বিহপুৰীয়া, 6 জুলাই : ৰাজ্যত অব্যাহত আছে অসম আৰক্ষীৰ ড্ৰাগছ বিৰোধী অভিযান ৷ আৰক্ষীৰ অভিযানত ইতিমধ্যেই জালত পৰিছে বহু অপৰাধী ৷ ইয়াৰ মাজতে উৎকোচ উপেক্ষা কৰি এজন অপৰাধীক কৰায়ত্ত কৰিলে লখিমপুৰৰ এগৰাকী গৃহৰক্ষী জোৱানে ৷ উৎকোচ উপেক্ষা কৰি এজন ড্ৰাগছ মাফিয়াক কৰায়ত্ত কৰা এই গৃহৰক্ষী জোৱানজন বিহপুৰীয়া আৰক্ষী থানাৰ অধীনৰ বিজয় হাজৰিকা ৷
সোমবাৰে নিশা মষ্ট ৱান্টেত বাবুল আলীক কৰায়ত্ত কৰে গৃহৰক্ষী জোৱান বিজয় হাজৰিকাই ৷ কিন্তু গাড়ীসহ পলাই সাৰিবলৈ সক্ষম হয় বাবুলৰ আন এক সহযোগী ৷ যোৱা 26 মে'ৰ পৰা পলাতক অৱস্থাত আছিল বিহপুৰীয়াৰ কেঞামৰাৰ ড্ৰাগছ মাফিয়া বাবুল আলী ৷ কিন্তু সোমবাৰে নিশা চলা এক তালাচী অভিযানত জালত পৰে ড্ৰাগছ মাফিয়াটোক ৷
বাবুল আলীয়ে গৃহৰক্ষী জোৱান জনক এক লাখ টকা যাচিছিল যদিও তাক উপেক্ষা অতি কৌশলেৰে কুখ্যাত ড্ৰাগছ মাফিয়া নিজামুদ্দিন আহমেদ উৰফে বাবুল আলীক কৰায়ত্ত কৰে গৃহৰক্ষী জোৱান জনে ৷ দীৰ্ঘদিন ধৰি আৰক্ষীৰ চকুত ধুলি দি পলাই আছিল ড্ৰাগছ মাফিয়া বাবুল আলী ৷
উল্লেখ্য যে, কাৰ্বি আংলঙত শেহতীয়াকৈ 12 কোটি টকাৰ ড্ৰাগছ জব্দ কৰি ৰাজ্য জুৰি চৰ্চা লাভ কৰিছিল বৰচিং বে' নামৰ এগৰাকী গৃহৰক্ষী জোৱান ৷ পৰৱৰ্তী সময়ত ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাই অসম আৰক্ষীৰ কনিষ্টবল পদত নিয়োগ কৰিছিল গৃহৰক্ষী জোৱান জনক ৷ উক্ত ঘটনাৰ চাঞ্চল্য মাৰ নৌযাঁওতেই পুনৰ উৎকোচ উপেক্ষা কৰি এজন অপৰাধীক কৰায়ত্ত কৰিলে গৃহৰক্ষী জোৱান বিজয় হাজৰিকাই ৷
লগতে পঢ়কঃ নতুন SOP: 7 জিলাক সম্পূৰ্ণ কণ্টেইনমেণ্ট জ’ন ঘোষণা
