দক্ষিণ কৰিমগঞ্জ, 19 চেপ্তেম্বৰঃ প্ৰকৃততে কি চলিছে প্ৰধানমন্ত্ৰী আৱাস যোজনা আঁচনিৰ নামত ৷ অসহায় লোকক ভয় দেখুৱাই প্ৰধানমন্ত্ৰী আৱাস যোজনাৰ টকা আত্মসাৎ ৷ দক্ষিণ কৰিমগঞ্জৰ ধলছড়া গাঁও পঞ্চায়তৰ ধীৰেন্দ্ৰ চন্দ্ৰ নামৰ লোক জনৰ লগত সংঘটিত হৈছে এনে ঘটনা ৷ বিশেষ ভাৱে সক্ষম অতি দৰিদ্ৰ পৰিয়ালৰ লোকজনে বহু কষ্টৰে প্ৰধান মন্ত্ৰী আৱাস যোজনা আঁচনিৰ অধীনত এটা পকী ঘৰ লাভ কৰিছিল ৷ কিন্তু অসহায় আৰু দুৰ্বলতাৰ সুযোগ লৈ ওচৰৰ গাঁৱৰ নজৰুল ইচলাম নামৰ এজন যুৱকে ভয়-ভীতি দেখুৱাই বৰ্লপূৱক ভাৱে লোকজনৰ বাসগৃহ তৈয়াৰীৰ বাবে চৰকাৰে যোগান ধৰা কিছু সামগ্ৰী লৈ যায় বুলি অভিযোগ উত্থাপিত হৈছে ৷ ইয়াৰোপৰি অভিযুক্ত নজৰুল ইচলামে লোক জনৰ বেংকৰ এ টি এম কাৰ্ড পৰ্যন্ত কাঢ়ি লৈ যায় ৷
এই সন্দৰ্ভত ধীৰেন্দ্ৰ চন্দ্ৰই পাথাৰকান্দি উন্নয়ন খণ্ডত অভিযোগ উত্থাপন কৰে যদিও কাৰ্যালয়টোৰ কৰ্মীসকলে নজৰুলৰ পক্ষত থাকি বৰ্তমানলৈ বাসগৃহটোৰ নিৰ্মাণ কাৰ্য নিয়ম অনুসৰিয়ে কৰা হৈছে বুলিহে জানিবলৈ দিয়ে ৷ এতিয়া নিৰুপায় হৈ ধীৰেন্দ্ৰ চন্দ্ৰই বাৰৈগ্ৰাম আৰক্ষী থানাত গোচৰ ৰুজু কৰিছে ৷
