কামৰূপ,1 নৱেম্বৰঃ কামৰূপৰ কমলপুৰ ৰাজহ চক্ৰৰ অন্তৰ্গত বৰংগবাৰী-চৌৰাকাৰাত পথ নিৰ্মাণত অনিয়ম হোৱাৰ অভিযোগ তুলি শুকুৰবাৰে গড়কাপ্তানী বিভাগৰ বিৰুদ্ধে উত্তাল প্ৰতিবাদ সাব্যস্ত কৰে অঞ্চলবাসীয়ে। অভিযোগ অনুসৰি গড়কাপ্তানী বিভাগৰ ৰঙিয়া পথ সংমণ্ডলৰ অধিনত এচ ও পি ডি আঁচনিৰ জৰিয়তে প্ৰায় 60 লাখ টকা ব্যয় সাপেক্ষে নিৰ্মাণ কাৰ্য আৰম্ভ কৰা হৈছিল উল্লেখিত পথটোৰ। কিন্তু পথটোৰ নিৰ্মাণকাৰ্য আৰম্ভ কৰাৰে পৰা ঠিকাদাৰে মইমতালি কৰাৰ অভিযোগ উত্থাপন কৰে অঞ্চলবাসীয়ে। ইপিনে ঠিকাদাৰ গৰাকী স্থানীয় হোৱা হেতুকে ৰাইজৰ কোনো অভাৱ অভিযোগ গুৰুত্ব প্ৰদান নকৰি পথটোৰ নিৰ্মাণত নিম্ন মানৰ কাম কৰা বুলিও সংবাদ মাধ্যমক জনায় অঞ্চলবাসীয়ে। যাৰ বাবে ক্ষোভিত অঞ্চলবাসীয়ে নিৰ্মীয়মান পথটোলৈ ওলাই আহি প্ৰতিবাদ সাব্যস্ত কৰে ।
লগতে পঢ়কঃদুই লাখ টকীয়া দুটা বিদ্যুৎ মাচুলৰ বিল ! হতবাক গৃহস্ত
ইফালে পথটোৰ নিৰ্মাণত ষ্টন ডাষ্ট অথবা বালি ব্যৱহাৰ কৰিব লাগে যদিও চৰম দায়িত্বহীনতাৰ পৰিচয় দি ঠিকাদাৰে নদীৰ মাটি পথটোৰ নিৰ্মাণত ব্যবহাৰ কৰিছে বুলি অভিযোগ তুলিছে অঞ্চলটোৰ ৰাইজে। ফলত বৰষুণ দিলে পথটো বোকাময় হোৱাৰ বিপৰীতে ৰ'দ দিলে পথটো ধুলিময় হৈ জীয়াতু ভোগাইছে অঞ্চলবাসীক ।