নগাঁও, ৭ নৱেম্বৰ : সোমবাৰে একেদিনাই নগাঁৱৰ ১১ টাকৈ পথৰ শুভ উদ্বোধন কৰে নগাঁও সদৰ সমষ্টিৰ বিধায়ক ৰূপক শৰ্মাই । নতুনকৈ পকীকৰণ কৰা ১১টাকৈ পথৰ উদ্বোধন কৰি শাসকীয় বিজেপি চৰকাৰৰ কাৰ্যকালত ৰাজ্যৰ সামগ্ৰিক উন্নয়ন হোৱা বুলি উল্লেখ কৰে বিধায়কজনে সংবাদ মাধ্যমৰ সন্মুখত ।
শাসকীয় দলটোৰ সফলতাৰ বিষয়ে উল্লেখ কৰাৰ লগতে পূৰ্বৰ কংগ্ৰেছ চৰকাৰক সমালোচনা কৰে বিধায়ক ৰূপক শৰ্মাই । সংবাদ মাধ্যমৰ সন্মুখত কংগ্ৰেছ চৰকাৰক সমালোচনা কৰি বিধায়ক ৰূপক শৰ্মাৰ মন্তব্য । নগাঁৱতে কংগ্ৰেছৰ শাসন কালত সন্ধিয়া জীয়ৰী আৰু বোৱাৰী ওলাব নোৱাৰা এক পৰিস্থিতিৰ সৃষ্টি হৈছিল । চহৰ এলেকাতেই নিৰাপত্তাহীনতাত ভুগিছিল জীয়ৰী-বোৱাৰীয়ে । কিন্তু বিজেপি শাসনলৈ অহাৰ পিচৰ পৰা নগাঁৱত বৰ্তমান সেই পৰিৱেশ নাই। পুনৰ যাতে পূৰ্বৰ দিন ঘূৰি নাহে তাৰ বাবে নগাঁৱৰ ৰাইজ সচেতন হ’ব লাগিব বুলি মন্তব্য কৰে বিধায়ক ৰূপক শৰ্মাই ।
সমান্তৰালকৈ কংগ্ৰেছ আৰু এ আই ইউ ডি এফ ভাই-ভাই, এটা পৰিয়াল আৰু এটা মুদ্ৰাৰ ইপিঠি-সিপিঠি বুলিও মন্তব্য কৰে বিধায়ক ৰূপক শৰ্মাই । নিৰ্বাচনৰ পূৰ্বে দুয়োটা দলেই দুয়োটা দলৰ বিৰুদ্ধে কথা কয় কিন্তু নিৰ্বাচন আহিলেই একলগ হৈ পৰে । কংগ্ৰেছ আৰু এ আই ইউ ডি এফয়ে প্ৰতিটো নিৰ্বাচনে একেলগে অৱৰ্তীণ হয় ।
আনহাতে এ আই ইউ ডি এফ প্ৰধান মৌলানা বদৰুদ্দিন আজমলৰ শেহতীয়া বিতৰ্কিত মন্তব্যৰ ওপৰত বিধায়ক ৰূপক শৰ্মাই প্ৰতিক্ৰিয়া কৰি কয় "আমাৰ যুৱ প্ৰজন্মই নিজৰ পথাৰ আৰু হাল চিনি নাপায় । আমাৰ যুৱ প্ৰজন্মৰ কৰ্ম স্পৃহা আৰু সচেতন নোহোৱা বাবেই আজমলৰ দৰে ব্যক্তিয়ে এই ধৰণৰ মন্তব্য কৰিবলৈ সাহস পাইছে । আমি পথাৰো আমাৰ আৰু বজাৰো আমাৰ বুলি কওঁ কিন্তু এইবোৰ লাহে লাহে আমাৰ পৰা নোহোৱা হৈ গৈছে । আমাৰ দৈনন্দিন কামত তেওঁলোকে দখল দিব পাৰিছে । আমাৰ যুৱ প্ৰজন্ম আগুৱাই আহিলে আৰু কেতিয়াও আজমলৰ দৰে ব্যক্তিয়ে এই ধৰণে উপলুঙা কৰিবলৈ সাহস নাপাব ।
সোমবাৰে বিধায়ক ৰূপক শৰ্মাই পথ উদ্বোধন কৰা অনুষ্ঠানত নগাঁও পৌৰ সভাৰ উপ পৌৰপতি সীমান্ত বৰাকে আদি কৰি বিষয়াসকল উপস্থিত থাকে ।
লগতে পঢ়ক : FIR against Badruddin Ajmal at Tezpur : তেজপুৰত আজমলৰ বিৰুদ্ধে এজাহাৰ
