তেজপুৰ, 4 নৱেম্বৰ : তিনিদিনীয়া কাৰ্যসূচীৰে অসম ভ্ৰমণলৈ অহা ভূটানৰ ৰজা জিগমে খেচাৰ নামগিয়েল ৱাংচুকৰ অসম ভ্ৰমণৰ আজি দ্বিতীয় দিন ৷ শনিবাৰে বিশ্ব ঐতিহ্য কাজিৰঙা ৰাষ্ট্ৰীয় উদ্যানত উপস্থিত হয় ৰজা ৱাংচুক ৷ আজি বিয়লিৰ ভাগত কাজিৰঙাৰ আই অ আৰ এ ৰিট্ৰিটত উপস্থিত হোৱা ৱাংচুক উষ্ম আদৰণি জনাই মন্ত্ৰী চন্দ্ৰ মোহন পাটোৱাৰী আৰু অতুল বৰাই ৷
আজি বিয়লিৰ ভাগত কাজিৰঙা ৰাষ্ট্ৰীয় উদ্যানৰ মিহিমুখ বান শিবিৰৰ পৰা জীপ চাফাৰী কৰি মিহিমুখত হাতীৰ গা-ধুৱা দৃশ্য উপভোগ কৰে ৰজাগৰকীয়ে ৷ ইফালে আই অ আৰ এত ৰজা ৱাংচুকে পৰিৱেশকৰ্মীৰ সৈতে অন্তৰংগ আলোচনাত মিলিত হ’ব বুলিও জানিব পৰা গৈছে । আনহাতে ৰজা ৱাংচুকে প্ৰথমবাৰৰ বাবে বিশ্ব ঐতিহ্য কাজিৰঙা ৰাষ্ট্ৰীয় উদ্যানত পৰিদৰ্শন কৰিছে ।
ইয়াৰ পূৰ্বে আজি গুৱাহাটীত অসম চৰকাৰৰ শিক্ষা মন্ত্ৰী ডাঃ ৰণোজ পেগুৰ লগতে শিক্ষা বিষয়া, পৰিৱেশ বিজ্ঞানৰ ছাত্ৰ-ছাত্ৰীৰ লগত মত বিনিময় কৰে ৰজাগৰাকীয়ে । আনহাতে ভূটানৰ ৰজাগৰাকী অসমত উপস্থিত হোৱাৰ পূৰ্বে অসম চৰকাৰে সদিচ্ছাৰ ইংগিত হিচাপে বুধবাৰে ৰাজ্যিক কেবিনেটে কেতবোৰ সিদ্ধান্ত গ্ৰহণ কৰিছিল ৷
কেবিনেটৰ সিদ্ধান্ত অনুসৰি, ভূটানৰ ছাত্ৰ-ছাত্ৰীৰ বাবে অসমৰ মেডিকেল কলেজত এম বি বি এছ পাঠ্যক্ৰমৰ বাবে আসন সংৰক্ষণত অনুমোদন জনাইছিল ৷ নলবাৰী মেডিকেল কলেজ হাস্পিতালত দুখন আৰু ফখৰুদ্দিন আলী আহমেদ মেডিকেল কলেজ এণ্ড হাস্পিতালত এখন আসন সংৰক্ষণৰ ব্যৱস্থা কৰা হৈছে।
উল্লেখ্য যে, শুকুৰবাৰে সন্ধিয়া মুখ্যমন্ত্ৰী ড৹ হিমন্ত বিশ্ব শৰ্মাই ভূটানৰ ৰজাক সাক্ষাৎ কৰি বিশেষ আলোচনাত মিলিত হয় ৷ বৈঠকত অসম আৰু ভূটান সম্পৰ্কীয় বিভিন্ন বিষয়ৰ ওপৰত আলোচনা কৰে ৷ ভূটানৰ ৰজাক সাক্ষাৎ কৰাৰ পিচত মুখ্যমন্ত্ৰী শৰ্মাই X (টুইটাৰ) ত এইদৰে কয়, ‘‘ "তেওঁৰ ভ্ৰমণ অসমৰ বাবে এক ডাঙৰ সন্মান ৷ এই ভ্ৰমণ আমাৰ ৰাষ্ট্ৰসমূহৰ মাজৰ প্ৰাচীন সম্পৰ্কৰ এক সাক্ষ্য, যাৰ উদাহৰণ হৈছে শৈক্ষিক সংযোগ, আন্তঃগাঁথনিৰ অংশীদাৰিত্ব, স্বাস্থ্যসেৱাৰ ক্ষেত্ৰত সহযোগিতা, আধ্যাত্মিক ঐতিহ্য আৰু জনসাধাৰণৰ মাজৰ সম্পৰ্ক ৷’’
লগতে পঢ়ক:Bhutan King Assam Visit : গুৱাহাটীত ভূটানৰ ৰজাৰে বৈঠক মুখ্যমন্ত্ৰী হিমন্ত বিশ্ব শৰ্মাৰ
