মৰিগাঁও, ১ আগষ্ট: মৰিগাঁও জিলাৰ অভিভাৱক মন্ত্ৰীৰ দায়িত্বত থকা ৰাজ্যৰ স্বাস্থ্যমন্ত্ৰী কেশৱ মহন্তই মঙলবাৰে লাহৰীঘাট ৰাজহচক্ৰৰ অৰ্ন্তগত মোৱামাৰীত ব্ৰহ্মপুত্ৰৰ খহনীয়াগ্ৰস্ত অঞ্চল পৰিদৰ্শন কৰে । মৰিগাঁৱৰ জিলা আয়ুক্ত দেৱাশীষ শৰ্মা আৰু জলসম্পদ বিভাগৰ মৰিগাঁও সংমণ্ডলৰ কাৰ্যবাহী অভিযন্তা লোচন চৌধুৰীৰ সৈতে মোৱামাৰীৰ ভজাইখাটি গাঁৱত উপস্থিত হৈ মন্ত্ৰীগৰাকীয়ে ব্ৰহ্মপুত্ৰৰ খহনীয়া সৃষ্ট পৰিস্থিতিৰ চাক্ষুষ বুজ লয় ৷
ব্ৰহ্মপুত্ৰৰ দাঁতিকাষৰীয়া মোৱামাৰী অঞ্চলৰ প্ৰায় ছয় কিলোমিটাৰ দৈৰ্ঘৰ অংশত বিগত কিছুদিন ধৰি ব্ৰহ্মপুত্ৰৰ প্ৰৱল খহনীয়াই ভাবুকিৰ সৃষ্টি কৰি আহিছে । ফলত নৈপৰীয়া ৰাইজৰ মাজত বিৰাজ কৰিছে আতংকই । বিশেষকৈ ব্ৰহ্মপুত্ৰৰ গৰাখহনীয়াৰ অঞ্চলটোৰ অৱশিষ্ট সামাজিক তথা ৰাজহুৱা অনুষ্ঠান প্ৰতিষ্ঠানসমূহ গৰাখহনীয়াত চিৰকাললৈ উছন হোৱাত ভাবুকি আহিছে দাঁতিকাৰীয়া বসতি প্ৰধান গাঁৱলৈ ।
অভিভাৱক মন্ত্ৰী মহন্তই স্থানীয় ৰাইজৰ সৈতেও মত বিনিময় কৰি খহনীয়াৰ ভাবুকি সম্পৰ্কে সবিশেষ বুজ লয় । মন্ত্ৰীগৰাকীয়ে এলেকাটোত জলসম্পদ বিভাগৰ ফালৰ পৰা গৰাখহনীয়া প্ৰতিৰোধৰ বাবে লোৱা কাৰ্যব্যৱস্থাও পৰ্যবেক্ষণ কৰাৰ লগতে উপায়ুক্ত আৰু জলসম্পদ বিভাগৰ বিষয়া-অভিযন্তাৰ সৈতে এই বিষয়ে আলোচনা কৰে ।
জলসম্পদ বিভাগৰ কাৰ্যবাহী অভিযন্তাই পৰিদৰ্শকালত মন্ত্ৰীগৰাকীক অৱগত কৰা মতে এই অঞ্চলটোত খহনীয়া আক্ৰান্ত প্ৰায় ৪.৫ কিলোমিটাৰ অংশত ইতিমধ্যে জিঅ’ বেগ সংস্থাপনৰ দ্বাৰা খহনীয়া প্ৰতিৰোধৰ ব্যৱস্থা কৰা হৈছে । ইয়াৰ সুফলো লাভ কৰা বুলি জলসম্পদ বিভাগৰ কাৰ্যবাহী অভিযন্তাই জানিবলৈ দিয়ে ।
আনহাতে, অৱশিষ্ট ১.৫ কিলোমিটাৰ দৈৰ্ঘৰ অংশতো খহনীয়া প্ৰতিৰোধৰ বাবে জৰুৰী ব্যৱস্থা গ্ৰহণৰ বাবে জিলাৰ অভিভাৱক মন্ত্ৰীগৰাকীয়ে উপায়ুক্ত আৰু জলসম্পদ বিভাগক দিহা দিয়ে । এই অৱশিষ্ট অংশতো খহনীয়া প্ৰতিৰোধ কাৰ্য সম্পূৰ্ণ হৈ উঠিলেই বৃহত্তৰ মোৱামাৰী অঞ্চলত গৰাখহনীয়া ৰোধ কৰিব পৰা যাব বুলি মন্ত্ৰীগৰাকীয়ে আশা প্ৰকাশ কৰে ।
লগতে পঢ়ক: Brahmaputra Erosion: মাজুলীৰ খহনীয়াগ্ৰস্ত অঞ্চল পৰিদৰ্শন ব্ৰহ্মপুত্ৰ ব’ৰ্ডৰ উপাধ্যক্ষৰ
