বিহপুৰীয়া,8 মে’: লখিমপুৰৰ নাৰায়ণপুৰত খাকী পোচাকত কালিমা সানিছে এগৰাকী আৰক্ষী বিষয়াই ৷ সাধাৰণ একোটা গোচৰ নিষ্পত্তিৰ নামতে ধনদাবীৰ অভিযোগ আৰক্ষী বিষয়া দীপজ্যোতি মালাকাৰৰ বিৰুদ্ধে । নাৰায়ণপুৰ থানাৰ এইগৰাকী ভাৰপ্ৰাপ্ত বিষয়াৰ কৰ্মকাণ্ডত অতিষ্ঠ হৈ পৰিছে সৰ্বসাধাৰণ ৰাইজ ৷
উল্লেখ্য যে, বিগত নিৰ্বাচনত নাৰায়ণপুৰ থানালৈ বদলি হৈ অহা আৰক্ষী বিষয়া দীপজ্যোতি মালাকাৰে অবৈধভাৱে কাম-কাজ সম্পাদনৰ বাবে দুজনকৈ যুৱকক নিয়োগ কৰাৰো অভিযোগ উত্থাপন কৰিছে ৰাইজে ৷ এই দুই যুৱকৰ দ্বাৰাই বিভিন্নজনৰ সৈতে গোচৰ নিষ্পত্তিৰ নামত দৰ-দাম কৰাৰ উপৰিও বিভিন্ন মহলক ভীতি প্ৰদৰ্শন কৰি আহিছে ভাৰপ্ৰাপ্ত আৰক্ষী বিষয়া গৰাকীয়ে ৷ শেহতীয়াকৈ এটা সাধাৰণ গোচৰ নিষ্পত্তিৰ নামত তেওঁ অভিযুক্ত পক্ষৰ পৰা থানাৰ গাড়ী চালকগৰাকীৰ জৰিয়তে ৫০ হাজাৰ টকা দাবী কৰি ১২ হাজাৰ টকা সংগ্ৰহ কৰা কাৰ্যই নাৰায়ণপুৰত ব্যাপক প্ৰতিক্ৰিয়াৰ সৃষ্টি হৈছে ৷
আনহাতে, নাৰায়ণপুৰ থানাৰ অন্তৰ্গত বিভিন্ন অঞ্চলত চলি থকা অবৈধ সুৰাৰ ঘাটি, শিল-বালিৰ অবৈধ বেহাৰ লগত জড়িত ব্যৱসায়ীসকলক উৎখাত কৰাৰ নামত ধন সংগ্ৰহৰো অভিযোগ উঠিছে আৰক্ষী বিষয়া গৰাকীৰ বিৰুদ্ধে ৷ সংবাদ মাধ্যমৰ পৰা সকলো সময়তে আঁতৰি থকা এইগৰাকী আৰক্ষী বিষয়া দীপজ্যোতি মালাকাৰৰ বিৰুদ্ধে শীৰ্ষ মহলে শীঘ্ৰে বিহিত ব্যৱস্থা গ্ৰহণৰ বাবে দাবী উত্থাপন কৰিছে নাৰায়ণপুৰৰ ৰাইজে ৷
