ডিফু, ৮ নবেম্বৰ: কাৰ্বি আংলং,পশ্চিম কাৰ্বি আংলং আৰু ডিমা হাচাও জিলাৰ আশাকৰ্মী সকলে আজি ডিফুৰ ছেমচনছিং ইংতি পাৰ্কত এক ধৰ্ণা কাৰ্যসূচী ৰূপায়ণ কৰে ৷ তিনিওখন পাহাৰীয়া জিলাৰ আশাকৰ্মী সকলে ছেমচনছিং ইংতি পাৰ্কৰ সমীপত ভঙাগড়াৰ কাম চলি থকা বাবে ভালদৰে একগোট হ’বলৈও সুবিধা নথকা স্বত্বেও তাতেই ধৰ্ণাৰে মাননি বৃদ্ধিৰ দাবী জনায় ৷ আশাকৰ্মী সকলে অভিযোগ কৰি কয় যে চৰকাৰে তেওঁলোকক কামৰ উপৰি কামৰ বোজা জাপি দিছে যদিও অতি সামান্য মাননি দিয়ে ৷
তেওঁলোকে পুনৰ কয় যে ইয়াৰ পিচতো এতিয়া ঘৰে ঘৰে গৈ কুষ্ঠ ৰোগী আছে নেকি তাৰ সমীক্ষা কৰিবলৈ দিছে ৷ তাৰ বিনিময়ত দৈনিক মাত্ৰ ৭৫ টকা দিব ৷ শিশুক পালচ পলিঅ’ খুৱাবলৈ যাওতেও তেওঁলোকক ৭৫ টকা দিয়ে ৷ তাত তেওঁলোকে আপত্তি নাই কৰা ৷ আশাকৰ্মী সকলে কয় যে তেওঁলোকক চৰকাৰে মাননি নিদি মাহে দৰমহা দিয়ক ৷ নহ'লে মাননি মাহে ২১ হাজাৰ টকালৈ বৃদ্ধিৰ দাবী কৰে ৷ এটি শিশু জন্ম হোৱাৰ আগলৈকে সেই পৰিয়ালটোৰ ঘৰলৈ তেওঁলোক ৭ বাৰ যাব লাগে ৷ তাৰ বিনিময়ত প্ৰতিবাৰ যোৱাৰ বাবদ লাভ কৰে ৫০ টকা ৷
এখন অট'ত উঠিলে এবাৰতে ৫০ টকা ব্য়য় হয় বুলি তেওঁলোকে ক্ষোভেৰে উল্লেখ কৰি কয় যে দূৰৰ গাঁৱলৈ গ'লে ৫০ টকাৰে একো নহয় ৷ সেয়ে তেওঁলোকে চৰকাৰক মাহে ২১ হাজাৰকৈ মাননি দিবলৈ দাবী জনায় ৷ এই ধৰ্ণা কাৰ্যসূচীৰ অন্তত তেওঁলোক জিলা আয়ুক্ত মধুমিতা ভাগৱতীৰ জড়িয়তে দাবী সম্বলিত এখন স্মাৰক পত্ৰ মুখ্যমন্ত্ৰী ড৹হিমন্ত বিশ্ব শৰ্মালৈ প্ৰেৰণ কৰে ৷
