কোকৰাঝাৰ ২৮ ডিচেম্বৰ : বিটিআৰৰ মুখ্য কাৰ্যবাহী সদস্য হিচাপে দায়িত্ব লোৱাৰ পিছৰে পৰা প্ৰমোদ বড়োৱে বিভিন্ন চৰকাৰী কাৰ্যালয়ত আকস্মিক পৰিদৰ্শন অব্যাহত ৰাখিছে ৷ সোমবাৰেও মুখ্য কাৰ্যবাহী সদস্য প্ৰমোদ বড়োৱে বিটিআৰৰ সদৰ চহৰ কোকৰাঝাৰস্থিত লোকনিৰ্মাণ বিভাগৰ গ্ৰাম্য পথ সংমণ্ডলৰ কাৰ্যবাহী অভিযন্তাৰ কাৰ্যালয়ত আকস্মিক পৰিদৰ্শন কৰে । বিটিআৰৰ মুখ্য কাৰ্যবাহী গৰাকীয়ে কাৰ্যালয়ত উপস্থিত থকা বিষয়া-কৰ্মচাৰীৰ পৰা কাম-কাজৰ বুজ লোৱাৰ লগতে আলমাৰী খুলিও ফাইল পৰ্যন্ত চালিজাৰি পৰ্যবেক্ষণ কৰে ।
আনহাতে সংবাদ মাধ্যমৰ আগত মন্তব্য প্ৰদান কৰি বিটিআৰৰ মুখ্য কাৰ্যবাহী সদস্য প্ৰমোদ বড়োই কয় যে, আজি তেওঁ গড়কাপ্তানি বিভাগৰ কাৰ্যবাহী অভিযন্তাৰ কাৰ্যালয়ত প্ৰৱেশ কৰি বিষয়া-অভিযন্তাক আঁচনি সন্দৰ্ভত সোধপোছ কৰে । কোকৰাঝাৰ জিলাৰ বহুসংখ্যক ৰাস্তাৰ অৱস্থা বেয়া বুলি মন্তব্য কৰি প্ৰমোদ বড়োই কয় যে, এতিয়া কেন্দ্ৰীয় আৰু ৰাজ্য চৰকাৰৰ আঁচনিৰ জৰিয়তে ৰাস্তা সমূহ নিৰ্মাণ - মেৰামতি কৰা হব আৰু কোকৰাঝাৰ জিলাত কোনো এটা ৰাস্তা নিৰ্মাণৰ কাম যাতে বাকী নাথকে তাৰ প্ৰতি লক্ষ্য ৰখা হ‘ব ৷
লগতে পঢ়ক : উৎকন্ঠাৰ অৱসানঃ মঙলবাৰে গেৰুৱা মন্ত্ৰৰ দীক্ষা ল'ব অজন্তা-ৰাজদ্বীপে
