বাইহাটা,7 জুন: বৃহত্তৰ বাইহাটা চাৰিআলি অঞ্চলত দীৰ্ঘদিন ধৰি ড্ৰাগছৰ ৰমৰমীয়া ব্যৱসায় চলাই অহা এজন ড্ৰাগছ ব্যৱসায়ী সোমবাৰে আৰক্ষীৰ জালত পৰে । কামৰূপ আৰক্ষী(Kamrup Police)ৰ মূৰৰ কামোৰণি হৈ পৰা ড্ৰাগছ ব্যৱসায়ীজনে কেইবাবছৰ ধৰি অঞ্চলটিত ড্ৰাগছৰ ব্যৱসায় চলাই আহিছিল ৷ বিশেষকৈ বিহদিয়া, মুক্তাপুৰ, কৰৰা, দগাঁও আদি অঞ্চলত ড্ৰাগছৰ ৰমৰমীয়া ব্যৱসায় চলাই আহিছিল ব্যৱসায়ীজনে ।
অৱশেষত বাইহাটা চাৰিআলি আৰক্ষী থানা(Baihata Chariali Police Station)ৰ ভাৰপ্ৰাপ্ত বিষয়া ৰূপম হাজৰিকাৰ নেতৃত্বত চলা এক অভিযানত বিহদিয়া গাঁৱৰ ধ্ৰুৱ নাৰায়ণ বৰুৱা নামৰ ড্ৰাগছ ব্যৱসায়ীজনক কৰায়ত্ত কৰে আৰক্ষীয়ে । উল্লেখ্য যে, ব্যৱসায়ীজনৰ পৰা বৃহৎ পৰিমাণৰ ড্ৰাগছ উদ্ধাৰ কৰে আৰক্ষীয়ে ।
আৰক্ষীৰ দলটোৱে ড্ৰাগছ ব্যৱসায়ীজনক কৰায়ত্ত কৰিবলৈ ওৰে নিশা বাহৰ পাতি আছিল । অচিৰেই বৃহত্তৰ অঞ্চলটি ড্ৰাগছ মুক্ত কৰাৰ অংগীকাৰ আৰক্ষী বিষয়াগৰাকীৰ ।
লগতে পঢ়ক : বোকাজানত বৃহৎ পৰিমাণৰ ড্ৰাগছ জব্দ
