লখিমপুৰ,১৫ জানুৱাৰী : ভাৰতীয় বতৰ বিজ্ঞান বিভাগৰ (আইএমডি) ১৫০ বছৰীয়া জয়ন্তী উদযাপন । দেশৰ ভিন্ন প্ৰান্তৰ লগতে অসমৰ লখিমপুৰ জিলাৰ লীলাবাৰী বিমানবন্দৰতো ভাৰতীয় বতৰ বিজ্ঞান বিভাগৰ ১৫০ বছৰীয়া জয়ন্তী পালন কৰা হৈছে ।
লীলাবাৰী বিমান বন্দৰৰ বৈমানিক বতৰ বিজ্ঞান কেন্দ্রত এই বৰ্ষপূৰ্তি পালন কৰা হয় । কাৰ্যসূচীৰ অংশ হিচাপে কেন্দ্ৰটোৰ সমীপৱৰ্তী বিদ্যালয়সমূহৰ একাংশ ছাত্র-ছাত্রীক আমন্ত্ৰণ জনোৱা হয় আৰু বতৰ বিজ্ঞান বিভাগৰ বিভিন্ন কাৰ্য প্ৰণালী সম্পৰ্কে অৱগত কৰা হয় । লগতে ছাত্ৰ-ছাত্ৰীসকলক যন্ত্ৰপাতিৰ সৈতেও পৰিচয় কৰাই দিয়া হয় । শিক্ষার্থী সমাজক এই দিশত আগ্ৰহী কৰি তোলাৰ বাবেই কেন্দ্রটোৰ বিজ্ঞানীসকলে বিশেষ কাৰ্যসূচীও ৰূপায়ণ কৰে । বিভাগটোৰ গৌৰৱময় ইতিহাস সম্পৰ্কে বিজ্ঞানীসকলে শিক্ষার্থীসকলক অৱগত কৰে । বিভাগটোৰ অৱসৰপ্ৰাপ্ত বিষয়া-কৰ্মচাৰীসকলকো আমন্ত্রণ জনাই সম্বৰ্ধনা জ্ঞাপন কৰা হয় ।
উল্লেখ্য যে ভাৰতীয় বতৰ বিজ্ঞান বিভাগৰ অধীনত থকা ৬ টা আঞ্চলিক কাৰ্যালয়ৰ ভিতৰত গুৱাহাটী আঞ্চলিক কাৰ্যালয়ৰ অধীনত আছে লখিমপুৰৰ লীলাবাৰী বিমান বন্দৰৰ বতৰ বিজ্ঞান কেন্দ্রটো । কেন্দ্ৰটোত ভাৰতীয় বতৰ বিজ্ঞান বিভাগৰ ১৫০ বছৰীয়া জয়ন্তী পালনৰ বিভিন্ন কাৰ্যসূচীত কেন্দ্রটোৰ বতৰ বিজ্ঞানী পংকজ বৰপাত্ৰগোঁহাই, বৈজ্ঞানিক সহায়ক আশীষ দ্বিবেদী, অজিত কুমাৰ সিং আদিয়ে অংশগ্রহণ কৰে ।
উল্লেখ্য যে ভাৰত চৰকাৰৰ ভূ-বিজ্ঞান মন্ত্রালয়ৰ অধীনস্থ এই বিভাগটো বিভিন্ন ভাগত ভাগ হৈ আছে । কৃষি, বিমান পৰিবহণৰ পৰা আৰম্ভ কৰি বিভিন্ন ক্ষেত্রত বিভাগটোৱে কাম কৰি আছে । ভাৰতীয় বতৰ বিজ্ঞান বিভাগ হৈছে ভাৰত চৰকাৰৰ সকলো বতৰ আৰু জলবায়ু সেৱাৰ প্ৰধান চৰকাৰী সংস্থা । এই বিভাগে ভূ-বিজ্ঞান মন্ত্রালয়ৰ অধীনত কাম কৰে আৰু ইয়াৰ মুখ্য কাৰ্যালয় 'মৌচম ভৱন' নতুন দিল্লীৰ লোধি পথত অৱস্থিত ।
ভাৰতীয় বতৰ বিজ্ঞান বিভাগত ৪০০০ৰো অধিক বৈজ্ঞানিক আৰু কর্মীয়ে কাম কৰি আছে । ইয়াৰ মুখ্য কাৰ্যালয় দিল্লী আৰু দেশৰ ভিন্ন অঞ্চলক সেৱা আগবঢ়োৱা ৬ টা আঞ্চলিক বতৰ বিজ্ঞান কেন্দ্ৰৰ সৈতে সমন্বিতভাৱে কাম কৰি আহিছে । এই বিভাগটোৱে ১৫০ বছৰীয়া জয়ন্তী পালন কৰিছে ।
লগতে পঢ়ক :ভোগালীৰ আনন্দৰ মাজতে ৰে’লৰ খুন্দাত প্ৰাণ গ'ল এজনৰ
