কোকৰাঝাৰ ৩০ এপ্ৰিল: কোকৰাঝাৰ জিলাৰ গোসাইগাঁও মহকুমাৰ অসম-বংগ সীমান্তৰ শ্ৰীৰামপুৰ ৰাষ্ট্ৰীয় ঘাইপথত শুকুৰবাৰে আৰক্ষীয়ে অভিযান চলাই বৃহৎ পৰিমাণৰ গাঞ্জা জব্দ কৰিবলৈ সক্ষম হৈছে ৷ এখন কণ্টেইনাৰ ট্ৰাকত লুকুৱাই অনা অৱস্থাত শিমুলটাপু আৰক্ষীয়ে এই বৃহৎ পৰিমানৰ গাঞ্জাখিনি জব্দ কৰিবলৈ সক্ষম হয় ৷ লগতে গাঞ্জাখিনি কঢ়িয়াই অনা এন-এল-01-কে- বি-3294 নম্বৰৰ কণ্টেইনাৰ ট্ৰাকখনো আৰক্ষীয়ে জব্দ কৰে ।
জানিব পৰা মতে, এক গোপন খবৰৰ ভিত্তিত শিমুলটাপু আৰক্ষীয়ে শুকুৰবাৰে বিয়লী দুই মান বজাত শ্ৰীৰামপুৰ ৰাষ্ট্ৰীয় ঘাইপথত অভিযান আৰম্ভ কৰে ৷ অভিযানকালত আৰক্ষীয়ে অসম বংগ সীমান্তৰ ডামৰাপাৰাত কণ্টেইনাৰ ট্ৰাক এখন প্ৰত্যক্ষ কৰি সন্দেহ হোৱাত ট্ৰাকখনত তলাচী চলায় । ট্ৰাকখনত তালাচী চলাই আৰক্ষীয়ে গাঞ্জাৰ 33 টা পেকেট জব্দ কৰিবলৈ সক্ষম হয় ৷ জব্দকৃত 534 কিলোগ্ৰাম ওজনৰ গাঞ্জা খিনিৰ বজাৰ মূল্য 10 লক্ষাধিক টকা হ’ব বুলি আৰক্ষী সূত্ৰে প্ৰকাশ ৷ ইপিনে দূৰৈৰ পৰা আৰক্ষীক প্ৰত্যক্ষ কৰি গাঞ্জা কঢ়িয়াই অনা ট্ৰাকখনৰ চালকজন আৰক্ষী আহি পোৱাৰ আগতে ঘটনাস্থলীৰ পৰা পলাই যাবলৈ সক্ষম হয় ৷
