নলবাৰী, 27 নৱেম্বৰ: ৰাজ্যৰ ভিন্ন প্ৰান্তৰ লগতে নলবাৰীৰ পৱিত্ৰ শ্ৰী শ্ৰী হৰিমন্দিৰ বাকৰিতো দেওবাৰৰে পৰা আৰম্ভ হয় 90 সংখ্যক নলবাৰী ৰাস মহোৎসৱৰ । এই ৰাস মহোৎসৱৰ শুভ উদ্বোধন কৰে হিন্দী ধাৰাবাহিক 'মহাভাৰত' ত শ্ৰী কৃষ্ণ চৰিত্ৰৰ জৰিয়তে জনতাৰ হৃদয় জিনিবলৈ সক্ষম হোৱা প্ৰখ্যাত অভিনেতা নীতিশ ভৰদ্বাজে । ইয়াৰ পূৰ্বে অভিনেতাগৰাকীয়ে ৰাস মহোৎসৱ উদযাপন সমিতিৰ সভাপতি তথা মন্ত্ৰী জয়ন্তমল্ল বৰুৱা, চন্দ্ৰমোহন পাটোৱাৰীৰ সৈতে গৰ্ডন উচ্চতৰ মাধ্যমিক বিদ্যালয় খেলপথাৰৰ পৰা হৰি মন্দিৰ বাকৰিলৈ উলিওৱা এক বিশাল সাংস্কৃতিক শোভাযাত্ৰাত অংশ লয় ।
ৰাস উদ্বোধন কৰি অভিনেতাগৰাকীয়ে সংবাদ মাধ্যমৰ সমুখত অসমৰ প্ৰাকৃতিক সৌন্দৰ্যই তেওঁক মুগ্ধ কৰে বুলি মন্তব্য কৰে ৷ নলবাৰী ৰাস ৰাইজৰ লোক বিশ্বাস আৰু সাংস্কৃতিক পৰম্পৰা বুলি অভিহিত কৰে অভিনেতাজনে । আনহাতে, অসমৰ বিহু নৃত্যত তেওঁ আপ্লুত হোৱা বুলি উল্লেখ কৰি অসম তথা উত্তৰ পূৰ্বাঞ্চলৰ কলা-সংস্কৃতিৰে দেশক সংযুক্তকৰণত বিগত 50-60 বছৰত পূৰ্বৰ চৰকাৰ অসফল হোৱাৰ ফলত মুম্বাই, দিল্লী আদিৰ দৰে ঠাইত ইয়াৰ কলা-সংস্কৃতিৰ প্ৰভাৱ পৰা নাছিল বুলি প্ৰকাৰন্তৰে কংগ্ৰেছ দলটোক সমালোচনা কৰে । ইয়াৰোপৰি ৰাজ্যৰ মুখ্যমন্ত্ৰী হিমন্ত বিশ্ব শৰ্মাৰ প্ৰশংসাত পঞ্চমুখ হৈ পৰা দেখা গ'ল অভিনেতা তথা প্ৰাক্তন বিজেপি সাংসদগৰাকীক ।
হিমন্ত বিশ্ব শৰ্মাক প্ৰশংসা কৰি ভৰদ্বাজে হিমন্ত বিশ্ব শৰ্মাই অসমত বহুত ভাল কাম কৰি আছে আৰু তেওঁৰ নেতৃত্বত অসম আগুৱাই যাব বুলি আশা প্ৰকাশ কৰে । 90 সংখ্যক ৰাস মহোৎসৱৰ এই উদ্বোধনী অনুষ্ঠানত অভিনেতাগৰাকীৰ উপৰিও অতিথি হিচাপে উপস্থিত আছিল শংকৰাচাৰ্য স্বামী অধ্যক্ষ জনানন্দ দেৱতীৰ্থ ।
লগতে পঢ়ক: ৰাস মহোৎসৱৰ প্ৰথমদিনাই লোকাৰণ্য ঐতিহ্যমণ্ডিত হৰিমন্দিৰৰ বাকৰি
