নলবাৰী, ১০ ছেপ্টেম্বৰ: অসম আন্দোলনৰ সংগ্ৰামী নেতা, নলবাৰী মহকুমা পৰিষদৰ প্ৰাক্তন সভাপতি, নাট্যকাৰ-অভিনেতা, বিশিষ্ট সংগঠক, সাহিত্যপ্রেমী তথা নলবাৰী জিলা জ্যেষ্ঠ নাগৰিক সন্মিলনৰ কৰ্ণধাৰ সমিতিৰ অন্যতম সদস্য গদাধৰ বৰ্মনৰ সোঁৱৰণত এলানি অনুষ্ঠানৰ আয়োজন কৰা হয় । উক্ত অনুষ্ঠানত তেওঁৰ সমাজমুখী জীৱন যাত্ৰাৰ স্মৃতিচাৰণ কৰাৰ লগতে গদাধৰ বৰ্মন ৰচিত “বিবিধ বার্তিকা” শীর্ষক গ্ৰন্থখন উন্মোচন কৰা হয় ।
আনহাতে,গদাধৰ বৰ্মনে দৈনন্দিন জীৱনত ব্যৱহাৰ কৰা বিভিন্ন সামগ্ৰী সংৰক্ষণ কৰাৰ উদ্দেশ্যে পৰিয়ালে নির্মাণ কৰি উলিওৱা গদাধৰ বৰ্মন সংগ্ৰহালয়টোও আনুষ্ঠানিকভাৱে উন্মোচন কৰা হয় । এই স্মৃতিচাৰণ সভাত বন্তি প্ৰজ্বালন কৰে চন্দনা বর্মন, প্রয়াত গদাধৰ বৰ্মনৰ সহধর্মিণী, গোবিন্দ কুমাৰ বৰ্মনে । গদাধৰ বৰ্মন সংগ্ৰহালয় উদ্বোধন কৰে ড৹ ৰাণী মুদিয়াৰ ডেকাই ।
ইয়াৰ পিছতে গ্ৰন্থ উন্মোচন কৰে অসম প্ৰকাশন পৰিষদৰ সচিব প্রমোদ কলিতাই । ইয়াৰ লগে লগে স্মৃতিচাৰণ সভা অনুষ্ঠিত হয় । নলবাৰী জিলা জ্যেষ্ঠ নাগৰিক সন্মিলনৰ সভাপতি ড৹ প্রমোদ হালৈ পৌৰোহিত্বত অনুষ্ঠিত সভাত গদাধৰ বৰ্মনৰ পৰিয়াল তথা গুণমুগ্ধই স্মৃতি ৰোমন্থণ কৰে । ইয়াৰ পিছত স্মৃতিচাৰণ কৰে পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতা আৰু প্ৰাক্তন বিধায়ক পবীন্দ্ৰ ডেকাই ।
ইপিনে, সভাৰ অন্তত জি-২০ ত বিকৃত বিহু নৃত্য আৰু ইণ্ডিয়া-ভাৰতক লৈ প্ৰতিক্ৰিয়া ব্যক্ত কৰে বিধায়ক ৰমেন্দ্ৰ নাৰায়ণ কলিতাই । বিধায়কগৰাকীয়ে বিহুক বিজতৰীয়া কৰা ঘটনাৰ তদন্ত কৰিবলৈ আহ্বান জনাই । ইয়াৰ লগতে সমগ্ৰ দেশত চৰ্চাত থকা ইণ্ডিয়া আৰু ভাৰতৰ নাম সন্দৰ্ভত মত পোষণ কৰে ।
বিধায়কগৰাকীয়ে উল্লেখ কৰে যে দেশৰ নাম পৰিবৰ্তন কৰাৰ সিদ্ধান্ত হোৱা নাই । এতিয়া চৰ্চাতহে আছে । আনহাতে, বিধায়কগৰাকীয়ে কয় যে দেশৰ নাম "ইণ্ডিয়া" আতৰাই অকল "ভাৰত" ৰাখিলে যথেষ্ট সমস্যাৰো সৃষ্টি হ'ব । কিয়নো ইণ্ডিয়া নামেৰেই দেশৰ কেন্দ্ৰীয় বেংক, নথি-পত্ৰসমূহ আছে । সেয়ে কেন্দ্ৰীয় চৰকাৰে ইয়াৰ ওপৰত চিন্তা-চৰ্চা কৰিহে উচিত সিদ্ধান্ত ল'ব লাগে বুলি তেওঁ কয় ।
