লখিমপুৰ, ১৭ নৱেম্বৰ: আৰু মাত্ৰ এদিনৰ পাছতে অৰ্থাৎ ১৯ নৱেম্বৰৰ পৰা লখিমপুৰ নগৰৰ পদ্মনাথ গোহাঞি বৰুৱা ক্ষেত্ৰত তিনিদিনীয়াকৈ অনুষ্ঠিত হ’ব সদৌ অসম ছাত্ৰ সন্থাৰ কেন্দ্ৰীয় সাধাৰণ সভা (Padmanath Gohain baruah Field at Lakhimpur) । ইতিমধ্যে এই সভাৰ প্ৰস্তুতি পূৰ্ণগতিত চলিছে । এই সাধাৰণ সভাখনত শদিয়াৰ পৰা ধুবুৰীলৈকে পাঁচ হেজাৰ প্ৰতিনিধিয়ে অংশগ্ৰহণ কৰিব । তদুপৰি ছাত্ৰ সন্থাৰ কেন্দ্ৰীয় নেতৃত্ব,ৰাজ্যৰ বিভিন্ন ক্ষেত্ৰৰ বৰেণ্য ব্যক্তিসকলে অংশগ্ৰহণ কৰিব বুলি সন্থাৰ আয়োজক সমিতিয়ে সদৰি কৰিছে ।
ইতিমধ্যে আদৰণি তোৰণ, মূল মণ্ডপ, একেলগে পাঁচ হেজাৰ লোকে খাব পৰাকৈ খাদ্য গৃহ আদিৰ নিৰ্মাণ দ্ৰুত গতিত চলিছে । মূল অভ্যৰ্থনা সমিতিৰ লগতে বহুকেইখন উপ-সমিতি গঠন কৰি সাধাৰণ সভাখন সফল কৰিবলৈ আছুৱে (All Assam Student Union) প্ৰস্তুতি আৰম্ভ কৰিছে ।
এই সভাত অংশগ্ৰহণ কৰিব আছুৰ মুখ্য উপদেষ্টা সমুজ্জ্বল কুমাৰ ভট্টাচার্য, সভাপতি দীপাংক কুমাৰ নাথ, সাধাৰণ সম্পাদক শংকৰজ্যোতি বৰুৱাৰ লগতে ৰাজ্যৰ শিক্ষা, সাহিত্য, সাংস্কৃতিক আদি ক্ষেত্রলৈ বৰঙণি যোগোৱা কেইবাগৰাকীও বিশিষ্ট ব্যক্তিয়ে । বিভিন্ন জনগোষ্ঠীয় সাংস্কৃতিক কাৰ্যসূচীৰ উপৰি সভা অনুষ্ঠিত হ'ব বুলি উদ্যোক্তাসকলে সদৰি কৰিছে ।
আজি লখিমপুৰত আছুৰ সাধাৰণ সভাৰ প্ৰস্তুতিৰ বুজ ল’লে আছুৰ সাধাৰণ সম্পাদক শংকৰজ্যোতি বৰুৱাই । ইয়াৰ দুদিনমানৰ পূৰ্বে সভাপতি দীপাংক নাথে সভাস্থলী পৰিদৰ্শন কৰি যোৱাৰ পাছত বৃহস্পতিবাৰে সম্পাদক শংকৰজ্যোতি বৰুৱাই প্ৰস্তুতিৰ বুজ লয় । প্ৰস্তুতিৰ বুজ লৈ সদৌ অসম ছাত্ৰ সন্থাৰ লখিমপুৰ সাধাৰণ সভাখন অতি গুৰুত্বপূর্ণ হ’ব বুলি মন্তব্য কৰে সম্পাদকগৰাকীয়ে । এই সভাতে অসমৰ ভৱিষ্যত জন জীৱনৰ সমস্যা ৰাজিৰ ক্ষেত্ৰত ৰূপ ৰেখা তৈয়াৰ হ’ব বুলিও তেও মন্তব্য কৰে । অসমৰ জনজীৱনক আগুৱাই নিয়াৰ ৰূপৰেখা, ছাত্ৰ সন্থাৰ ভৱিষ্যত কৰণীয় পন্থা নিৰূপণ আদি এই সাধাৰণ সভাই নিৰ্ণায়ক ভূমিকা পালন কৰিব বুলিও ছাত্ৰ নেতা গৰাকীয়ে কয় ।
উল্লেখ্য এই সভাৰ প্ৰস্তুতি অন্তিম পৰ্যায়ত আছে । সকলো দিশতে যুদ্ধকালীন তৎপৰতাৰে কাম কৰি আছে আছু কৰ্মীসকলে । সাংস্কৃতিক কাৰ্য্যক্ৰমৰ আখৰাও চলিব ধৰিছে । অসমৰ জনজীৱনৰ ভৱিষ্যত সম্পৰ্কে এই সভাখনে নিৰ্ণায়ক ভূমিকা ল’বলগীয়া সভাখন সফল কৰিবলৈ আছুৰ সৈতে লখিমপুৰীয়া ৰাইজেও হাত উজান দিছে ।
লগতে পঢ়ক: General meeting of AASU: লখিমপুৰত আছুৰ সাধাৰণ সভাৰ প্ৰস্তুতি তুংগত
