক্ষী বাহিনীৰ কৰ্তৃপক্ষই এই প্ৰতিষ্ঠা দিৱসত উপস্থিত থাকিবলৈ ৰাইজক আহ্বান জনাইছে ৷
লগতে পঢ়ক:দুদিনীয়া কাৰ্যসূচীৰে শিৱসাগৰত ৰংপুৰ মে-ডাম-মেফিৰ আয়োজন