ডিফু, ২২ ডিচেম্বৰঃ কার্বি আংলং স্বায়ত্তশাসিত পৰিষদে পৰিষদৰ ২৬টা সমষ্টিত উন্নয়নমূলক আঁচনিৰ খতিয়ান দাঙি ধৰিবলৈ এইবাৰ দুয়োখন পার্বত্য জিলাৰ গাঁৱে-ভুঁঞে, চহৰে-নগৰে উন্নয়নৰ খতিয়ান ল'বলৈ যাব বিজেপিৰ নেতা-কর্মীসকলে । বৃহস্পতিবাৰে ডিফুৰ তাৰালাংছ'ত থকা কার্বি পিপ'লছ হলত আয়োজিত এক সংবাদমেলত এই বিষয়ে সদৰী কৰে কার্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য ড৹ তুলিৰাম ৰংহাঙে । তেওঁ আগন্তুক নৱবৰ্ষত কার্বি আংলং স্বায়ত্তশাসিত পৰিষদে ল'বলগীয়া কেতবোৰ গুৰুত্বপূর্ণ পদক্ষেপ আৰু পৰিকল্পনাৰ কথা সদৰী কৰে ।
তেওঁ মুখ্যমন্ত্রী ড০ হিমন্ত বিশ্ব শর্মাই দিয়া প্রতিশ্রুতিসমূহ এতিয়া পৰিষদ আৰু অসম চৰকাৰে ৰূপায়ণ কৰি আছে বুলি মন্তব্য় কৰে । এই উদ্দেশ্য আগত ৰাখি ২৬টা পৰিষদীয় সমষ্টিত ঐক্য-বিজয় আৰু সমৃদ্ধি ৰেলী অনুষ্ঠিত কৰা বুলি সদৰি কৰে ৰংহাঙে । মুখ্যমন্ত্ৰীগৰাকীয়ে প্ৰদান কৰা প্রতিশ্রুতিসমূহ আখৰে আখৰে পালন কৰাৰ বাবে বিজেপি নেতৃত্বাধীন পৰিষদখন বদ্ধপৰিকৰ বুলি উল্লেখ কৰি তেওঁ জনসাধাৰণে বাট-পথ, বিশুদ্ধ খোৱা পানী, শিক্ষানুষ্ঠান আদিকে ধৰি উন্নয়নমূলক আঁচনিসমূহৰ দ্বাৰা লাভাম্বিত হৈছে নে নাই তাৰ খতিয়ান ল'বলৈ বিজেপি নেতা কর্মীসকল লোকসভা নিৰ্বাচনৰ পূর্বে দুয়োখন পার্বত্য জিলাৰ গাঁৱে ভূঞে, নগৰে-চহৰে যাব বুলি কয় । তেওঁলোকে ইয়াৰ প্রতিবেদন প্রদান কৰিব বুলি কয় ।
তেওঁ মুখ্যমন্ত্রীৰ নিৰ্বাচনী প্রতিশ্রুতি অনুসৰি দুয়োখন জিলাত ২৫০১ কোটি টকাৰ আঁচনিৰ আধাৰশিলা স্থাপন কৰাৰ লগতে কাম আৰম্ভ কৰা হৈছে । মুখ্য কাৰ্যবাহী সদস্য ড৹ তুলিৰাম ৰংহাঙে পুনৰ কয় যে অসম মালাৰ জৰিয়তে ৯২০ কোটি টকাৰ পথ নির্মাণ কৰি থকা হৈছে । তদুপৰি কাজিৰঙা-ৰংমংবে-ডকমকাৰ মাজত ৩০০ কোটি টকা ব্যয় সাপেক্ষে পথ নির্মাণৰ পৰিকল্পনা লোৱা হৈছে । নৱবৰ্ষৰ প্রথম সপ্তাহত তাৰালাংছ'ত নির্মাণ সম্পূর্ণ হোৱা অসমৰ ভিতৰতে প্রথম ৩০০০ আসন বিশিষ্ট অত্যাধুনিক প্রেক্ষাগৃহ উদ্বোধন কৰাৰ লগতে বিভিন্ন উন্নয়নমূলক আঁচনিসমূহ উদ্বোধন কৰা হ'ব বুলিও তেওঁ কয় ।
