কোকৰাঝাৰ, 1 জুনঃ উদণ্ড যুৱকৰ আক্ৰমণত মঙলবাৰে কোকৰাঝাৰত দুজন যুৱক গুৰুতৰভাবে আহত হয় ৷ বুধবাৰে বিয়লি কোকৰাঝাৰ চহৰৰ গৌৰনগৰত সংঘটিত হয় এই ঘটনা৷ আহত যুৱক দুজন ক্ৰমে ছালাকাটিৰ নুৰউদ্দিন সেখ আৰু আনোৱাৰ আনছাৰী৷ এটা পথ দুৰ্ঘটনাক কেন্দ্ৰ কৰিয়ে উক্ত আক্ৰমণৰ ঘটনাটো সংঘটিত হোৱা বুলি জানিব পৰা গৈছে ৷
জানিব পৰা মতে ছালাকাটিৰ নুৰউদ্দিন সেখ, আনোৱাৰ আনছাৰী আৰু আশ্ৰাফ আলী এই তিনিওজনে দুখন মটৰ চাইকেলেৰে বুধবাৰে বিয়লি জিলাখনৰ ফকিৰাগ্ৰামৰ পৰা কোকৰাঝাৰ লৈ আহি আছিল৷ আহি থকাৰ পথতে কোকৰাঝাৰৰ গৌৰনগৰত এখন অটোৱে ইয়াৰে আশ্ৰাফ আলীৰ মটৰ চাইকেলক খুন্দা মৰাত মটৰচাইকেল বাগৰি পৰে ৷ যাৰ ফলত আশ্ৰাফ আলী আহত হবলগীয়া হয় ৷
পিছত আশ্ৰাফ আলীৰ দুই সহযোগী ক্ৰমে নুৰউদ্দিন সেখ আৰু আনোৱাৰ আনছাৰীয়ে অটো চালকজনক এটা চোৰ শোধায় ৷ ইয়াকে লৈ উত্তেজিত হৈ পৰা একাংশ স্থানীয় উদণ্ড যুৱকে নুৰউদ্দিন সেখ আৰু আনোৱাৰ আনছাৰীক ঘেৰি ধৰি গুৰুলাগুৰুলকৈ প্ৰহাৰ কৰে । ইয়াৰ ফলত যুৱকদ্বয় বেয়াকৈ আঘাতপ্ৰাপ্ত হয় ৷ ইফালে ঘটনা সন্দৰ্ভত আঘাতপ্ৰাপ্ত যুৱক দ্বয়ে উদণ্ড যুৱক কেইজনৰ বিৰুদ্ধে কোকৰাঝাৰ সদৰ থানাত এক এজাহাৰ দাখিল ৷
ইপিনে কোকৰাঝাৰ গৌৰনগৰত আক্ৰমণৰ ঘটনাক কঠোৰ ভাষাৰে গঢ়িহনা দিছে আৰএম ছি, এবিএমছু, নেমছু আৰু আমছুৰ কোকৰাঝাৰ জিলা সমিতিয়ে ৷ ১২ ঘন্টাৰ ভিতৰত উদণ্ড যুৱকৰ দলটোৰ নেতৃত্ব দিয়া শ্যামল দে' আৰু সুৰজ বৰ্মনসহ উদণ্ড যুৱকৰ দলটোক আটক কৰাৰ দাবী জনাইছে সংগঠন কেইটাই ৷ ১২ ঘণ্টাৰ ভিতৰত দোষীক কৰায়ত্ত নকৰিলে আন্দোলনৰ হুংকাৰ দিছে ৷
ঘটনা সন্দৰ্ভত ইতিমধ্যে আৰ এম ছি ,আমছু , এবিএমছু আৰু নেমছুৰ এটি প্ৰতিনিধি দলে জিলা অতিৰিক্ত আৰক্ষী অধীক্ষকক সাক্ষাৎ কৰি ঘটনাৰে জড়িত দোষীৰ বিৰুদ্ধে বিহিত ব্যৱস্থা লোৱাৰ দাবী জনায় ৷ ইফালে নিশা আৰক্ষীয়ে উদণ্ড যুৱকৰ দলটোক নেতৃত্ব দিয়া শ্যামল দে'ক আটক কৰা বুলি জানিব পৰা গৈছে ৷
লগতে পঢ়ক: ধানৰ খোলাৰ পৰা বায়'ইথানল নিষ্কাশন কৰাৰ কথাও ভাবি আছোঃ তেলী
