নিউজ ডেস্ক, 6 আগষ্ট : সমগ্ৰ বিশ্বতে চাহেৰে নিজৰ সুকীয়া পৰিচয় দাঙি ধৰে অসম ৷ কিন্তু সম্প্ৰতি জীয়াই থকাৰ বাবে সংগ্ৰাম কৰিবলগীয়া হৈছে এই চাহ উদ্যোগটোৱে ৷ শেহতীয়াকৈ নিম্নগামী হোৱা চাহৰ মূল্যই এই উদ্যোগটোৰ প্ৰতি কঢ়িয়াই আনিছে চৰম ভাবুকি ৷ চাহৰ মূল্য সম্প্ৰতি উৎপাদনৰ ব্যয়তকৈয়ো হ্ৰাস পাইছে ৷
এই সমস্যা সন্দৰ্ভত উদ্বেগ প্ৰকাশ কৰি North East Tea Association এ চৰকাৰক তাৎক্ষণিক পদক্ষেপ গ্ৰহণৰ বাবে আহ্বান জনাইছে ৷ অতিশীঘ্ৰে চাহৰ মূল্য বৃদ্ধি কৰাৰ বাবে চৰকাৰক আহ্বান North East Tea Associationৰ ৷ অন্যথা এই উদ্যোগটো বিশেষকৈ ৰাজ্যৰ ক্ষুদ্ৰ চাহ খেতিয়কসকল আৰু অধিক ক্ষতিগ্ৰস্ত হ’ব বুলি আশংকা প্ৰকাশ কৰিছে ৷
North East Tea Associationৰ উপদেষ্টা বিদ্যানন্দ বৰকটকীয়ে কয় "চাহৰ মূল্য প্ৰতি কেজিত 44.19 টকালৈ হ্ৰাস পাইছে ৷ এই মূল্য বিগত বৰ্ষতকৈ 18 শতাংশ কম ৷ ইয়াৰ বিপৰীতে মূল্যবৃদ্ধি আৰু চাহ শ্ৰমিকৰ মজুৰি বৃদ্ধি পোৱাৰ বাবে চাহৰ উৎপাদনৰ খৰচ বৃদ্ধি হৈছে ৷"
লগতে পঢ়ক: নিম্নগামী কেঁচাপাতৰ মূল্য: দিক বিদিক হেৰুৱাইছে ক্ষুদ্ৰ চাহ খেতিয়কে
তেওঁ লগতে কয় যে, চাহ শ্ৰমিকৰ মজুৰি 167 ৰ পৰা 205 টকালৈ বৃদ্ধি পাইছে ৷ ইয়াৰ ফলত চাহৰ উৎপাদনৰ খৰচো প্ৰতি কেজিত 25 টকাকৈ বৃদ্ধি পাইছে ৷ ইয়াৰ উপৰিও খেতিত প্ৰয়োজন হোৱা সাৰ, কীটনাশক, মেছিনত ব্যৱহৃত ডিজেল, প্ৰাকৃতিক গেছ, কয়লা আদিৰ মূল্যবদ্ধি হোৱাৰ ফলত চাহ উৎপাদনৰ খৰচ প্ৰতিকেজিত 7 টকাকৈ বৃদ্ধি পাইছে ৷
আনহাতে NETAৰ অধ্যক্ষ সুনীল জালানে কয়, চলিত বৰ্ষৰ এপ্ৰিলৰ পৰা জুলাইলৈ Guwahati Tea Auction Centre (GTAC)ত CTC চাহৰ গড় মূল্যপ্ৰাপ্তি আছিল প্ৰতি কেজিত 208.02 টকা ৷ ইয়াৰ বিপৰীতে বিগত বৰ্ষত এই সময়ছোৱাত চাহৰ গড় মূল্যপ্ৰাপ্তি আছিল প্ৰতি কেজিত 252.21 টকা ৷
ইয়াৰ উপৰি Guwahati Tea Auction Centreত বিক্ৰী নোহোৱা চাহৰ পৰিমাণ এইবেলি যোৱা বছৰৰ তুলনাত দুগুণ বুলি জনায় NETAৰ অধ্যক্ষ সুনীল জালানে ৷ বিগত বৰ্ষত বিক্ৰী নোহোৱা চাহৰ পৰিমাণ আছিল 16. 367 শতাংশ ৷ এইবছৰ এই পৰিমাণ বৃদ্ধি হৈ হৈছেগৈ 35.16 শতাংশ ৷
যদিও চৰকাৰে এই উদ্যোগটোক উৎসাহিত কৰাৰ বাবে কিছুমান বিশেষ পদক্ষেপ গ্ৰহণ কৰিছে ৷ কিন্তু এই ক্ষেত্ৰত আৰু উন্নত প্ৰক্ৰিয়া নিশ্চিত কৰাৰ প্ৰয়োজন আছে ৷
লগতে পঢ়ক-মূল্য হ্ৰাস: বিপাঙত ক্ষুদ্ৰ চাহ খেতিয়ক
