মৰিগাঁও, 9 আগষ্ট : মৰিগাঁও জিলাৰ টেঙাগুৰি গাঁৱত এতিয়া বিছা পোক (Jute Hairy)ৰ সন্ত্ৰাস । বিঘাই বিঘাই মৰাপাটৰ খেতি নষ্ট কৰিছে বিছা পোকে । সম্পূৰ্ণৰূপে লঠঙা কৰিছে মৰাপাট (Jute) খেতি । এফালৰ পৰা বিছাই তহিলং কৰি গৈছে বাৰীৰ ফচল । আনকি শোৱনী কোঠা, পাকঘৰ, মজিয়া সকলোতে এতিয়া কেৱল বিছা আৰু বিছা ।
ঔষধ ছটিয়াই অথবা বাঢ়নীৰে সাৰিও খেদিব পৰা নাই জাক জাক বিছাক । বিছাৰ এই সন্ত্ৰাসৰ বাবে দুঃচিন্তাত পৰিছে চহা কৃষক আৰু তেওঁলোকৰ পৰিয়াল ৷ অতি কষ্টৰে ৰোপণ কৰা মৰাপাটৰ খেতিত লক্ষাধিক বিছাৰ আক্ৰমণ কৰাত লোকচানক লৈ শংকিত হৈ পৰিছে কৃষকসকল । ফলস্বৰূপে মূৰে-কপালে হাত দিবলগীয়া হৈছে একাংশ খেতিয়ক ৷
লগতে পঢ়ক : ডাইনী নে আন কিবা : কিয় হত্যা কৰা হ’ল বেলা মাৰ্ডিক ?
বিছা পোকৰ এই আক্ৰমণৰ বাবে বিশেষকৈ সন্তানক লৈ শংকাত ভূগিছে গাঁৱৰ মহিলাসকল ৷ শৰীৰত আক্ৰমণ কৰাৰ আশংকাত ভূগিছে গাঁৱবাসীয়ে ৷ বিগত কেইবাদিনৰ পৰাই বিছাৰ জাকে নিদ্ৰা হৰিছে গ্ৰাম্য লোকসকলৰ ৷ বিছাৰ উপদ্ৰৱৰ বাবে পৰিয়ালৰ সৈতে ঘৰ-বাৰী এৰি এতিয়া নিৰাপদ ঠাইত আশ্ৰয় ল’বলগীয়া হৈছে নিৰুপায় কৃষকসকলে ৷
লগতে পঢ়ক : ৫০ বছৰীয়া ইতিহাসত নোহোৱা লাভ আহৰণ অসম পেট্ৰ’কেমিকেল লিমিটেডৰ
