নগাঁও, 18 নৱেম্বৰ : ক’ভিডৰ মাত্ৰা আংশিকভাৱে কমিছে যদিও বৰ্তমানো ই শেষ হৈ যোৱা নাই ৷ কিন্তু এই মহামাৰীৰ পৰা সম্পূৰ্ণ প্ৰতিৰোধৰ বাবে দেশত অব্যাহত আছে টীকাকৰণ ব্যৱস্থা ৷ কেন্দ্ৰীয় চৰকাৰৰ "Har Ghar Dastak" টীকাকৰণ অভিযানৰ অধীনত অসম চৰকাৰেও ৰাইজক সজাগ কৰিবৰ বাবে বিভিন্ন পন্থা হাতত লৈছে ৷ সমগ্ৰ ৰাজ্যতে এই পৰ্যন্ত ক’ভিড প্ৰতিষেধক ল’বলৈ ৰৈ যোৱা প্ৰতিজনেই যাতে প্ৰথম পালি ক’ভিড প্ৰতিষেধক (Covid Vaccine) ল’ব পাৰে সেইবিষয়ত গুৰুত্ব প্ৰদান কৰিছে ৰাজ্য চৰকাৰে ৷
এই উদ্দেশ্যে বুধবাৰে অসম চৰকাৰৰ স্বাস্থ্য মন্ত্ৰী কেশৱ মহন্তই নগাঁৱৰ উপাযুক্তৰ কাৰ্যালয়ৰ সভা-কক্ষত জিলাখনৰ ক’ভিড টীকাকৰণ সম্পৰ্কে শেহতীয়া পৰিস্থিতৰ বুজ ল’বলৈ এখনি পৰ্যালোচনা সভাত মিলিত হয় ৷ সভাখনত মন্ত্ৰীগৰাকীয়ে বিশেষভাৱে টীকাকৰণ অভিযানৰ তিনিটা মূল দিশৰ ওপৰত গুৰুত্ব আৰোপ কৰি পাহাৰীয়া আৰু চাহবাগানৰ অঞ্চলসমূহৰ ওপৰত বিশেষ গুৰুত্ব দিবলৈ বিষয়াসকলক নিৰ্দেশ দিয়ে ৷
টীকাকৰণ সন্দৰ্ভত যাৱতীয় তথ্য আৰু নথিপত্ৰ সমূহ প্ৰস্তুত কৰাৰ লগতে জনসাধাৰণৰ মাজত ধাৰ্মিক ভেদ-ভাৱ আঁতৰ কৰোৱাতো আগ্ৰহ প্ৰকাশ কৰে তেখেতে ৷ সভাত ৰাষ্ট্ৰীয় স্বাস্থ্য অভিযানৰ কাৰ্যবাহী পৰিচালক ডাঃ মনোজ চৌধুৰীয়ে টীকাকৰণৰ ওপৰত বহুমূলীয়া ভাষণ প্ৰদান কৰে ৷ উক্ত সভাখনত নগাঁও সদৰ সমষ্টিৰ বিধায়ক ৰূপক শৰ্মা, নগাঁও জিলাৰ উপায়ুক্ত হিৱাৰে নিসৰ্গ গৌতমকে প্ৰমুখ্য কৰি জিলা প্ৰশাসনৰ শীৰ্ষ বিষয়া, স্বাস্থ্য আৰু আৰক্ষী বিভাগৰ শীৰ্ষ বিষয়া সকল উপস্থিত থাকে ৷
লগতে চাওক : 3 কোটি টকাৰ নিচাজাতীয় সামগ্ৰী জব্দ ৰাতাবাৰী আৰক্ষীৰ
