মিছা, 23 ছেপ্টেম্বৰঃ কলিয়াবৰৰ মিছাত শোকাবহ পথ দুৰ্ঘটনা ৷ থিতাতে নিহত এগৰাকী ছাত্ৰী ৷ প্ৰাপ্ত তথ্য মতে, কলিয়াবৰৰ মিছাৰ পৰা নিজৰিৰ নিজ ঘৰলৈ AS-02U-9107 নম্বৰৰ মটৰ চাইকেলেৰে প্ৰিয়ংকা কিণ্ড আৰু লোৰেন্স এক্কা নামৰ যুৱক যুৱতীহালে আহি আছিল ৷ আহি থকা অৱস্থাতে একে দিশেৰে গৈ থকা AS-23AC-0333 নম্বৰৰ এখন ট্ৰাকে পিছফালৰ পৰা মটৰ চাইকেলখনত প্ৰচণ্ড খুন্দা মাৰে যাৰ ফলত যুৱতী গৰাকী থিতাতে নিহত হয় ৷ নিহত প্ৰিয়ংকা কিণ্ড বামুনী উচ্চ মাধ্যমিক বিদ্যালয়ৰ নৱম শ্ৰেণীৰ ছাত্ৰী বুলি জানিব পৰা গৈছে ৷
মিছা আৰক্ষীয়ে ঘটনাস্থলীত উপস্থিত হৈ দুয়োকে ততাতৰীয়াকৈ জখলাবন্ধা চিকিৎসালয়লৈ প্ৰেৰণ কৰে যদিও প্ৰিয়ংকা কিণ্ডক মৃত ঘোষণা কৰাৰ বিপৰীতে লোৰেন্স এক্কাক প্ৰাথমিক চিকিৎসা প্ৰদান কৰে । সম্প্ৰতি মিছা আৰক্ষীয়ে প্ৰিয়ংকা কিণ্ডক মৰণোত্তৰ পৰীক্ষাৰ বাবে নগাঁও অসামৰিক চিকিৎসালৈ প্ৰেৰণ কৰিছে ৷
ইফালে দুৰ্ঘটনা সংঘটিত কৰিয়েই ঘটনাস্থলীৰ পৰা ট্ৰাকখন পলায়ন কৰিবলৈ চেষ্টা কৰে যদিও কলিয়াবৰ আৰক্ষীয়ে ট্ৰাকখন জব্দ কৰাৰ লগতে চালক মহম্মদ ৰজত আলী আনচাৰীক গ্ৰেপ্তাৰ কৰে ।
